Stanford

Es isch Sunnti Obe am achti und i bi öppe vor 2 Schtung vomne super Wuchenänd in Stanford zrugg cho und ha jezz grad fertig Znacht gnoh.

Am Zischti bini jo äbe mit der Nicola is Kino und vorhär go Pizza ässe. D'Pizza isch guet gsi, hett nur chli Gwürz brucht, und bim Fium bini am Afang chli ignickt, aber wo de chli meh d'Poscht abgange isch hanis de scho wider mit übercho. Bi d'Avengers go luege. Dä ganz Obe, inklusive Pizza, es Glad Wyy und Kino hett mi übrigend 90 Rand koschtet (s'Kinoticket 20 Rand) – nur so aus Verglich zu deheim: ir Schwizz hätts äuä öppe soviu Schwitzerfranke koschtet... Öppe am 11i bini de deheim gsi, und de isch der Dave no ufne heissi Schoggi und es Schwätzli verbii cho.

Am Mittwuch morge bini am 5i ufgwacht, und go seckle am 6i. Am Sibni hani de duschet und am achti bini im Büro gsi und ha afo schaffe. Öppe am 5i bini hei go s'Turnzüg hole und bi de uf die 6i is Yoga. Es isch viu schwiriger gsi weder s'erschte mou, aber i ha ou süsch scho chli es Handicap gha wiui so Rüggeweh gha ha a däm Tag. Am Donnschti hani widermou chli früecher afo schaffe, so um die sibni ume. Am Nomittag bini de es Outo go aluege, und mitem Velo dür haub Stellenbosch düset. De bini wider zrugg is Büro und am 6i hani mi mitem Dave und em Zane – sim 7-monatige Sohn – zumne chline Spaziergang troffe. I ha so nümm möge schaffe und e Pouse hett grad guet toh! De wider is Büro, und am 8i isch mi der Mike – dä womer hiuft Outo finge – cho abhole zum „Outo bespräche“. Mir si de ines härzigs Beizli ir Stadt go es Cappuccino trinke und är hett mer 2 Schtung lang aui Optione offegleit und erklärt etc. Isch auso no intressant gsi, weme bedänkt, dases nur um Outo gange isch ;-). I bi de wider zrugg is Büro mis Züg go packe und der Compi abschteue, und de öppe um die 11i ou mou deheim gsi. De hani Packt für s'Wuchenänd und bi gli mou is Bett.

Am Fritti morge bini wider früeh im Büro gsi, wiu am 2i bini de scho hei. Ha zersch no e churzi Pouse gmacht für zum Zmittag ässe mit der Carla und der Di – dene beidne geits grad gar nid guet, natürlech wäg Männer! Aber das chunnt de scho wider... I bi jo so froh hani keis s Gschtürm für einisch ;-)

Es hett ziemlech grob gschiffet ab und zue am Fritti morge, aber der Wätterbricht für s'Wuchenänd hett ziemlech guet usgseh! I bi de äbe öppe am 3 abghout worde vom Dave. Mir hei öppe 2.5 Schtung Fahrt vo Stellenbosch nach Stanford vor üs gha, es hett gschiffet und isch chaut gsi. Z'Stanford acho heimer üs mit sine Kollege ire Bar troffe und afe eis, 2 Bierli/Wyyli trunke. D'Carla (e angeri Carla weder die vo mim Büro) und der Luke si scho dert gsi, der Craigh und d'Karin (si isch ursprünglech vo Schwede) si de chli speter ou cho, und der Osh (vo Israel – isch im 2006 mit sire Boyband 2. worde am Eurovision Song Contest – ohni Scheiss!!) heimer de im Huus vor Carla ihrere Mueter troffe. Si hett das Huus – auso, e riese Villa mit öppe 4 Riese Zimmer, jedes mit Bad... - aus 2. Huus kouft und isch äbe das Wuchenänd grad im angere Huus gsi, de hei mir's chönne bruche. Es isch auso gsi wie imne super Hotel, nur besser! Mir (aso, Carla und Luke) hei ou e Nanny organisiert wo üsi Sache isch cho abwäsche jede Morge (2mou). Das heisst, mir hei zwor kochet, aber nid müesse d'Chuchi mache nächer. D'Bett si ou scho parat gsi und so... Luxus pur! Ou süsch, es wunderschöns Huus! Swimming Pool, schöni Veranda, Braai place, ... und si hei ou e Chüeuschrank vou Drinklis organisiert! Si (Carla und Luke) hei eifach sone Firma agschribe, öb si nid üses Wuchenänd wette sponsere und Drinks gäh zum usprobiere – aus Promotion. Und voila, si hei 75 Fläschli vo 3 verschidene Sorte Spritzer gäh – Wärt öppe 600 Rand. Und mir si 7 Persone gsi, 2 Nächt. Und die si auso guet gsi!!

Am Fritti Obe hett der Luke die beschte Spaghetti kocht mitere super Bolognese-ähnleche Sosse. Mir si eifach chli dusse ghöcklet, hei gässe und trunke und s'luschtig gha. Am Samschti morge si der Luke und der Craigh go surfe, aber süsch hett niemer ufmöge und es isch rägnerisch, chaut und Wäuelos (oder es hett emu kei gueti Wäue gha, heisi gseit) gsi. Mir hei de zum Zmorge wider vo dene super Spaghetti gnoh, und de simer nöime ufne Wyyfarm go Wyy degustiere und 2 Chäsplättli ässe. So heimer der ganz Nomittag verbrocht...;-)

Ufem Wäg zrugg is Huus si d'Karin, der Craigh, der Dave und ig no nöime chli am Strand und de Feuse nochegloffe. Mir hei so Witzli gmacht vo wäge go bade i Ozean, und i ha natürkech unbedingt wöue goh – trotz keim Badtuech, kein Bikini, Dunkuheit und iis-chautem Wasser. Der Craigh und d'Karin heimer de nid chönne überrede, de si haut der Dave und ig elei gange. Gschnäu es chliises Bädli im Ozean zwickle hett no niemerem gschadet! Und hey, für was brucht me scho es Bikini? :-D

Mir hei de d'Heizig chli agschteut im Outo und si de fasch troch im Huus acho – oder ou nid ganz ;-)

Zum Znacht heimer braaiet (grillet) – mega viu Fleisch, Gmües, Härdöpfu etc etc... soo guet gsi! Der Osh und der Luke hei de no es chliises Konzärtli gäh – auso, am Afang hett der Osh eifach es paar Liedli gschpiut ufem Klavier wome kennt, so Adele und so, und i ha eifach spontan aus gäh und mitgsunge. Auso es isch de meh är und ig gsi wo es Konzärtli gäh hei ;-) Aber wo der Luke mit der Gitarre uftoucht isch hani d'Bühni natürlech gruumet – oder so! Hett emu Spass gmacht. Und die Cheibe heis im Griff! (klar, mitemne 2. Platz am Eurovision Song Contest, Osh). Die 2 gäbe äbe no ab und zue Konzärtli zäme. Fröi mi scho uf s'nächschte!

