Cheese Festival

Am Sunnti morge hani öppe 2 Minute der Durchhänger gha. Ha dänkt, i kenne jo niemer, und weis nid, was mache, und cha mit niemerem mit, und s'Velo isch ou im Service, und sowieso und überhoupt. Wo de die schwache 2 Minute si düre gsi hani mi parat gmacht für chli d'Stadt go uskundschafte ;-)

I ha öppe 20 Minute gha zum dert fürs loufe wo öppis los isch gsi. Es hett viu Turischte und so ungerwägs gha, viu Lütt si dusse i de Kafis und Beizli ghocket. Es isch auso es sehr gmüetlechs Stedtli! Aber was mer ufgfaue isch: es isch usser mir niemer eleini ungerwägs gsi. Guet, die hei haut aui Kollege...:) I bi de ou i die typische Turischte-Läde, so die mit Houz-Giraffe und auerlei so Sache. I ha ebe so öppis Fruchtschale-ähnlechs wöue. Das hani de ou gfunge, und es Tischset hani ou no kouft, das eine vo mine Bürotische wenigschtens chli meh usgseht wiene Ässtisch ;-) Has natürlech ou abegmärtet, vo öppe 160 Rand uf 120. I ha mi ou no chli ide Restaurands umegluegt und so chli Priise agluegt. So es Menu mit Fleisch choschtet durchschnittlech vilech 60-100 Rand.

Nachdäm i meh oder weniger die ganz Stadt abgschländeret ha bini ufemne Umwäg heigloffe. Es isch no rächt schön Wätter gsi und i has eifach gnosse, nüt z'mache.

Deheim acho hani Zmittag gässe: feini Springbock Trochewurscht, Salat, Brot und Chäs und so. Eifach wasi haut so gha ha ;-) De hani chli gläse und scho hetts mi wider zoge zum go seckle! Bike hani jo nid chönne wägem Velo im Service, und go schwümme hani nid wöue wiui de so witt is Fitness hätt müesse loufe, und zum loufe hani kei Luscht me gha.

I bi dasmou e wittere Wäg gsecklet weder am Samschti, ha eifach mehreri Zuesatzschloufene gmacht, und nach 90 Minute hani de mou dänkt, es sig jezz gnue... möge hätti jo scho no, so isches auso nid, aber irgend einisch hett mes jo de aube ou gseh ;-) Nachemne churze Düscheli zur erfrüschig hani mi wider id Arbeit gschtürzt (oder emu chli gläse). De isch no d'Julie vo Fort Collins online gsi und i ha chli mit ihre die guete aute Zytte ufgfrüscht...! ;-)

Hütt hani mit der Sofia abgmacht. Für die wo sech nümm möge erinnere, si hani im Flugzüg vo London nach Kapstadt kenneglehrt. I bi näb ihre ghocket und mir hei üs grad super verschtange! Si isch äbe vo Portugal, ursprünglech aber Mosambique. Si lacht immer und gseht eifach so glücklech us! Aber si hett ihri Hoor – unfreiwiuig – ganz churz. Si wachse jez langsam noche. Si heig ganz cooli chrusle gha, hett si gseit! Würklech mega härzig hetts usgseh (si hett mer Fötteli zeigt). Dir höit nech äuä scho dänke, was das heisst. Si hett mer de hütt gseit, dass si Chräbs hett, und es gäb mehreri Sorte vo däm Chräbs wo si hett – si hett die schlimmschti Sorte mit der gringschte heiligs-Chance. I zwöi Wuche mues si Teschts go mache zum luege, öb d'Chemo gnützt hett. Die Frou isch vouer Läbesfröid und hett so viu auerschlimmschti Sache hinger sich! Hett zum Bischpiu mehreri Mönet nid chönne ässe und trinke. Immer wider, au zwe Wuche, Chemos. Operatione... und si isch glich aut wie ig.

Auso, jedefaus isch si mi hütt morge cho abhole für as South African Cheese Festival! ;-) Mir hei de zersch wöue ufem offizielle Wäg es Ticket organisiere (das heisst, imne bestimmte Lade), aber die hei gseit, si chöne mer keis gäh, usemne komische Grund. De simer haut, trotzdäm dases gheisse hett, me chönn dert keni Tickets choufe, diräkt ufs Feschtgländ gfahre. Die hei üs de, mit Hiuf vo chli Ougezwinkere, glich Tickets verchouft ;-) Me hett de ou no grad es Probierglas chönne choufe füre Wyy für 10 Rand. I ha de für üs beidi grad eis kouft – ha jo hie no keni Wyygleser gha!! Und de heimer üs vo Schtand zu Schtand düreprobiert, mit Wyy, Olive, Süessigkeite, aber vor auem Chääs (ok, vilech ou meh Wyy aus Chääs, aber egau...)! Der Südafrikanisch Chääs schiint überwiegend Geissechääs z'sii. Es hett zwor sehr viu Ständ gha, aber irgdnwie überau wider chli s'gliche, vorauem Geisse, Geisse, Geisse... Der Wyy hingäge isch sehr abwächsligsriich gsi! Und sooo fein! I hätt am liebschte grad hunderti vo Fläsche kouft. Aber i ha jo gäng no 2 deheim woni gschänkt becho ha – und wenn wotti die scho trinke? Und emu nid eleini! Mues mer zersch chli Gseuschaft zueche tue bevori meh Wyy choufe ;-)

D'Sofia und ig hei emu der glich Gschmack gha was Chääs ageit, und mir hei de ou je es chliises Dösli ufschtrich-Chääs mit Sweet Chilli kouft (i ha wider chli abegmärtet, obwou si mi mega dumm agluegt hett ;-)). Und ou bi Giele heimer de glich Gschmack a Tag gleit. Es hett ei einzige Typ ufem ganze Gländ gha wo mir gfaue hett, und dä hett ihre ou aus einzige gfaue ;-) I weiss nid, öb mir zwöi je mous zäme i Usgang sötte! :-D

Eh, si chunnt vilech nächschts Wuchenänd wider nach Stellenbosch, de chöimer de das vilech grad usteschte...

Es hett übrigens abem Nomittag in Ströme gschiffet, und tuet immerno. I bi de ou mis Velo wider go abhole und pflotschnass heicho. Aber s'Velo louft jezz perfekt, und d'Wartig hett 165 Rand koschtet. I gloube, für das luegt der ir Schwizz kene ou nur s'Velo a ;)

Jo, deheim acho hani mi wider hinger d'Paper ghöcklet und gläse bises dunku worde isch. Schaffe macht scho sehr Spass wenns eim so intressiert!

Ou, ha no grad es Mail becho das eini am Mittwuch ufs Fäud geit, und öbi mit wöu (der John, eine vo mine Cheffe, hett mou amne Lab Meeting gseit, wenn öpper göng söue si mi doch ou froge, dasi chli chön d'Gägend aluege. Tönt guet!). Vilech klappt jo das!

Well, cheers!

Aaschtoh...

I gönne mer grad es feins Rooibos Teeli und es Brownie zum Dessärt. Ha äbe vori scho chli früeh Znacht gnoh wiui so hunger gha ha nachem Seckle. Es hett so öppis wie griechische Salat und Brot und so gäh.