Rugby isch ouno gloffe im Fernseh, und teu Manne heis bau nid chönne lo sii, immer wider inez'seckle zum go luege. Nachem Znacht heimer de Schpili gschpiut, so „30 seconds“ (das hani uf der Insle scho gschpiut gha), Taboo und no es angers. De simer aui gäng wie müeder worde und irgendwie fasch aui ufem Sofa haub igschlofe...klar, nach so viu Wyy, Ässe und angerne drinklis...

Am Sunnti Morge hani der Dave chönne überrede zum chli früecher uf und mit mir go seckle. Mir si e Schtung ungerwägs gsi, aber är mues jo aube no ir Mitti ewigs stretche ;-) Aber es isch so schön Wätter gsi, keis Wöukli und nüt, dasi sogar gschwitzt ha dasmou! Und är hett sech ou chli meh müeh gäh zum chli schneuer seckle aus süsch :-)

De simer hei go zmörgele mit de angere und eifach chli ir Sunne ligge und s'Wätter gniesse! I ha der ganz Tag – usser zum Seckle – keni Schue annegha und es isch gnue warm gsi!

Es hei de irgendwie aui nid so möge viu mache, und mir hei eifach chli gredt und äbe d'Sunne gnosse, und de mou Packt. Öppe am 2 simer de lostuckeret, dasmou der lenger Wäg hei ar Küschte noche. Es isch so wunderschön gsi, s'Wätter hett perfekt mitgschpiut und d'Umgäbig und der Ozean isch natürlech einewäg der Hammer!

Mir hei de es Brötli und Schinke und Chäs und so kouft und si amne Strand go picknicke. Es hett bau niemer gha am Strand, trotz schön warmem Wätter und keim Wöukli! Aber es isch haut Winter, de geit me do nid so use :-D

Am Sächsi bini äbe de deheim gsi und gschnäu go ichoufe dasi öppis Znacht gha ha. Hätt zwor äuä nüt brucht nach au dere Ässerei und trinkerei s'ganze Wuchenänd! ;-) Aber i ha jezz grad für öppe die ganzi Wuche ikouft.

Dir merket vilech, i haute mi hütt extrem knapp. Bi sehr müed und ma eigentlech gar nümm schribe. Go jezz de is Bett...

Auso, bis es angers mou!

Wandere

Am Samschti Obe bini mit der Di, der Carla und 3 angere Kolleginne vor Di anes Konzärt vo „Hot Water“. Dasch e Band vo Kapstadt, wo hie sehr berüemt und beliebt isch und ou z'Europe kennt me se (anschiinend!). Der Sänger hett mer emu verzeut, si göng jezz de uf Europa-Tour und heige ou es Konzärt ir Schwizz nöime amne Openair. Jawoll, i ha mi mitem Sänger agfründet ;-)

Jedefaus isch das Konzärt i öpperem sim Huus gsi ir Schtube! Es hett nur 50 Tickets gha, je 160 Rand. Womer acho si (chli z'schpäät) si aui so uf de Sofas und so ghocket, niemer hett tanzet oder so! D'Carla und ig hei de emu sofort afo tanze und mir hei aus gäh! D'Di isch de ou cho, und mir si laaang die einzige gsi. Aui hei fröid gha a üs ;-) der eint hett es Video träit vom Konzärt, und är hett ir Pouse gmeint, mir müesste meh diräkt vor der Band tanze daser üs besser chönn fiume. Und ou d'Band hett rächt fröid gha das öpper tanzet hett! Und mir hei ei grossi Ego-Party gha derte ;-) I weiss nid würklech, wieme zu dere Musig cha sitze...!? Eh, hie es paar Fottis:

D'Carla, ig und d'Di hätte no witter i Usgang wöue nachem Konzärt wiu das scho am haubi 10ni isch fertig gsi, aber die angere hei hei wöue. De simer haut hei.
Am Sunnti morge hani abgmacht gha mit der Carla und em Chris, e Kolleg vor Di, zum go wandere. I bi de öppe am achti gschnäu 50 Minute go seckle, und de duschet und parat gmacht zum Wandere! Gäg die 10ni isch mi der Chris cho abhole für zum Jonkershoek Nature Reserve ufe. Wär mitem Velo nur öppe 25 Minute gsi, aber i bi jo scho go seckle und ha mi nid wöue überarbeite ;-) Es isch ziemlech chüeu gsi (für hiesigi Verhäutnis) und hett ab und zue chli gnislet, aber mir si glich gange. Für is Nature Reserve hettme 30 Rand Itritt zaut, und mir si de zum Afang vo däm Wanderwäg gfahre wo zu de 2 Wasserfäu geit. Üsi Hose si ziemlech glii düre nass gsi, wiu aui Vegetation mega nass gsi isch womer düre gloffe si, aber es isch mega schön gsi!! Bim erschte Wasserfau hett mer d'Carla es Gedicht vorgläse: „Oh, the places you'll go!“ vom Dr. Seuss. I liebes!! So wohr! I ha nur dänkt, das müesst jede läse und sech z'Härze näh!

Hie es paar Fottis wo d'Carla gmacht hett:

Zrugg bim Outo heimer de chli öppis gässe, und de simer öppe gäg die 2 wider heigfahre (worde). I ha de warm duschet zum mini chaute Bei wider chli ufz'werme... de hani es Teeli trunke und chli gläse, und bi igschlofe ufem Sässu. De hani dänkt, de gohni haut chli is Bett (am 4i am Nomittag!!) und i bi de ufgweckt worde am 6i vom Natel. Der Typ womer hiuft es Outo finge hett aglütte. Är isch e Kolleg vom Dave und heisst Mike. Är hett mer de öppe e Schtung vo Outo verzeut, Vorschleg gmacht und Froge gschteut und beantwortet. Dä weiss aus!! Isch auso nid eifach, do öppis bruchbars z'finge... aber i ha jo Hiuf! ;-)

I ha de Znacht gmacht und Zmittag füre nächscht Tag und bi ou nid auzu schpäät is Bett. Am Mänti bini wie fasch immer die erschti gsi im Büro. Ha de wider aus mögleche und unmögleche erlediget. Am Mänti machi meischtens so administrativs Züg und Sache, wo nid würklech do zu mire Arbeit ghöre, wie Revisions, Sache ireiche, Aträg für Gäud schtöue und so. Am Mittag heimer no ine Vortrag müesse, und am 3 heimer jo aube Lab Meeting am Mänti. Um die haubi 5i bini de gschobe.