I mues auso säge, i bi EXTREM schtouz uf mi! I bi über 13 Kilometer gsecklet i öppe 68 Minute. Cha das überhoupt sii? Guet, i mues scho säge, i ha mi extrem guet gfüeut die ganz Strecki und ha scho gmeint, i sig schnäu gsi (aber das hani ou scho gmeint und bi de glich nid viu schneuer aus süsch gsi...). Und i ha s'Gfüeu gha, i hätt ewig möge hütt! :-) Bi bis zum Jonkershoek Iigang gsecklet (bis dert, woni letscht Sunnti mitem Velo ou bi). Das isch mis Zieu gsi für i öppe 2 oder 3 Wuche, so witt z'möge. Henu, de muesi haut mis Zieu jezz nöi stecke. Oder s'eifach so näh wies grad chunnt, wasi jo meischtens mache...;-) I füehle mi übrigens super und mis Chnöi tuet ou nid weh, wie aube mängisch deheim oder z'Colorado nachem seckle!!

I ha übrigens no es paar Anektöteli vergässe z'verzöue:

Woni nach Kapstadt gfahre bi hetts nöime ufem Wäg vo Stellenbosch uf d'Outobahn sone dicki dunkli Frou am Wägrand gha. D'Yongeza hett de ziemlech nüechtern gmeint: „she's selling“. Ufem Heiwäg heimer die glichi Frou grad gseh bi eim ine Pickup iischtige, de seit d'Yongeza: „he's buying.“ und de wie zu ihre: „NO NO, don't do it! he has a girlfriend!!“

Bim Rhodes Memorial si mer ou no schnäu es Kafi go näh. Die meischte Chäuner und Chäunerinne si dunku gsi. De heisi grad i ihrere Schproch afa zäme schäkere, de seit der eint so zu ihre: „I like your friend...“ mir hei de nur so glachet, är hett aber noni grad ufgäh, und hett de immer irgendwelchi Aschpilige gmacht. Am Schluss hetter ganz entsetzt gmeint, är heig jo jezz nid mou mini Nummere (die hetter ou jezz noni)!;-) D'Yongeza und ig hei üs sehr amüsiert ab ihm. Si hett de gmeint, das mache die dunkle Männer no gärn wenn e dunkli Frou mitere wysse ungerwägs isch – das chöm drum hie fasch nie vor und sig drum öppis sehr speziells. Isch eigentlech no krass...

Jo und d'Yongeza hett e 11-monatige Sohn. Vo irgend somne Typ haut. Si heig haut nid ufpasst, hett si gmeint. Dä isch de aube ir Chinderchrippe wenn si ad Uni geit. Si füehrt ne am Morge mitem Bus häre und geit ne am Obe mitem Bus wider go hole...

Si isch vom Eastern Cape und geit ou am Wuchenänd dert häre ihri Familie go bsueche. Das isch öppe e 16-schtündigi Busfahrt.

Mir si ou a viune so Siedlige verbii gfahre, vo „unoffiziell“ si (weis grad nümm, wieme dene seit). I ha leider nid chönne föttele wiui jo gfahre bi. Haut meh oder weniger eis Blächhüttli am angere a... Isch aber scho idrücklech – oder besser gseit trurig – und schtimmt eim nachdänklech, das ganze.

So, jezz aber no chli meh zu mim „verlengerete“ Wuchenänd, wo jo geschter scho agfange hätt. I bi tatsächlech nid ad Uni geschter und ha mi ou chönne zwinge, mou e ganze Tag kei Sport z'mache – auso nid go seckle, nid go bike, nid is Fitness... NÜT! :-)

Chli vor de sibne bini de glich scho wach gsi (go haut hie ou nid so schpäät is Bett wius scho so gli dunku isch) und de hani am sibni afo schaffe, haut deheim am Labtop. I ha a zwöine Manuskript gschaffet und die si jezz ou vom Tisch fürne Momänt (auso, si si ufem Tisch vo öpper angerem. I ha mi Teil gmacht.). Dasch scho mou e riese Leischtig, wetti meine! De hani ou agfange mi id Literatur izschaffe für mis nächschte Projekt, s'Review über Risk Assessments vo invasive Arte. Dert bini ou sehr guet vora cho. Ha mi ou usnahmswys mou super guet chönne konzentriere!

Zwüschdüre hani mou es Schtündli, zwöi Pouse gmacht zum Ässe und es Schpaziergängli mache is chliine Nature Reserve woni ou ab und zue go go jogge. I ha de chli Fötteli gmacht und d'Sunne gnosse, wenn si aube wider füre cho isch (es isch abwächselnd bewöukt und sunnig gsi, aber meh sunnig). Hie e chliini Schtichprob. Uf Facebook hetts meh.

Flieg, Eichhörnli, fliiiieg!!
Das isch diräkt vo mim Baukon/Husigang us gföttelet, und i dänke es isch es invasivs Grey Squirrel (Sciurus carolinensis). Bös, bös!!!

Southern Double-Collared Sunbird (Cinnyris chalybeu), würdi schezze...

das hani eifach müesse poste... nähmets nid persönlech :-D

äuä e Angulate Tortoise (Chersina angulata)

Auso, zämefassend: der Fritti isch e sehr produktive Tag gsi!
Hütt bini de chli lenger im Bett blibe und ha chli gläse. Chli lenger heisst öppe bis am achti ;-) De bini uf d'Bank go mis Chärtli abhole. Die schicke eim do d'Sache nid hei, sondern du bechunnsch es SMS und chasch/muesch de die Sache bir Bank go hole. Und, super, es isch Samschti, inzwüsche 2ne Fiirtäge soz'säge, ändi Monet.... I go so id Bank ine und si isch VOUGSCHTOPFT! Für jede Schauter und jedi Dienschtleischtig hesch meterwiis müesse aaschtoh! Aber was hani wöue, i ha mi de eifach igreiht, wie hunderti angeri ou. Und ha öppe e Schtung druf gwartet, dasi mis Bankchärtli ha dörfe i Empfang näh. Defür ischs goudig!! ;-) S'beschte isch jo gsi, das öppe 5 Bankagschtöuti die ganz Zyt nur umegloffe si und irgendwelchi Dienschtleischtige abotte hei, wo niemer brucht hett (wie e Kontousdruck z'mache und so... für das chunnt me hie äxtra id Bank! Si schickes jo nid hei!!)

De bini ändlech mis Velo go ablifere bim Veloshop für zums chli lo zwägmache. Am Mänti Nomittag chanis wider abhole. Es hett aus scho funktioniert und so, aber haut nid ganz perfekt. Und wiuis so viu bruche hani de dänkt, i lieses mou lo dürechecke.

De bini go ichoufe wiu der Lade (Pick'n'Pay) jo grad näbedra isch. Dert isch no bau es grössers Puff gsi aus ir Bank – klar, ir Bank si jo aui nur umegschtange, im Lade hei aui sech no wöue bewege zu auem häre! I ha de emu aus gfunge und wider öppe e Schtung ar Kasse dörfe aschtoh. Aber so Aschtoh-Gedoud hani jo z'Colorado scho glehrt (zum Bischpiu für zum Outo Regischtriere, oder zum d'Fahrprüefig mache. Dir erinneret nech vilech...). Eh, mi stresst doch sowieso irgendwie nüt meh... ;-)

Denn bini mitemne Voue Rucksack heigloffe öppe 25 Minute wiui jo s'Velo abgliferet ha, und denn bini ändgöutig ryf gsi zum seckle!

Outofahre

Geschter isch nid e sehr ereignissriiche Tag gsi. I bi der ganz Tag ar Uni gsi und ha chli a revisions gschaffet vomne Manuskript und viu gläse zum mi vorbereite ufs Meeting mitem Dave und em John. Uf die 5i bini de is Gym wiui dänkt ha, es sig wider e Schtung mit dere woni s'erscht Mou gsi bi (und dasch super gsi). Aber – wär hätt das dänkt – der Plan wo online isch hett natürlech wider nid gschtumme und es si völlig angeri Sache gsi. I bi de wider ine sone Boser Schtung, aber mitemne Typ. Mann hett dä ufgregt! Isch nur die ganz Zyt umegschtouziert, hett dummi Schprüch gmacht über Froue (und es si aus nur Froue cho trainiere!!), hett säuber nüt mitgmacht... auso, wenis cha vermiide gohni vo jezz a nümm zu Manne go trainiere. Die si auso für nüt! Aber wenn s'Programm nie stimmt weisch haut aube nid, was de würklech stattfindet ;-) Immerhin isch s'training hert gsi, aber wider usschliesslech für d'Bei! I weiss nid, was sech die Lüt überlegge...

Hütt isch scho eher spannends Züg passiert. Am morge am sibni bini 50 Minute go seckle. Es isch scho häu gsi aber d'Sunne noni dobe. Es isch so warm gsi dasi mitem Träger-Shirt ha chönne seckle! D'Sunne isch de dobe gsi woni zrugg cho bi, auso um die achti ersch! De hani duschet, zmörgelet und bi ad Uni.

Am haubi 9ni hani äbe das Meeting gha mitem Dave und em John (ändlech!!) über was ig eigentlech sött mache hie ar Uni. Auso, es wird vo mir erwartet, dasi 3-5 (!!!!) Paper im Johr veröffendleche (kei Witz!), meh isch ou nid verbotte. Mi Schnitt isch bis jezz öppe eis im Johr...
Die erschti Arbeit isch es Review über Risk Assessments. Für das hani e deadline bis Ändi August, sött aber so schnäu wie möglech fertig wärde. Denn bini Organisatorin und übernime e „tragendi Roue“ (das heisst, Leadership vode Papers wo de bi däm Workshop sötte usecho, etc.) bimne Workshop Afangs August. Denn verbringi öppe 3 Mönet mit dene (vorussichtlech) 3 Manuskript, wo bi däm Workshop usechöme (auso, planet si), und voilà! de hani scho mini erschte 4 Publikatione vo däm Johr!!! :-DDD I bi liechters überwäutiget. Aber, es stresst mi irgendwie noni so wies äuä sött...;-) vilech bini ou eifach scho z'abbrüeht!

Am Mittag hani de abgmacht, dasi e Studäntin, d'Yongeza, uf Kapstadt bringe wüu si dert hett müesse e Pflanze go bestimme und Probe hole. Das heisst: i bi s'erschte Mou hie Outo gfahre! ;-) Lingi Sitte fahre, rächti Sitte hocke, Schaute uf der angere Sitte, angeri Verchehrsregle, es Uni Outo, i ha der Wäg nid gwüsst womer hei häre müesse und d'Yongeza ou nid, si cha ou nid Charteläse...no Froge? ;-) Zämefassend chame säge: mir hei üs zwor ufem Häre- und em Rückwäg verfahre, aber nur wiui uf d'Yongeza glost ha. De hani de das ufgäh, säuber Charte gläse und uf d'Signau und aus gluegt, und es isch guet cho ;-) Nur simer vergäbe uf Kapstadt gfahre wiu niemer dert gsi isch wo ihre die Pflanze hätt söue zeige (i ha se de no 100 Mou gfrogt öb si aus organisiert heig – „jojo“ hetts de gheisse...). Es wär jo no nid so schlimm gsi, wenns nid in Schtröme gschiffet hätt! De hätt me wenigschtens no die schöni Gägend chli chönne gniesse (mir si zum Rhodes Memorial ufe – dert bini mit der Karin scho Mou gsi. Me hett e super Sicht uf Kapstadt – oder me HÄTT, wenns schön Wätter wär...). Mir hei de glich es paar Fottis gmacht, es Kafi trunke und si wider hei.

No öppis: I liebe Outofahre! Mues jezz unbedingt umeluege für zum eis choufe....

Es isch mega viu Verchehr gsi ufem Heiwäg wiu morn anschiinend e Fiirtag isch und d'Lütt frei hei und drum hütt früecher hei si. Und am Zischti isch ou frei. Und ziemlech aui mache d'Brügg, auso am Mänti ou frei...Auso, i weiss jo nid, wenn dasi au die Paper söu schriibe wenn immer frei isch! ;-) Und de bini no imne Kurs nächscht und übernächscht Wuche je 2 Tag... Chunnt scho guet! Nur nid lo stresse! ;-) (mit angerne Wort: i wirde nid au die Tag frei mache womer frei hätte...)

Jezz machi de mou gmüetlech Znacht und denn lisi dänkt no chli Paper und so Sache.

Cheers!

Übrigens: ir Yongeza ihri Hoor si nid ächt. Si hett ihri ganz noch am Chopf zöpflet und de e Perügge irgendwie drüber agmacht. Me gseht do auerlei für krassi Frisure und Hoor generell! ;-)

Schwümme

Am Sunnti isch de nüt worde mit Schwümme, wiui kei Badchappe gha ha und me eini brucht. De bini haut – eher widerwiuig – go seckle. I bi richtig Jonkershoek (oder wieme das schribt) gsecklet. Do geit vo mim Huus grad e Stross i die Richtig, anstatt richtig Stadt gohni richtig Wyybärge und Wiudniss, so z'säge. Dert hetts ar Stross noche so wienes separats Wägli wo viu Lütt gö go seckle und bike und so. Es geit zersch e rächte Hoger z'düruf, und de eifach so chli ide Höger witter, schön a Räbe und so verbii. Extrem idyllisch auso (wenn nid die ganz Zyt würde Outo a eim verbii fahre – aber henu, immerhin isches sicher)!

der Wäg Richtig Jonkershoek Nature Reserve

I bi im ganze e Schtung gsecklet. De bini hei go dusche und chli läse und so. Aber de ischmer längwiilig worde, und de hani mi parat gmacht fürnes Velotüürli. Der Michael hett mer de ou no grad s'Velo nomou chli meh pumpet (wow, es louft jezz wiene Ragete!!). Är macht übrigens Triathlon – und ig bi jo ou chli i die Richtig am trainiere. Noni ganz ärnschthaft, aber was noch nicht ist... Wius so schön gsi isch am morge derte bini nomou am gliche Ort mitem Velo häre, nur chli witter dasmou. Und i ha es paar Fötteli gmacht vom Velo us. Woni hei cho bi isch ou scho wider dunku worde. De hani de znacht gmacht und süsch nümm viu.