I bi zersch is Fitness go schwümme chli meh aus e haub Schtung, de hani mi umzoge zum mit de Giele go seckle. Dasmou isch der Dave und der Ruan und im Ruan sini „Fründin“ oder so cho. Das girl heisst Carolina, isch vo Chile und isch hie uf Bsuech. Isch wider es sehr gmüetlechs Löifli gsi, mit wunderschönem Sunneuntergang!
De wider hei go Znacht mache und chli chille.

Hütt morge hani am 7ni afo schaffe. Wache eifach gäng so früech uf und ha meischtens scho am Morge z'viu Energie ;-) Am 4i bini drum de gange und ha dänkt, i göng vilech wider go seckle. Aber de hani gmerkt, dasi mou wider sött wösche, oder emu d'Wösch bringe. I ha de aus i mi gross Sack gschtopft und bi mit dene 10 Kilo ufem Chopf wider zur Wöscherei gloffe. I bi aube äuä d'Attraktion vom Tag, aber was wotti?

Woni de wider deheim gsi bi hani kei Luscht me gha zum öppis mache. I ha de chli Chipsli gässe und es – FANTA PINEAPPLE – trunke! Das isch der bescht Softdrink wos gitt! Hani so vermisst!! I 10 Minute wirdi ou scho abghout zum go Pizza ässe und is Kino! Go mit der Nicola und ihrem Maa, em Dolf. D'Nicola hani ar Abschlussparty vor Michelle und em Andrew kenneglehrt, und si hett mi scho kennt „vo de Paper“ und hett e Vortrag vo mir are Tagig gseh. Aber das hani gloub scho mou gseit. Jedefaus heimer de beschlosse, mir sötte beschti Fründe si, ou wiumer so nöch wohne ;-) Si isch de ou mou ad Uni cho Zmittag ässe mit mir und der Di, und äbe hütt gömer is Kino.

Hütt oder morn sötti ou no erfahre, öb mis Wuchenänd längwiilig wird, oder öpi wider öppis sehr cools los ha!! Bi jo mou gschpannt... so, und jezz muesi go!

Tanze

Einigi vo öich hei vilech gmerkt, dass d'Abschtäng zwüsche mine Blog-Iiträg immer grösser wärde. Es isch auso nid so, dasi nüt z'schribe und verzöue hätt oder dass aus bereits so Rutine isch dases sech nümm lohnt, drüber z'brichte. Es isch eher so, wie scho im letschte Blog erwähnt: mis Soziauläbe entwicklet sech „z'schnäu“, und i ha eifach schlicht kei Zyt! Isch das nid cool? Ei Monet hie und scho bechumi SMS und Mails fasch jede Tag vo Lütt wo öppis wei mache mitmer ;-) de muesi scho fasch froh si, das 2 vo mine Zeie (Zehen uf Hochdütsch) so verletzt si, dasi fasch nid cha loufe wius so weh tuet – de hani e Entschoudigung für s'Seckle chli z'vernachlässige im Momänt!

Aber jezz wider zum Wichtige. Am Zischti Obe, wo mini Zeie no fasch nüt hei wehtoh, bini widermou zum Gate ufe gsecklet (95 Minute, 16 Kilometer – s'letschte Mou hani 100 Minute brucht!). Es isch eifach immer wider sones cools Gfüeu weme dobe achunnt und de cha umchehre und s'fach vo säuber geit ufem Wäg zrugg! Und de die Bärge und der Sunneungergang und Wyybärge und aus... eifach s'Paradies uf Ärde! D'Bärge färbe sech aube so rot und, ach, es isch eifach so schön! Dir müessts am beschte säuber cho luege.

Am Mittwuch hani mer vorgnoh, s'nid z'übertribe mitem seckle. I bi de am 5i ine Body Toning Schtung im Fitness Center. Wiui de leider no viu z'viu Energie gha ha bini de am 6i i mini erschti Yoga Schtung! I ha immer gmeint, Yoga sig nüt für mi. Viu z'längwiilig und so. Aber im Momänt bruchi öppis, wo mi chli beruiget und woni cha abefahre. I bi immer im Schuss und immer ganz unruhig weni z'lang hocke und nüt mache. Und es hett mer so gfaue!! I bi mit eire angere zäme die einzigi gsi, wo s'erscht Mou Yoga gmacht hett. D'Lehrerin isch de ou immer düregloffe und hett aui korrigiert dass si s'Züg richtig mache. Mi hett si nie müesse korrigiere. Und si hett de am Schluss gmeint, si hätt nid dänkt, dasis no nie gmacht ha! Und i sig de chreftig... ;-) Das hett mer scho es sehr guets Gfüeu gäh...! Ehjo, i wirde sicher wider go nächscht Wuche! D'Lehrerin isch mer ou ganz sympatisch, was gloub im Yoga ou no viu usmacht. Woni de am 7ni ume ändlech deheim gsi bi nachemne lange Tag hani kochet (mit der Mikrowäue ;-)) und de nümm viu gmacht – aber es wird glich immer 10ni, 11i bisi ändlech is Bett goh!

Am Donnschti hani „grosses“ vor gha: i bi mi go amäude für d'Theorieprüefig für zum Töff fahre. Dir chöit nech auso nid vorschteue, was das für Närfe brucht! I ha jo gmeint, i heig glehrt aschtoh z'Amerika, aber dasch e Dräck gsi gäge das Aschtoh hie! Vor auem: i bi jezz afang agschtange fürne TERMIN!! D'Prüefig muesi de ersch no go mache – i 3 Mönet heisi s'erschte Datum frei gha! Auso, i ha is Verchehrszentrum müesse. De mou froge, wo dasi überhoupt häre mues go aschtoh (es hett mehreri Schlangene gha) und wasi überhoupt bruche. Si hei gseit, zersch müesi lo Fötteli mache, grad ume Egge. Dert isch aber niemer gsi, de bini eifach mou nöime agschtange, nachdäm dasi 2 Formular usgfüut ha. Öppe 25 Lütt si vor mir gsi, und es isch ewigs gange vo eim zum angere. Irgendwenn isch de e Frou cho und hett Fötteli gmacht vo dene wo brucht hei, die druckt und das hett 30 Rand koschtet für 4 Passfötteli. De, wo öppe no 15 Lütt vor mir gsi si, hani gmerkt, dasi zersch nöime angersch mues go aschtoh, wiui ohni das einte Formular nid cha der Sehtescht go mache (dasi fürne Sehtescht agschtange bi hani ou ersch rächt schpäät gmerkt – ha gmeint, das sig für Fötteli z'mache ;-)). De hani dere vor mir gseit, öb si mi Platz chön freibhaute, und b i die angeri Schlange go aschtoh imne angere Ruum. Am Afang isch die rächt schnäu gange, aber wo öppe 5 vor mir gsi si isch plötzlech nüt me gange. So nachere haub Schtung bini langsam närvös worde und ha dänkt, i müess de füre Sehtescht wider hinge afo. De bini ändlech bir 2. Schlange dra cho, und de louft die Frou eifach furt wo mi hätt söue bediene!! Eh, irgendwenn bini de bire angere dra cho und die hett mer das Formular gmacht. Und i bi sogar no pünktlech zu mim Platz zrugg cho bir erschte Schlange, und ha der Sehtescht chönne mache. De hani no müesse aschtoh für de würklech e Termin z'mache für die Theorie (für das woni eigentlech gange bi!) und d'Gebür z'zahle (68 Rand). Boah ey! I bi öppe 2-3 Schtung dert gsi! Fürne Termin z'mache!!! Aber heeeeyyy!! Nimms easy! Mir si hie z'Afrika! ;-) Love it! :) Jedefaus hani jezz dä Termin, und weni d'Prüefig beschtoh bechumi der Lehrfahruswiis, und ab denn chani mitemne Töff uf der Stross umefahre. Aber das geit jezz no ewigs!

Am Nomittag hani es SMS becho öbi wöu i Usgang am Obe! Yeah, wie lang hani uf das gwartet? I USGANG!!! ...richtige Usgang! Aber zersch hetts no chli Arbeit bedütet: I bi am haubi 6i mit de Giele (Dave und Ruan – der Alex, womer s'letschte Mou verlohre hei, isch nid mitcho) go seckle. Wiui gwüsst ha, dases mi nid würklech wird aschtränge, bini zersch eleini öppe e haub Schtung gange und ha mi de mit disne troffe ;-) Und jo, mini Zeie hei mi fasch umbrocht, aber noch es paar Minute seckle vergisst me das aube und me gniesst nur no s'Wätter, d'Ussicht und die früschi Luft... Nachem Seckle mit de Giele hani de schnäu hei müesse go umzieh und öppis Znacht inefreese, und am haubi 8i isch mi de der Dave cho hole für i Usgang. Mir si no der Alex go abhole, und der Ruan isch de mit sire Fründin (oder was ou immer das isch – Kollegin?) ou no cho. Es isch es Konzärt gsi vomne Typ wo Dave Ferguson heisst, und das isch gsi im Polana z'Kalk Bay. I säge öich, das isch s'schönschte Lokau woni äuä je gsi bi! Diräkt am Meer, e riese Fänschterfront dasme fasch diräkt is Meer hätt chönne gumpe (nur hetts grägnet ;-)), es Füürli imne Ofe, eifach so gmüetlech!!! Im Summer tanze d'Lütt aube ou dusse uf de Schteine... Ehjo, mir hei ou aus gäh wemer nid hei use chönne go tanze! Der Dave, der Alex und i si die erschte gsi wo tanzet hei, de hei langsam immer meh Lütt agfange und de heisi Tischli und züg afe wägruume dases meh Tanzflechi gha hett. No e chliini Anektote: I bi ohni Gäud, ohni Natel, ohni Täschli, ohni Jäggli nüt i das Lokau ine! Ha nur im Dave 100 Rand id Finger drückt und voilà ;-) Är hett gmeint, das sig sicherer, de müesi mer um das keni Sorge mache weni tanze. I bi mer scho chli nakt vorcho, so ohni öppis. Aber es isch ou no würklech befreiend weme sech um nüt so mues Sorge mache! Und z'trinke heimer d'Giele immer brocht, um das hani mi ou nid müesse kümmere ;-) I ha so vou Spass gha! Und widermou hani s'Gfüeu gha, i sig am schönschte Ort uf der Wäut. Das chunnt hie no öfters vor ;-) Irgendwie isch aus zu schön um wahr zu sein. I mues mi immer wider chlemme zum luege öbi tröime oder öb das Würklechkeit isch... mou luege wie lang dä Zueschtang ahautet :-D

Am eis bini de heibrocht worde und grad totmüed is Bett gsunke. Am 6i am nächschte Morge bini wider ufgwacht. So fies! I ha doch äxtra kei Wecker gschteut! Henu, was hani wöue: uf und ab go schaffe!! ;-)

Nachem Mittag hani de die ganz Zyt müesse dra dänke, dasi unbedingt es Outo bruche dasi unabhängiger bi. I ha scho chli umegluegt und vo paar Lütt Tipps becho. De bini eifach los gwelonet (biket) und eis vo dene Outo go aluege und usteschte. Es isch viu tüürer weder wasi ha wöue usgäh. Aber hie si aui Outo viu tüürer weder das si sötte sii! Es isch würklech krass, si choschte viu meh weder zum Bischpiu z'Amerika. Und d'Qualität isch meischtens schlechter. Phuu, das isch auso scho no e Challenge! Aber isch jo nid s'erscht Mou dasi vor sore Herusforderig schtoh, auso ou die wirdi irgendwie meischtere, irgendwenn (lieber früecher aus schpeter!!!)... Ehjo, jedefaus hett mer das Outo passt, aber i luege jezz für eis, wo euter und günschtiger isch, aber glichi Marke und Modäu. Ha ou e Kolleg vomne Kolleg (Mike heisster) no gfrogt für Hiuf – dä kennt sech anschiinend us mit Outo und isch Willig, mir z'häufe eis z'finge. Däm vertroui jezz eifach mou, trotz däm dasi ne no nie gseh ha, mir hei nur gSMSlet ;-).

Bim härefahre zu däm Typ mitem Outo hani mi no chli verfahre, und bi ines Gebiet cho woni äuä nid so hätt söue sii. Ig bi die einzigi Wyssi gsi – was jo no nid so schlimm wär. Aber die Hüttli wos dert gha hett... und ig mitem Velo, völlig usgliferet. De hani dänkt, i sött äuä gschider unuffällig umchehre. Has emu de gfunge und isch nüt passiert. Es si jo ou nid grundsätzlech aui kriminell oder so hie! Überhoupt nid! Aber me sött sech scho nid so uslifere. Sehr warschinlech passiert nüt, aber wenn... dänke mer mou nid dra!