Am Mänti hani wider i Stolle müesse/dörfe. Ha nur chli Paper gläse die meischti Zyt, und de isch es e-mail cho: scho wider es Manuskript mit Major Revisions abglehnt (aber mit Möglechkeit zum wider-ireiche, was scho mou positiv isch)! Aus hätti im Momänt nüt angers z'tue aus Manuskript z'überarbeite! D'Kommentär si aber durchus positiv usgfaue, auso i ha Hoffnige. Und es isch auso bimne guete Journal igreicht gsi (Journal of Ecology)... mir wärdes gseh.

d'Ussicht usem Büro

Am Obe hani de dänkt, i wöu mou chli öppis für mini Müskeli tue. De bini ines Weight Workout, auso so mit viu Gwicht und grosse Handtle und so... dä Trainer isch nur die ganz Zyt umegloffe und hett si Körper zur Schou gschtöut anstatt säuber mit z'schwitze! Und de heimer meh oder weniger nur d'Bei und d'Arme trainiert! I bi chli entüscht. Aber immerhin hani überhoupt kei Müeh gha mit de Beiüebige, wo de angeri scho lang nümm hei möge ;-) und hütt hani ou fasch kei Muskukater (vernachlässigbar). I bi ou no schnäu go Shoppe am Mittag und ha mer doch no es Badchleid gleischtet (öppe s'einzige wos gha hett! So unsexy, aber haut praktisch...) und e Badchappe (no viu unsexiger aus s'Badchleid, aber notwändig).

Hütt Mittag bini mit der Di use ines chlises Pärkli grad vorem Huus go ässe, und de hett si mer so mini Kamäleon zeigt! Die si auso sooo härzig!!! Und so farbig! Wunderschön... mir hei 2 gfunge, und i bi de nomou schnäu use zum eis go föttele (has fasch nümm gfunge – die Cheibe si scho guet tarnet!).

Hütt nach der Uni hani de ou ändlech id Badi chönne (mit Badchappe UND Badchleid)! Bi scho fasch chli schtouz, dasis ändlech gschafft ha. Ha de ou nur mini Kontaktlinse vergässe und haut de nüt gseh ir Badi. Aber iisi! S'Schwümme hett guet toh, ou weni nur chli lenger aus e haub Schtung Zyt gha ha. Ha nähr no müesse go ichoufe wiui meh oder weniger nüt z'Ässe meh im Chüeuschrank gha ha. I hamer de es Sushi-Plättli zum Znacht gleischtet (mmmhhh!!) und ou süsch so feins Züg kouft wie Springbock-Wurscht.

Nächer hani es Skype-date gha mit der Emilie und chli Klatsch und Tratsch ustuschet übere Teich. Immer wider amüsant!! ;-)

Und jezz isch ou scho bau wider Zyt für is Bett!

Braai

Ha fasch vergässe, öich z'update ;-)

Am Fritti hani s'erscht mou wider skype brucht sitti hie bi. Auso, es geit ;-) Nei, i ha eigentlech dänkt, es bruchi meh Datemängi für das, aber es isch nid so schlimm so lang dasi nid Videoskype. Aber das chani de vilech sogar ou weni ar Uni e Compi ha.

Süsch hani am Fritti Obe nüt me gross gmacht.

Am Samschti morge hetts Näbu gha, ziemlech dicht, aber nid ganz am Bode noche (auso so chli Hochnäbu-artig). De hani ändlech es Review gschribe woni scho lang hätt söue (auso, i has no vor der Deadline igreicht, das de scho...), auso mit angerne Wort: i ha gschaffet! Ume Mittag ume bini de go es bessers Veloschloss choufe und ha wöue fürnes Badchleid luege. I de Läde heisi mer de gseit, si heige scho uf Wintersaison umgschteut und drum nümm so Badchleid Sache! WHAT?! Nun denn, mues vilech amne angere Ort no go luege. Oder ufe Summer warte! Oder ohni Badchleid go schwümme!? ;-)

Denn bini go Fleisch und „drinks“ choufe für ne Abschiedsparty am Obe vor Michelle und em Andrew. Die zwöi si vor USA und hei ihre Master hie gmacht, und si reise äbe am Mäntig zrugg. I ha zum erschte Mou wider Savanna dry kouft sitti hie bi! Mmmmhhh... für aui wo das no nie gha hei (auso, das wäre warschinlech aui wo no nie im südleche Afrika gsi si): dir müesst das unbedingt cho probiere! I ha de ou nid chönne widerschtoh woni deheim acho bi vom Ichoufe und ha eis müesse tütsche... Nähr hani no mis Review fertig gschribe und abgschickt ;-)

Und nähr isch ou scho Zyt gsi für mi ufe Wäg ad Party z'mache. Mir hei brätlet, was me hie es „Braai“ nennt. Es si rächt viu Lütt cho, und i ha ou mit paarne nätti Ungerhautige gha. Und es isch ou süsch es glungnigs Fescht gsi!

Carla, Michelle und ig

D'Carla isch ou cho, und si hett jo e Töff. Mir hei de so chli über Töffe und so gredt, und de hett si mer zeigt, wie sechs so afüeut, uf somne Töff z'hocke (aso, nid hinge druff, sonders aus Fahrer – sprich mir hei eifach troche-Üebige gmacht, so z'säge). Momou du...!!!! ;-) Leider isch z'dunku gsi für Fötteli...

I bi de eini vo de letschte gsi, wo hei isch (und die einzigi, wo mitem Velo cho isch!!). I ha de zersch no chli ghoufe ufruume, und wie die zwöi wo s'Fescht organisiert hei jo am Mäntig abreise, heimer de die übrigblibene Getränk und so no „müesse“ ufteile zum heinäh. I ha e gueti Fläsche Wyy „müesse“ heinäh. Jezz muesi nur no e guete Alass finge zum dä trinke.

Zum heifahre hett mi de es Outo begleitet, dasi sicher hei cho bi ;-) Si si die ganzi Strecki hinger mir gfahre, so z'säge persönlechi Bodyguards! Das isch es Päärli gsi, die wohne öppe 5 Minute vo mir wäg. Sie heisst Nicola und hett mi scho „kennt“, vor Literatur woni publiziert ha. Und si isch mou amne Vortrag gsi vo mir anere Tagig. Jezz bini auso doch langsam berüemt! :-D

Der Stev chunnt jezz no ab und zue verbii, eifach zum chli bi mir inne z'penne. Jezz ischer emu ou grad wider do, aber gli muesi ne useschiesse. Wott hütt mou s'Schwümmbad go usteschte (trotzdäm dasi keis Badchleid gfunge ha...), und das hett äbe hütt ersch am 10ni offe (das wär jezz).

Manderinli

Sodeli, es isch wider e wittere sehr heisse, wunderschöne Tag hie! I gloube es isch über 30 Grad, wie die letschte paar Täg ou scho.

Geschter Morge isch mi d'Di wider cho abhole für d'Konferänz – ha de gmerkt dass die Lokalität ganz nach vo mim Huus gsi wär ;-) henu, chani jo nid wüsse ;-)

I ha de der ganz Morge imne abdunklete, abeküehlete Sau verbrocht und Vorträg zueglost. Hett auso zum Teil sehr interessants Züg debii gha! Die si do z'Südafrika scho einiges witter aus mir z'Europa oder ou die ir USA was invasivi Arte und dere ihri Bekämpfig etc ageit! E perfekte Ort für mi zum viu nöis derzue lehre (brueflech und privat, abgseh dervo)!