Nachem Teschtfahre bini wider zrugg is Büro go schaffe. Auso, anstatt z'schaffe hani gröschteteils Outo gsuecht, SMS gschribe dene Lütt mit de Outo, Sache probiere usez'finge, der Mike um Rot gfrogt... bis öppe am haubi sibni. Denn hani mit deheim, mit der Emilie und mitem Joel gskypet und bi de irgendwenn schpäät im dunkle heigfahre. Ha ou im verlouf vom Obe no gmerkt, dasi kei Gäud me ufem Natel ha und ha no schnäu i Lade das müesse go uflade. Zum Glück hett der eint Lade bis am 9ni offe! Was miechi ou ohni Natel, jezz woni so viu „Fründe“ ha? :-D

Deheim acho hani wider e Ego-Party gha, mit Musig, Singe und Tanze. Oh, vo wäge Tanze: i bi am Donnschti im Usgang mit schwarze vergliche worde – und si hei gmeint, i würd de gar nid schlächt abschliesse i däm Vergliich! Was fürnes Komplimänt! Bi auso scho chli schtouz... aber das chunnt ou vo au mim „Tanz- und Partytraining“ im Usgang mitem Julia, der Emilie und so ;-) Thanks, guys! Jedefaus hani wider vor lutter „Party“ mit mir säuber kei Zyt gha füre Blog. Trotz däm dasi keis Training gmacht ha geschter, mine Zeie z'lieb!!

Hütt morge hani de wider chli putzt und ufgruumet. Es gitt aube nid auzu viu z'tue nur mit eim Ruum, und i probiere, gar nid auzu fescht es Puff lo ufz'cho. Aber chli Wüsche und so mues haut scho ab und zue si. Jo, und sitt denn bini am Blog schribe und Züg abmache für schpeter hütt Nomittag/Obe und morn und nächscht Wuchenänd. Aus usbuechet! :-D Bitte Termine früeh gnue amäude... ;-)

Sorry für so viu Tegscht!

Töff fahre

I gloube, aui hei chli öppis spannenders, oder verückters, oder irgendwie krassers erwartet vo mim Wuchenänd. Aber für mi ischs auso extrem cool gsi! Auso, wasi das Wuchenänd gmacht ha isch: i bi erscht mou eleini Töff gfahre!! ;-) Es hett so viu Spass gmacht!!! Es isch eifach s'kuhlschte! Trotz däm dasi natürlech nonid uf d'Stross darf und so, und es isch ou nur es chliises Bike gsi, aber i säge öich: i bi totau fan!!

Auso, aber jezz mou vo Afang a. Am Samschti morge bini früeh uf zum go seckle. I bi e angere Wäg gsecklet, ha ou nid so viu Zyt gha und mou öppis angers wöue usprobiere. Es isch e mega coole Wäg gsi, es hett so z'säge nie Outo dert, isch fasch aus Naturstross, mega tolli Ussicht... me gseht über ganz Stellenbosch! Und es hett chli Näbu gha i Teile vor Stadt – das hett mega mystisch üsgseh! Und die Morgestimmig und aus, me hett so richtig gseh, wie d'Stadt so langsam ufwacht... und i ha e Schtachu vomne Porcupine (Stachutier?) gfunge... ehjo, jedefaus bini nur 45 Minute gsi, de hei go dusche und mi parat mache für mini Mission. I ha no aus packt woni vilech chönnt bruche, und am haubi 10ni isch mi d'Di cho hole zum mi a Bahnhof bringe. I ha de es Ticket glöst nach Kapstadt, eiwäg, 2. Klass: 11 Rand. Im Zug hani de gmerkt, das die Wysse äuä keni 2. Klass Billet löse normalerwiis ;-) Es isch nur no ei angeri wyssi i däm Abteil gsi, die isch de ou grad „zuefällig“ näb mir ghocket, und i ha se eifach agsproche. Si isch öppe i mim auter und ou ufgfaue wiene bunte Hung: wyss und blond ;-) Mir hei de schnäu gmerkt, dass mer beidi nid vo dert si: si isch Dütschi! Mir hei üs de ungerhaute bis si hett müesse umschtige und Nummere und email Adrässe tuschet und so... Si heisst übrigens Kira und hett Germanuistik studiert gha und hett jezz e permanänti Schteu z'Kapstadt are Uni.

Z'Kapstadt am Bahnhof bini abghout worde vom Dennis. Är isch so chli der ersatz Papi vor Carla – die wo ou i mire Abteilig schaffet (hani sicher scho mou erwähnt??). Är isch mitem Töff cho und aus erschts hani mi drum mou müesse töff-fit mache: Heum, Händsche und Töffjagge montiere und so. De simer afe zu ihne hei gfahre, d'Carla hett dert gwartet. Si isch mit ihrem chliine Töff dert häre gfahre: das isch de ou der Töff gsi, woni druff glehrt ha fahre. So nätt dass si mer dä eifach so uslehnt! Är isch nöi und si hett ne ou ersch vor paar Mönet kouft! Ehjo, jedefaus hani de ir Carla ihri Ersatz-Familie kenneglehrt (emu die wo si ume gsi): d'Gigi (Frou vom Dennis) und der Nick (Sohn). Mir hei de afe öppis chliises Zmittag gässe und nachem Mittag simer ine sone Park gfahre: der Dennis mit mir hingedruff ufemne grössere Töff und d'Carla mit ihrem Töff (Nina heisster). De hett mer der Dennis aus erklärt und de heisi mi losgschickt. Wow isch das schwirig, sone Töff fahre! Schaute und brämse und aus isch angers!! So viu Handarbeit... i ha de ou ide erschte 10 Minute 2 mou bim Stoppe der Töff lo gheie...OOPS!!! aber isch nüt schlimmers passiert, ke Chratzer oder so. Und isch ar Carla scho sehr viu passiert. Si isch chlinner aus ig und sehr schwach (i bi jo jezz schtarch, bi au däm seckle ;-)) und si cha der Töff fasch nid häbe! Am erschte Tag hani chönne bis i 4. Gang schaute und am Hoger afahre und Slalom fahre und stoppe ohni der Töff lo gheie... hehe. I heig Talänt hett der Dennis, üse Lehrer, gmeint. Är isch ou e super Lehrer, mues me do no säge! Hett mega Gedoud und Verständnis... obwou dases fürne erfahrene Töfffahrer vilech ungloublech erschiint das me so ungschickt cha si wie ig am Afang ;-) Aber i ha gloub schnäu glehrt.

d'Carla, d'Nina und ig, Muizenberg im Hingergrund, und der Ozean...

Nina und ig... isch das nid e super Kombination? I finge, Töff und ig ghöre eifach zäme.

Das hett rächt müed gmacht, das ganze konzentriere und so! Mir si de no ufne chliini Tour nach der Töffschtung und hei mega schöni Ussicht gha ufe Ozean und so. Das hett mer no einisch meh zeigt, wieso dasi e Töff wett. Me isch (oder füeut sech) so frei!! I ha wider, wie aube bim Mike ufem Töff hingedruff, afo singe und bi eifach soooo glücklech gsi!! Nur dasi das mou mit mir säuber und mit mire Umwäut glücklech bi, ohni öpper z'ha wo mi zersch mues glücklech mache... Aber klar, i ha scho ou super Lütt um mi ume! Wie d'Carla und d'Di und d'Sofia und der Dennis und d'Gigi und der Dave (mi Chef) und so witter und so fort...

D'Carla und ig hei de Znacht kochet und es isch super usecho! De heimer üs scho langsam parat gmacht für is Bett, mir si sehr müed gsi und es isch ou langsam schpäät worde! Auso, is „Bett“ isch nid ganz der richtig Usdruck: ig bi ufs Sofa und d'Carla ufne Luftmatraze am Bode ;-) Mir hei grad die ganzi Schtube i Beschlag gnoh!

Am Morge hei d'Carla und ig chli diskutiert über Gott und die Welt (und Manne und Beziehige und Herusforderige und Erläbnis und und und) bevor de aui ufcho si. De heimer mit de angere es Tee gnoh und üs parat gmacht für nach Kirstenbosch i Botanisch Garte (eine vo de schönschte Fläcke uf der Ärde!!) für mitem Dennis sire Mueter und Schwoscht go Zmorge ässe. Es isch jo schliesslech Muetertag gsi! Und i ha ou öppis z'fiire gha: ei Monet Südafrika Jubiläum! ;-D Bir Gigi und em Dennis ghörsch grad zur Familie sobau dass ihres Huus betrittsch. Sie si so offe und aus, wahnsinn! Und ou dass si üs grad mitgnoh hei a dä Familiealass isch krass, irgendwie. Ehjo, nachem Zmorge wimer de no chli im Garte umegloffe und so – es isch immerno wunderschön Wätter gsi, wie scho die ganz Wuche und ou s'ganze Wuchenänd! Lucky me! 

De simer hei und ig und der Dennis si uf Carla ihrem Bike zrugg i Park fürne witteri Lektion. Am Afang hani chli schiss gha dasi wider aus verlehrt ha, aber dasch de nid so gsi! I ha mi so „deheim“ gfüeut uf däm Bike... scho fasch aus wäri ufemne Töff uf d'Wäut cho ;-) Und das Gfüeu vo Freiheit...

der zwöit Tag hett no viu meh Spass gmacht aus der erscht, wiui nid verchrampft gsi bi

Mir hei nid auzu lang Zyt gha wiu mer nähr zrugg nach Stellenbosch hei wöue. D'Carla isch biket und ig bi heibrocht worde mitem Outo (ar Gigi ihri Schwoscht wohnt z'Stellenbosch und die si si de no go bsueche). Am sächsi ume bini de ersch deheim acho, zu schpäät zum no öppis schlaus mache. I ha de no chli z'Ässe zämebrutzlet, chli g'skypet, Fötteli agluegt und süsch nid viu gmacht.

Hütt morge, gäng wie gäng, bini zrugg i Autag. Übere Mittag hani mit der Di chli üsi Wuchenänd-Erläbnis ustuschet und dusse d'Sunne gnosse. I üsem Büro isch so chaut!! :( Am Nomittag mou hani de es SMS becho, woni gmeint ha es sig nid für mi. Es isch vo eim vo de Lütt gsi, woni s'letscht Wuchenänd kenneglehrt ha, aber nid uf der Insle, sondern am Openair uf der Wyyfarm. Är hett scho am Wuchenänd es paar mou gschribe öbi Zyt und Luscht hätt zum öppis mache, aber i ha gäng scho öppis los gha! Ehjo, s'SMS isch emu de glich für mi gsi, und ärr hett gfrogt öbi mit wöu go seckle. Das hani sowieso vor gha, und i ha de zuegseit. Somit isch mi der Dave am haubi 6i cho abhole und mir hei sini 2 Kollege troffe. Mir si so ziemlech dert düre wo ig am Samschti morge düre bi, nur öppe haub so schnäu und mit es paar Pouse zwüschedrinn :-D und i ha scho Angscht gha, i mög de nid noche wius aus Manne si! Eis mou wo si z'mizz drinn gstretschet hei bini eifach säuber no e Rundi gsecklet ohni sie ;-) Aber d'Ussicht isch wunderschön gsi, und ou süsch hetts Spass gmacht! Isch ou mou cool weme chli cha rede bim seckle, und weme nid mues hei stresse wenns langsam dunku wird...aber i mues säge, i ha nid würklech s'Gfüeu gha, i heig öppis gmacht. Ha nid mou gschwitzt, und süsch loufe aube d'Bäch nur so abe!! Aber isch luschtig gsi. Der eint heimer ungerwägs no „verlohre“; är hett nid möge und isch gloffe.

Der Dave und ig si de no e Burger (mi erscht Hamburger in Südafrika!!!) go hole und dä zu ihm hei go ässe. Är hett so e schöni Wohnig! Aus so künschtlerisch igrichtet, überau wider irgendwelchi Biuder und Fötteli und so. Är isch äbe „Künschtler“, hett es Gschäft woner Chuchine und angeri Möbu und so designet. Auso, wenn der mou z'Südafrika sitt und e Chuchi bruchet: i weiss öpper wo superschöni und hochqualitativi Chuchine macht!! ;-) Öppe am achti ume bini de wider deheim gsi (das heisst, heibrocht worde) und de hani nid mou meh müesse Znacht mache! Isch ouno gäbig ab und zue ;-) jo und sitt denn bini am Blog schribe! Phuu!

Me gseht, mis Soziauläbe entwicklet sech rasant! Ha scho anduurend Programm und bau kei Zyt meh für mi säuber... aber i erläbe so viu Guets, es isch scho bau nümm wohr! ;-)

Cheers!

Wohnigs Besichtigung

Mir isch hütt öppis ufgfaue: I ha no nie Dose-food gässe sitti hie häre züglet bi! Trotzdäm dasi kei Chochherd ha und kei Bachofe. I finge irgdnwie, dasch no rächt beiidruckend! Vilech süsch no es paar Sache, wo sech i mim Lifestyle gänderet hei:

I bi no nie ire Bar oder so gsi; oder i gloub, me sogar cha fasch säge, i bi no nie im Usgang gsi.

I ha nur 2 grossi, 2 chliini und ei Suppetäuer, und eis Müeslischüsseli. 2 Gleser und 3 Tassli. Es paar Gable und Mässer und es paar Löffeli. Zum Rüschte bruchi meischtens mis Schwizzer Sackmässer. Es Löcherbecki hani ou. Und es Abtropfgitter für s'Gschirr hani kouft. 4 Tupperware Gschirrli vo verschidener Grössi bruchi aube für s'Zmittag mit ad Uni z'näh. E Wasserchocher und e Mikrowäue wo öppe 100jährig isch hani no, und e Chüeuschrank, wo s'Gfrüürfach kabutt isch, auso eifach so offe, ohni separats Tüürli. Das wärs de ou scho mit mire bescheidene Chuchiusrüschtig! Aber i mues säge, mir fäut nüt! I bi immer guet gnäärt und ha immer wider nöii Ideeä, wasme chönnt „choche“. Ok, es guets Rüschmässer muesi de mou no zueche tue. Und vilech es Schnidbrättli...