Irgendwenn hetts wider so Sandwichli gäh zum Zmittag, und de heimer nur no wenigi Vortreg glost und de entschide, jezz z'goh. I bi sehr froh gsi hett d'Di das beschlosse, wiu ig ha jo mini Gym Membership und ha no so viu Sache wöue usprobiere! Es hett no viu Gruppekurse woni eifach mou wett verbii luege (wie so Chraft-Sache, Step, Yoga etc... ou viu woni kei Ahnig ha wases isch). Und schwümme wetti ou gli widermou!

Ehjo, i bi de vom Institut us mitem Velo hei und go s'Turnzüg hole. I ha no chli gschaffet und bi de uf di 5i mou is Gym. Der Plan vode Kurse wosi abiete isch niene würklech aktuell, und är wächslet offiziell au Wuche (inoffiziell äuä au Tag...), durum bini wider ine meh oder weniger zuefällige gange. Mir hei so mit grosse Sitzbäu irgendwelchi Chraftüebige gmacht. I ha nid mou würklech gschwitzt und bi no lang nid a mimi Gränze cho. Henu, i ha emu öppis gmacht! Und zum Seckle dusse ischs äbe chli warm gsi. Und s'Schwimmbad isch bsetzt gsi vom Schwimmklub...

Hütt morge bini go seckle wos no chüeu gsi isch. I has dasmou bau ufne Schtung gschafft. I troue mi äbe nonid so, eifach irgendnöime düre z'seckle. Wett zersch d'Lag und d'Gägend chli go uschecke befori eifach druflos seckle. Hoffendlech hani das Wuchenänd chli Zyt für das... und hoffendlech isch ou so schön Wätter wie jezz die ganz Wuche!

Nachem seckle hütt morge bini de ad Uni und ha vergäbe ghofft, mi Compi sig scho parat. De hani haut wider amne „öffendleche“ Compi chli gläse und emails beantwortet und so.

So nachem Mittag mou bini ändlech es Veloliecht go choufe! Es isch scho am Tag ziemlech kriminell, uf dene Strosse z'fahre, aber ir Nacht ohni Liecht? Naja! Ha bis jezz immer probiert, ufem Trottoir z'fahre, aber das klappt ou nid immer. Und Fuessgänger gitts jo ou no... Ou chli Läbesmittu bini no go poschte wiui grad dert gsi bi: e grosse Sack vou Manderinli: 6 Rand. Chöit säuber usrächne, wieviu das isch ;-)

I überlege mer ou im Momänt, öbi e chliine Chochhärd mit 2 Platte söu choufe für öppe 100 Rand, de chönnti ou choche. Aber im Momänt isch gloub no grad guet. Isch bau chli warm für no warm z'ässe (usser ir Nacht, de chüeuts jo aube scho abe!), aber me hätt haut scho chli meh Möglechkeite. Eh, i weiss jo ou no gar nid, wie lang dasi hie wohne! Aber im Momänt gfauts mer scho grad sehr – vilech blibi de lenger aus bis im Juli! Bi emu no grad nid so motiviert, öppis angers z'sueche. Und eleini wohne gfaut mer ou no grad so im Momänt (obwou i dänkt ha, das wöui de sicher nid...). Ehjo, mou luege!

Weed conference

Zum Glück machi mir aube keni Plän oder so füre Tag, wiu si würde sicher regumässig übere Huufe gworfe wärde! ;-)

Hütt morge gohni nichts ahnend ad Uni. I hami amne öffentleche Compi installiert und ha agfange es Manuskript z'überarbeite. De chunnt am 10ni sones e-mail, i heig de am 11i e Besprächig mit ere nöie Studäntin und em John und so. ok. Das isch de ou so gsi. Am 12i ume heimer fertig besproche gha, de seit der John so: du, mir hei jo jezz die Konferänz, und eini isch chrank. Chum doch spontan ou und frog eifach die bir Amäudig, öb du ihre Platz chönnsch übernäh. Mir si de 5 Minute später losgfahre und ig bi auso ou a die Konferänz gange. Das heisst, zersch hetts Sandwich gäh zum Zmittag und denn Vortreg der ganz Nomittag, und denn es Znachtässe imne super Restaurant uf emne Wyyguet (Spier – vo dert hani ou scho Wyy heibrocht woni s'erscht mou z'Südafrika gsi bi). Do sägi doch nid nei! Es hett Buffet gäh zum Znacht – i ha Springbock Wurst und 2 Impala Steak gha... mmmmhh! Und natürlech no viu angers, wie Biilage und Dessert und so. I ha bau s'Gfüeu, so guet heigi no nie gässe!

D'Di hett mi überau itgnoh mitem Outo und mi ou wider heigfüehrt und si chunnt mi morn morge ou wider cho abhole (d'Konferänz geit bis am Frittig Mittag...).

Leider hani wäg au dene „Unannähmlechkeite“ nid chönne go trainiere hütt, und morn wirds warschinlech ou grad nüt :-( Und mit läse oder verbessere oder so bini ou nid grad würklech witter cho! I gloube, i wirde ziemlech unvorbereitet i die nächschti Wuche starte.

Aber jedefaus hani – gloub – die erschte „Fründschafte“ gschlosse, mit der Di und der Carla. D'Carla isch vo Portugal aber no bis im Septämber hie. D'Di isch äbe i mim Büro (das hani gloub ou scho erwähnt) und si isch ursprünglech vo Zimbabwe, aber scho mängs Johr z'Südafrika. Mou luege!

Aues in auem wider e sehr erfougriiche und erläbnisvoue Tag! ;-) I bi leider jezz z'müed zum no meh schriibe, aber dasch gloub eh scho s'Wichtigschte gsi.

Cheers!

Gym membership

Voila, letscht Nacht hani nid eleini i mim Bett verbrocht... der Steve hett tatsächlech do übernachtet ;-) (für die wo der geschtrig Blog nid gläse hei oder sech eifach süsch nümm chöi erinnere: der Steve isch d'Chatz vor Christine).

I has ändlech gschafft, Fötteli ufe z'lade, aber leider hani der Fötteler nid debii zum mou chli meh Fötteli vor Landschaft z'mache! Es isch auso würklech so schön, dasi ab und zue fasch mues ahaute bim seckle nur zum die schöne Bärge und die coole Böim z'beschtuune! Eh, i bringes de sicher mou fertig, vilech am Wuchenänd oder so. Mou luege.

Jo auso, da i jo jezz es Velo ha bini s'erschte Mou aktiv uf dene südafrikanische Strosse umegfahre. Linksverchehr. Und Velo (sowie Fuessgänger) hei hie nüt z'säge uf der Stross. Chasch froh si wenn si di nid grad überfahre. Vo Rücksicht kei Spuur! Eh i has emu id Stadt füre gschafft ohni überfahre z'wärde – und uf der fausche Spuur bini ou no nie gsi. Guet, me mues do vilech säge, wenns kritisch worde isch mit Abbiege und so, de bini eifach ab der Stross, ufs Trottoir (wenns eis gha hett) oder so ;-) Glücklecherwiis hett no niemer mis Velo klauet! Yeah! Ha chli bibberet wonis vor der Bank abgschteut ha...

Ir Bank hani de es Konto eröffnet dass si mer vor Uni ändlech chönnte e erschte Teil vom wouverdiente Lohn überwiise. Es isch aus sowitt riibigsloos gange! De bini ad Uni aune wider es paar Sache go organisiere, und i ha mit dere vom International Office (Lidia heisst si) no gschnäu es Schwätzli ghaute. Nachdämi de aus sowitt organisiert ha, hani chli Paper gläse und e-mails checket (es Manuskript womer scho laaaang igreicht hei gha - der Sven, der Tim und ig - isch mit Major Revisions zrugg cho. Immerhin... aber jezz heissts id Seck!).