Ok, i ha vilech chli übertribe, i ha auso hütt kochet. Mit der Mikrowäue. Es hett Broccoli und Bluemechou gäh und Härdöpfu. Das isch der bescht Härdöpfu gsi woni je gha ha! Der Mike hett aube serigi für üs gmacht wener kei Gäud me hett gha für süsch öppis z'choufe (auso, der Mike isch doch no für öppis guet gsi ;-)), vo ihm hani das „Rezäpt“. Isch auso es super Znacht gsi!

Aber jezz chli witter zrugg i mire Wuche. Am Mittwuch hani gmerkt, das mini suberi Wösch langsam aber sicher z'änd geit. I ha mi de uf d'Suechi nachere Wöscherei i mire Nöchi gmacht, und bi ou fündig worde! Die nöchschti Wöscherei isch öppe 10 Minute z'Fuess wäg, und me liferet eifach d'Wösch ab und die wäsche se für eim, tröchne se und lege se zäme. Und das choschtet de 65 Rand bis 5 Kilo Wösch und 95 Rand für 5-10 Kilo. I bi de hei go d'Wösch hole und bi mit 2 RIESE Seck Wösch dür s'ganze Quartier gloffe für zum se ablifere. Es isch de ou grad ziemlech gnau 10 Kilo gsi. Am nächschte Tag hani se chönne go abhole (zum Glück isch der Kurs früecher fertig gsi! D'Wöscherei hett nämech nur bis am 5i offe und tuet ersch am 10ni uf. D'Öffnigszyte hie si auso augemein der Horror!!). I bi mitemne riese Sack vou Wösch – 10 Kilo schwär – ufem Chopf heigloffe. Glücklecherwiis isch schön Wätter gsi beidesmou! ;-)

Am 5i isch mi de d'Di cho abhole für ane Vortrag in Kapstadt über ne Changing World oder sowas (Klimaerwermig, invasivi Arte, wie das aus sech in Kapstadt uswürkt, etc etc). D'Carla und d'Kath (e angeri Kollegin vor Di) si ou no mitcho. Es hett 30 Rand koschtet, und ir Pouse hetts so Sandwichli und so Sache gäh. Isch no intressant gsi, und es hett 4 ganz verschideni Vortreg gha. Mir si ersch öppe am haubi 12i ume heicho.

Am nächschte Tag isch der Kurs scho wider früecher fertig gsi, und i ha de beschlosse, dass mi gross Tag isch. Es isch wunderschön Wätter gsi, wie die ganzi Wuche – eifach der perfekt Tag. I ha äuä nie erwähnt dasi es nöis Zieu gsteckt ha, nachdäm dasi mis einte Zieu bim Jogge viu z'glii erreicht ha (bis zum Tor vom Jonkershoek Nature Reserve seckle). Auso, mis nächschte Zieu isch gsi, 20 Kilometer z'seckle. Auso, eigentlech wärs gsi, e Haubmarathon, aber i cha hie nid so gnau d'Strecki mässe, und durum hani dänkt, über 20 Kilometer isch gnau gnue. Jo, de bini öppe am haubi 5i los gsecklet dasi de vorem Dunkle (oder emu chli nach Sunne-ungergang, wenns aber immerno chli häu isch) heichume. I bi zersch wider zum Tor ufe gsecklet, ha aber scho ufem Ufewäg e Umwäg gmacht. Aber ufe isch immer so hert! Vor auem wiu denn d'Sunne so so abebräntet – der Schweiss tropfet aube nur so abe!! Bim Tor (das hani öppe ire Schtung erreicht gha) hani umkehrt, und abe geits immer fasch wie vo säuber! Bim letschte Hoger dürab hani die beschti Ussicht gha ufe Sunneungergang, und si isch genau denn abe wonis am schönschte gseh ha (dasch chli vor de 6i gsi)... So schön!!!! Fasch bi mim Huus bini de no 2 Rundine um s'chliine Marais Nature Reserve gsecklet. Und voila, uf der Charte hetts mer gseit, i sig 20.23 Kilometer gsecklet. Und i ha genau 2 Schtung gha. Das gäb de e Kilometer-Schnitt vo weniger aus 6 Minute.

(Ha übrigens vorhär vergässe: 2 Wyygleser vom Cheese Festival hani ou no!! Yeah yeah!)

Ehjo, jedefaus hani hütt scho wider e Zwangs-Sport-Pouse müesse ilegge. I ha eifach kei Zyt gha für zum öppis mache! Auso, i hätt scho Zyt chönne mache, aber ersch nachdäm d'Sunne dunge gsi isch, und de sött me äbe vilech nümm so elei go seckle oder bike. Und S'Fitness hett hütt ou nid so lang off. Ehjo, drum hani de kochet ;-)

I bi ou no es Zimmer go aluege imne sone chliine Farmer Cottage mega abgläge, aber glich nur 15 Minute Velowäg bis ad Uni! Es ligt am Wäg woni aube go go seckle und wär mega gmüetlech. Aber mir gfauts do woni jezz bi irgendwie scho besser. Und äbe, eleini wohne isch super momentan! Eh, mou luege, das wär eh ersch für im Juli.

Morn gohni ufne Mission. I säge nur soviu: d'Di chunnt mi am haubi 10ni am morge cho abhole und tuet mi ufe Bahnhof für de nähr mitem Zug nach Kapstadt. Meh Infos gitts de nachem Wuchenänd! Nur so viu: it's gonna be FUCKING AWESOME!!!

Cheers!