Ume Mittag ume bini de is Fitnesscenter (Gym) vor Uni go es Jahresabi löse und de hei go seckle. D'Bäch vo Schweiss si mer nur so abegloffe! Es isch ou rächt heiss und extrem sunnig gsi. De hani chli öppis Salatigs zämebrauet und gässe und denn bini wider hinger die Paper. Am haubi 3 ume isch de nomou ir Christine ihre ex-Maa cho für die einti Lampe no z'flicke. Nach ere haube Ewigkeit probiere hetter emu das de härebecho. Jezz geit aus, aui Lampene dinne und dusse, s'Warmwasser, etc etc (was wär süsch no gsi ? ;-)). Wunderbar (oder wonderbra, je nachdäm). I bi de no es paar Sache i Lade go hole woni unbedingt brucht ha, wie zum Bischpiu e Führazünder für mini Warmwasser-Gas-Installation jewils i Gang z'setze. Denn bini is Gym (schliesslech hani jezz e Membership!!) und bi eifach chli go luege, wases so hett. I ha eigentlech is Step wöue, ha das aber nid gfunge. De bini eifach i süsch sone Gruppekurs. Dä hett irgendwie „Boser“ gheisse und hett mer extrem gfaue! I go sicher widermou. Es Schwümmbad hetts ou dert im Gym, und so Chräftelizügs und äbe Gruppekurse wie Aerobics, Yoga, Ballett und so ;-)

Es windet grad sehr fescht dusse. D'Nächt si ou immer (usser die erschti) sehr chaut gsi – aber i ha jo jezz mis warme Bettzüg vor Christine! ;-) Oh wie schön me's doch hett!

Erste Arbeitstag

Mir hei hütt nid am Morge am 9ni, sondern am Nomittag am 3 Lab Meeting gha. Ha do chli öppis verwächslet ;-) Defür hani hütt viu angers no chönne organisiere am Morge. I ha zum Bischpiu mi anger supervisor zum erschte Mou troffe, der John. Är isch ou ganz nätt, aber schiint mer chli meh seriös , oder ärnscht, aus der Dave (der Dave isch auso super seriös, aber är macht haut ab und zue no es Witzli und so. Der John bis jezz weniger – aber kenne ne ou ersch sitt paar Schtung!). Ha ou die angere Lütt vo mim Büro zum erschte Mou troffe. Das wäre d'Brigitte vo Basel, aber sitt laaaanger Zyt scho nümm dert wohnhaft (zersch UK, denn Südafrika). Si hett mer scho im Vorfäud sehr hiufriichi e-mails gschribe und gäng ghoufe wo si cha – und si redt sehr gärn und viu. Wie die angere 2 heisse bini jezz grad nümm sicher, aber das fingi de scho use.

I bi ou no is International Office und zu de verschidene Sekretärine, Assistäntine und süsch wichtige Lütt i mim Afangs-Stadium, und die aui schiine mer mi Ufenthaut so eifach und guet wie möglech wöue z'mache. Jede hett mer grad aui administrative Sache abgnoh und i ha mi bis jezz um fasch nüt säuber müesse kümmere! E Compi hani ou scho uf mim Arbeitsplatz, obwou me normalerwiis Wuchelang uf eine mues warte. I hami ou scho grad fürne Kurs agmäudet (Spacial Distribution Modelling oder so) wo afang Mai stattfindet. Und der Dave wett unbedingt das ig e „grossi Roue“ schpile amne Meeting afangs Ouguscht über Risk Assessment. I bi auso scho vou integriert bi de Uni und Forschigs Sache! I gloube, die erwarte chli viu... aber das chunnt scho guet! ;-)

Der Dave und der John si übrigens mini erschti offizielli Arbeitswuche fasch nie ume, drum chani mi eifach chli „organisiere und iläse“, hei si gmeint. I ha jo jezz es Johr lang z'Colorado uf völlig emne angere Gebiet gschaffet und go jezz wider zrugg zum däm (oder öppis ähnlecherem) woni i mire Doktorarbeit gmacht ha. Es geit jezz auso wider zrugg zu impact vo aliens. I fröi mi scho druf!!

Nachem erschte Tag ar Uni (i bi jezz regischtriert und aus) bini de no go luege wägemne Bike. Es hett im Lade wo mer empfohle worde isch keni bruchte Velos me gha (d'Studänte choufe anschiinend aube afangs Semester aui und verchoufe se am Ändi wider), durum hani jezz das vor Vermieterin abkouft (das heisst, i has noni zaut, aber scho übercho ;-)). De bini ou no spontanerwiis zum Znacht iglade worde vor Christine und em Michael (ihrem Fründ äbe) und ha ou no offiziell ihri 2 Buebe kenneglehrt, der eint 15ni der anger gli 13ni. Die ganzi Familie isch super lieb und härzig und mir hei chli meh überenang erfahre. Und s'Ässe isch super gsi... und der Wyy natürlech ou ;-) Der Michael schaffet bire Wyyhandlig (oder so – isch äuä eher Manager vo eire ;-)) und vo dert heimer e guete Cabernet Sovignon (oder wieme das schribt) trunke.

Si hei mer de ouno Bettdechi und Azüg und aus organisiert, und e „chli e bessere“ Schtueu zum Schaffe oder eifach plegere (auso, e mega coole aute Sässu). Es si würklech au so hiufsbereit me gloubts fasch nid! Aber es isch scho sehr schön, weme sech nid grad um jedes Ding säuber mues kümmere... Mir (oder besser: ig) mache de derfür mou es Fondue, heimer gseit ;-)

Am Samschti bini no are Abschiedsparty iglade vo 2ne vo Kalifornie wo hie ihre Master gmacht hei. Das wird sicher ou wider luschtig!

Und jezz muesi dänk de mou Fötteli ufelade... aber ha äbe no gar nid viu gmacht...

Und d'Busle (der Steve) wott äuä hütt bi mir schlofe...;-)

Wiukommens Party

Auso, i ha jezz e südafrikanischi Natelnummere und Internet Zuegang. Bim erschte mou surfe im Internet hani bereits öppe e zähtu vo mire prepaid Datemängi brucht. Super, nid? Und i ha nid mou es Fiumli oder so abeglade. Isch auso huere tüür hie, so Internet und Natel Zügs.

Aber jezz zum geschtrige Obe. I bi jo wie gseit vom Dave abghout worde uf die haube sächse. Mir si de zur Christy gfahre, sire Assistäntin. Die hett so es cools Huus! Riesig... Es si sehr viu vo mim Institut (CIB – Centre for Invasion Biology) cho, unger angerem eini woni mitere s'Büro teile. Si heisst Di (oder so) und isch vo Zimbabwe, isch aber wyss und blond. Es hett no paar angeri am Insti vo Zimbabwe (öppe 3), aber die si dunkuhüttig. Es hett ganz viu liebi und sympatischi Lütt derte wome sicher eifach mitne cha uscho ;-) Es hett ou serigi, wo eim nid so passe, aber dasch jo gäng so.

Es isch übrigens jezz sibni und schtockdunku! Und es isch grad der Ex-Maa vo mire Vermieterin cho s'Heisswasser installiere (yeah! Morn die erschti warmi Duschi!!) und es paar Birne wächsle dasi ou dusse Liecht ha weni aube im dunkle hei chume (was äuä meischtens der Fau isch wius jo so gli scho dunku wird!). Der Sven (so heisst der Ex) hett mer de ou sini Nummere gäh für wenn mou öppis wär. Är würd mir gärn häufe, hetter gseit (aber mit sire Ex ischer warschinlech nümm so befründet...). Är hett äbe der Warmwasser-Macher (mit Gas – e sehr intressanti Installation!) und s'Elektrische aus säuber installiert und äuä sogar die ganzi Wohnig säuber usbout. Es isch luschtig wie sehr der Christine (mire Vermieterin) ihre jetzig Fründ und der Ex-Maa genaui Gägeteil z'sii schiine. Der eint sone gschnigleti Sportskannone und der anger sone Badboy ;-) Aber beidi ganz nätt! Und: non of my business! ;-)

Ok, zrugg zur Party. Es hett sehr viu guets z'Ässe gäh und jede hett chli öppis brocht. I ha eifach Schoggi vor Schwizz brocht wiui jo grad ersch acho bi und ou kei Chuchi ha zum richtig choche. Die isch auso sehr guet acho ;-) Obwou die meischte hei die natürlech scho kennt – d'Abteilig isch sehr internationau. Und me cha Lindt Schoggi ou hie choufe, wie äuä öppe überau uf der Wäut.

Ou Wyy hetts wider viu gäh und super guete no derzue! Und me faut auso bau uf weme nid so viu – auso nur es paar Glesli – trinkt ;-)

Mi hett de d'Di heitoh und i wär fasch no i Usgang. Aber i bi auso scho sehr müed gsi und es isch ou scho 11i gsi... und niemer hett so rächt gwüsst, öb si de ou würklech wei go. De bini haut hei.

Es isch e chauti Nacht gsi – und da jo nüt isoliert und nüt gheitzt isch isch ou dinne rächt chaut gsi. Und i ha jo nur mi Schlofsack! Aber es isch gange, bi nid verfrohre oder so ;-)

Ou düre Tag dür hütt isch meischtens bewöukt gsi, usser es paar Schtung wunderschöni warmi Sunne. I bi de am Morge id Stadt füre zum erschte Mou! Ha wöue e Velolade sueche (obwou dä am Sunnti nid offe hett), hane aber nid gfunge. De bini is Stadtzentrum is Ichoufszenter (Eikestad Mall) go sone Stick choufe wome is Internet cha dermit über s'Handynetz und e SIM-Charte für s'Natel. Jezz bini ziemlech usgrüschtet, usser Velo (aber do chönnti das vor Christine abchoufe für 1000 ZAR = ca. 120 CHF – wott aber zersch no chli umeluege was für angeri Agebot ufem Markt si) und Outo (hani ou scho vilech eis in Ussicht).

Ufem Heiwäg hani e Abstächer gmacht i Botanisch Garte vor Uni Stellenbosch. Dä isch rächt chlii, aber somit ou grad wider härzig! Deheim hani s'Internet usteschtet und chli gläse – nüt wäutbewegends...

Hütt Obe blibi zur Abwächslig mou deheim. Es isch jo eh scho dunku und Sunnti und morn muesi schaffe. Mir hei grad Lab Meeting am 9ni, de wotti nid scho so versifft usgseh! ;-)

ersti Nacht ufe 14.4.2012

S'Wätter hie isch extrem variabu. Hütt isch bewöukt und es gseht us aus chönnts jederzyt cho rägne. Geschter gäge Obe hetts scho chli zueto gha, aber es isch glich immer no sehr warm, d.h. i cha imne churze Röckli und churze T-shirt umeloufe und geschter zum Znacht simer dusse ghocket und i ha nie müesse s'Jäggli alegge. I bi schlussändlech nümm go ichoufe geschter Nomittag und ha derfür so es paar Infobroschürene gläse woni vor Uni becho ha. Am 6i ume isch mi de der Dave cho abhole für zum Znacht ässe. Mir si nach Frenschhoek (oder so) gfahre – dasch es Dörfli öppe e haub Schtung wäg mitem Outo und es isch aube e französischi Kolonie gsi. Es isch ou bi Tourischte sehr beliebt. Mir si id Petite Ferme go ässe, dasch es Wyyguet. Der Dave hett vorreserviert gha, es hett no e Band gschpiut wo är kennt hett. Der Petr isch ou mitcho, und im Dave sini Frou (weisi nümm wie si heisst...) und no es paar Kollege vo ihne ;-) Der Sohn (13ni, heisst Sean oder so) isch nid mitcho, aber dä lehri de schono kenne hei si gseit. Do füeut me sich scho grad sehr wiukomme wenn me sogar a so Aläss mitgnoh wird!

Für je 2 Persone hetts de jewils e Fläsche Wyy gäh, und bevor dasmer agfange hei, dä trinke, heimer no es Bierli tütscht, der Dave, der Petr und ig (die 2 Herre hei übrigens beid Johrgang 58, für die wos intressiert). Und denn irgendwie 2 Fläsche Rotwyy z'dritte (die angere hei angere Wyy trunke). Isch auso aus sehr guet gsi, ou s'Ässe, Vorschpiis, Houptschpiis und Dessert ;-) I hami ou grad guet verschtange mit em Dave sire Frou (si hett grad Chemo gha und drum fasch ke Hoor, und die ou nur raschpuchurz) und ihrne Kollege. Und die Landschaft! Auso öppis vom wunderprächtigschte woder öich chöit vorschteue!

Öppe am 11i ume simer de hei cho und i ha de ou grad gli und guet gschlofe i mim nöie Bett (im Schlofsack, wou verschtange). Hütt am morge bini de zum erschte Mou go seckle. I hami scho chli igschränkt gfüeut wius haut do trotz auem nid so sicher isch wie z'Fort Collins oder z'Bettehuuse. Und i kenne jo no gar nüt! Bi no gar nid wäg cho vo mim Huus usser wenn mi öpper mitem Outo abghout hett! Eh jedefaus isch das keis Problem gsi, und i bi de is Jan Marais Nature Reserve go seckle. Dert hetts viu cooli Pflanze gha und es paar Guinea Hüener (schwarz mit wysse Pünktli und e blaue Chopf). I ha ou es paar schöni Fädere gfunge und zersch wöue heinäh, de hani dänkt, dasi serigi warschinlech jezz jede Tag finge und ha se lo sii. I bi öppe 35-40 Minute go seckle aber viu müeder gsi weder ir Schwizz nachere Schtung! Ha ou viu meh gschwitzt aus süsch... Isch haut scho angeri Luft und i mues mi zersch as Klima gwöhne. Aber es hett sehr guet toh, sech widermou z'bewege.

(jezz gsehni übrigens grad e Ibis i üsem Garte vo mim Fänschter us – zum Föttele bini nid gnue schnäu gsi wiu eine vode Hüng plötzlech uftoucht isch...)

I ha de nachem seckle e zwöiti chauti Duschi gnoh und hami parat gmacht zum doch no go ichoufe. Öppe 10 Minute z'Fuess vo do hetts so es paar Läde und ou e Spar Supermarkt. Nachdäm i aus chli uschecket ha bini de dert es paar Läbesmittu und Toiletteatiku go choufe für öppe 300 ZAR (öppe 36 CHF). I sött auso das Wuchenänd chönne überläbe ;-) Ok, vilech ou nid, wiu Internet han ging no keis. Und e SIM Charte für s'Natel ou nid, wiui für die no bestimmti Bestätigunge bruche vor Uni und so... aber es chunnt guet! Und i bi jo schliesslech ou ersch chli meh aus ei Tag do.

I zwöi Schtung wirdi scho wider abghout für ane Party vo mire Abteilig. I gloube i luege jezz no chli Southpark wo mer de Bue uf d' Feschtplatte glade hett anstatt id Stadt z'stresse und e sone Stick fürs Internet z'sueche. So es paar Tag ohni Internet tuet mir nämlech ou mou guet!

Akunft in Stellenbosch am Fritti, der 13.

I bi hütt morge am achti z'Kapstadt acho. Im Flüger ab London hani näbere ganz nätte Lehrerin vo Portugal (aber ursprünglech Mosanbique) dörfe hocke wo jezz bis im Dezämber z'Kapstadt Schueu gitt. Si isch mer scho am Flughafe ufgfaue wiu si so lieb usgseh hett und i ha de ghofft, i chönn näb ihre hocke – et voila! Der Zuefau hetts so wöue... mir hei de die ganz Zyt (usser denn womer gschlofe hei) zäme gredt und de d'Nummere und e-mail ustuschet. Sie chunnt de vilech mou nach Stellenbosch cho feschte oder i go zu ihre nach Kapstadt.

Z'Kapstadt am Flughafe hett mi de e nätte junge Typ abghout wo aber fasch nüt gredt hett. I ha ihm auso soz'säge d'Würm us der Nase müesse zieh! Ufem Wäg vom Flughafe hani scho Gnu und irgendwelchi Böckli gseh. Gloube nid, dass die wiud gsi si, aber es gheg hani emu ou nid gseh... Mi Schofföör hett mi de grad bi mire Wohnig abgliferet, wo die sehr liebi und hiufsbereiti Vermieterin scho hett gwartet. Si hett mer de grad ghoufe Sache inezügle und hett no chli Züg vo hrem Huus übere brocht woni nid gha ha – ou e chli z'trinke und z'ässe hett si mer no übere brocht! Würklech sehr nätt...

De hani afe iiruhme und dekoriere und so, und de hett ou scho der Dave (mi Chef) ar Christine (mini Vermieterin) aglütte um abzmache für mit mir Zmittag z'ässe. I ha gmeint är sig nid mau ume, aber so ischs mir natürlech ou rächt gsi! D'Christine hett mi de ou grad dert zum Restaurant brocht wo der Dave und der Petr (e Prof. vo Tschechie woni ou kenne und wo dick mitem Dave befründet isch) scho gwartet hei. Mir heis super luschtig gha, ei Schpruch nachem angere klöpft ;-) und zmittag gässe. Mi Chef der Dave isch e mega nätte! Är isch ou sehr hiufsbereit und es macht Spass, mit ihm z'rede und diskutiere. Wenn s'Schaffe mit ihm ou so agnähm isch de wird das eis riese Vergnüege do!

Mi anger Chef, der John, isch no grad nid do bis morn oder so.

Nochem Ässe simer zum Dave sim Büro go mini 4 Päckli hole woni diräkt vo Amerika gschickt ha – es isch aus heil acho – und der Dave hett mi hei gfahre. Auso längwiilig isch mer bis jezz noni worde ;-)

I mues säge, mis Studio-Zimmer gseht ou scho extrem wohnlech us! Vor auem weme bedänkt dasi grad mou vor öppe 7 Schtung izoge bi... ha sogar scho Biuder ufghänkt! Und d'Chatz vor Christine isch ou grad bi mir izoge. Är heisst Steve und hett blaui Ouge ;-) Es hett ou 2 Hünd ufem Awäse woni nümm weiss, wie si heisse, aber i nenne se jezz mou Flixxi und Flaxxi. Eichhörnli hetts ou es paar ide Böim rundume und ganz viu Vögu! Töu töne so aus würde si eim nochepfiiffe – würklech genau so wie wenn e Mönsch würd pfiiffe! I ha notürlech kei Ahnig, was das so für Tierlis chönnte sii...aber es tönt emu bau wie inme Zoo rundume. Und grüen isches überau und schön farbigi Blüete hetts ou! Und d'Bärge si grad rundume, aber nid gnue Nöch für dass si eim d'Sunne würde näh. I gseh se sogar fasch vo mim Zimmer us...

Es hett scho Sache, wo chli speziell si. I ha weder e Lüftig (auso Ventilator) no e Heizig i mim Wohnigli. Im Momänt isch grad über 30 Grad dusse und ide Wohnig no wermer. D'Fenschter si zum Teil verbroche, und i ha es Gitter aus zwöiti Tüüre. Zum Badfenschter ine wachst Efeu, me chas somit ou nid ganz zuetue. Es isch aus so zämegflickt und lotteret. Wie s'Warmwasser mache (das wär mit Gas) heimer noni usegfunge – mini erschti Duschi isch auso chaut gsi (aber d'Christine hätt mer auso ahbotte gha, i chönn übere i ihres Huus cho dusche weni wöu. Es isch aber so heiss im Momänt dases e nätti Abchüelig gsi isch). Im einte Schrank wo Gschirr ine würd ghöre hetts so drüü chliini Chäfer gha. E Chochhärd hetts nid, nur e Wasserchocher wo si mer no vo ihrem Huus brocht hei, e Mikrowäue und e Chüeuschrank. Wäsche muesi ire öffentleche Wäscherei. Weme s'WC schpüeut isch überschwappigs Gfahr weme der Techu nid druf tuet. Und und und... aber HEEEYYY!!! I bi do schliesslech z'Afrika! Und ig bi jo nid vor auem hie, für zum ir Wohnig umehocke, oder? ;-)

Go jogge und bike und so chame hie ohni Problem hett mer d'Christine gseit. Si geit ou gäng. Si hett mer eifach uf der Charte zeigt, wo dass die nid so sichere Gebiet si und dert sötti eifach nid eleini häre. Si hett mer ou es Velo abotte woni chönnt bruche und ihre zahle fauses gschtole wird (was anschiinend duurend passiert!) oder s'ihre grad abchoufe für öppe 1000 ZAR.

I ha eigentlech hütt nomittag no wöue go e SIM Charte für s'Natel choufe und e sone Sick für is Internet. Aber i wirde scho ire Schtung vom Dave wider abghout für zum go Znacht ässe und sones Konzärt z'lose! Vilech loufi de glich no gschnäu zum Lade und choufe es paar notwändigi Sache, wo wie zum Bischpiu WC-Papier (das vor Christine längt nämlech warschinlech nid ewig) ;-) Und natürlech so Makeup Sache und so, süsch chani jo nid usem Huus! Eh nei, dasch natürlech nur e Witz gsi... haha!

D'Musig wo do im Radio louft isch irgendwie vom letschte Johrtuusig. Aber i ha jo zum Glück no mi iPod!

Aaausooo, i go gloub schnäu mou chli uf Wanderschaft... mou luege öbi dä Lade finge! ;-)