101-Minute Run

So, wider zrugg ir Realität... I bi aber glücklecherwiis noni vo mim Wuchenänd-Hoch abecho! Es füeut sech guet a weme eifach glücklech isch ohni erkennbare Grund. Eifach glücklech und zfride mit sich säuber und der Umwäut. :-)

Auso, jedefaus hett mini Wuche am Mänti morge sehr früeh agfange. I bi öppe am haubi 7ni ufgwacht und de vor de achti scho am Arbeitsplatz acho. I ha müesse ad Uni loufe wiu jo mis Velo no dert gsi isch (d'Di isch mi jo diräkt vom Schaffe cho abhole für uf d'Insle). I ha mi gfröit uf mou wider e Tag ohni Kurs woni mi um die würklech wichtige Sache ha chönne kümmere (oder so...). Die würklech wichtige Sache si i mim Fau Revisions vomne Manuskript! :-D I ha jo do no vo 2ne Manuskript Rückmäudige vo Reviewer becho churz nachdäm i do häre züglet bi, und mit dene hani mi am Mänti teilwiis beschäftiget. Und de hani scho bau wider vergässe, dass mer jo am Mänti Nomi aube Lab Meeting hei... nach däm (öppe am 4i) hani de beschlosse, dass zu schön Wätter isch zum no lenger im Büro blibe. Es isch öppe 25 Grad gsi und keis Wöukli am Himu! Und i bi ou mit Abschtang die erschti gsi hütt morge i mim Büro! Und no schnäu go ichoufe hani ou müesse, ha nüt z'Ässe me deheim gha... I bi de schnäu i Lade und go Gäud hole für d'Mieti z'zahle (die zahli bar). De bini mi hei go umzieh und abgsecklet... Mis Zieu isch s'Tor zum Jonkershoek Nature Reserve gsi. Dert bini scho mou mitem Velo ufe und i ha 50 Minute brucht. I ha grächnet, dasi öppe dopplet so lang zum Seckle bruche. Am Afang hani mi nid so fit gfüeut, ha dänkt, es sig nid so mi Tag... de bini eifach witter und witter gsecklet... und de irgendwenn nach öppe 45 Minute bi däm Tor acho, ha umkehrt und bi wider zrugg gsecklet. Woni bau deheim acho bi hani beschlosse, dasi no lang mögt, und ha no e Umwäg gmacht. I bi de schlussändlech 101 Minute ungerwägs gsi, und es si öppe 17 oder 18 Kilometer gsi hei si gseit.

Deheim acho bini go d'Mieti abgäh und ha no chli mit der Christine und em Michael gredt. Der Michael macht jo Triathlon, hett s'letscht Johr der Ironman mitgmacht z'Südafrika. Är isch ou beiidruckt gsi und hett gseit, das sig e rächti Strecki! Är wott mi ou immer überrede, mit ihne go z'seckle... hütt hetter mer so infos zu verschidene Löif gschickt ir Nöchi. D'Christine und är gö äbe i 12 Tag so ane Bärglouf, 15 km und über 900 Höhemeter. I foh jezz ärnschthaft a däm afo umstudiere! Wett ou go... aber i bi überhoupt nid trainiert für serigi Höchine hinger mi z'bringe. Die Strecki wo ig aube go isch öppe 250 Höhemeter uf öppe 16 km verteilt... i ha äuä nid gnue Zyt zum für das trainiere... aber es gitt no viu angeri Löif woni de cha goh... ;-)

I ha hütt übrigens kei Muskukater und ou keni angere Beschwärde. Aus wäri gmacht fürs Langstrecke-Seckle ;-))

Hütt morge hani wider vor de achte afo schaffe – bi bis am 9ni die einzigi gsi im Büro! Dasch irgendwie umgwöhnlech. D'Di isch chrank :(

I ha emu viu erlediget hütt! Ha probiert abzkläre, öbi ane Tagig cha in Spanie im Septämber, beziehigswys, öb das öpper zaut. De hani mi über au das schlau gmacht und mi de für die Tagig und e Workshop ir Schwizz vorhär agmäudet. Gäud für zum d'Chöschte decke hani noni, aber das sött scho klappe. Hoffi! :-) Und i ha für beides, d'Tagig und de Workshop, e Vortrag agmäudet – über 2 verschideni Theme! Über eis devo hani no nie e Vortrag ghaute, d.h. seeehr viu Arbeit! Über s'angere hani afe e 45 minütige Vortrag ghaute, dä am Workshop wär 15 Minute. Mou luege öb beidi agnoh wärde – das würd de bedüte dases mer sicher nie längwiilig würd bis Afangs Septämber! ;-) Aber jezz heissts zersch mou, abwarte und uf Zuesag vom Gäud hoffe!

De hani dänkt, i mües jez vilech mou abkläre, wo dasi cha Wösch mache. Hie hani kei Wöschmaschine zum bruche, aber das isch no bi viune Wohnige so und durum gitts viu öffendlechi Wöschereie und so. I ha de geschter eini entdeckt und bi hütt mou verbii, go luege, was si so für Agebot und Priise hei und so. Auso, dert bringt me d'Wösch eifach, und si wäschese, tröchne se und lege se zäme. Je nach Gwicht vor Wösch choschts viu oder viu meh! Aber was hani fürne Wau? I bi de d'Wösch go hole, ha zum Glück e RIESE Sack gha und ha se brocht: es si grad öppe 10 Kilo gsi (klar, ha jo ou fasch au mini Chleider dräckig gha! ;-)), und das hett de 95 Rand koschtet für oben genanntes. Morn chanise go abhole (fausis schaffe vor de 5e dert z'sii, was äuä nid klappet... süsch übermorn). I weiss jo nid, wieni die Wösch wider söu heischleppe! Vor auem: jezz isch jo no schön Wätter, aber wenns de schiffet! Und i mues glich öppe 5-10 Minute loufe bis dert häre (vor auem geits lenger weme 10 Kilo Wösch mitsech umeschleppt ;-)). Aber i tue jo de glii es Outo zueche...

Uuuh, i fröi mi scho uf die früschi Wösch!!

I ha jo hütt e chliini Trainingspouse wöue mache, aber da i keni Beschwärde gha ha und scho s'ganze Wuchenänd nüt gmacht ha bini de glich gschnäu zum Tor ufe biket. Aui hei so cooli Bikes, Mountainbikes oder Rennvelo. Und mis Velo hett vorne sones Chörbli und isch ganz es normaus Velo ohni Fädergable und nüt so... Und aui hei e Heum usser ig. Und aui hei ihri fancy Trainingsklamotte anne aube, ig ha eifach normali Strossechleider und Sandale agha (isch jo sowieso aus Trainingszüg ir Wösch ;-)). I nimes äuä eifach nid ganz so ärnscht wie au die angere... ehjo, nach dene 50 Minute dert ufe bike hani dänkt, i sött widermou is Fitness Center. Das hani de ou gmacht und i b ine sone Body Toning Schtung. Und dir chöit 3 Mou rote, weli Muskugruppe das am meischte dra cho isch... JAWOLL! D'Bei! I gloube, i däm Fitness wird nüt aus d'Bei trainiert!! :) Aber i mues säge, i gloube das hiuft mer das d'Chnöi nieme weh to hei! Und es isch scho glich es angers Training aus nur seckle und bike.

Zum Znacht hani mer übrigens e super Nudlesalat gmacht mit Chabis und Rüebli und Mandusplitter und Cranberries. Aus „Nudle“ hani die gnoh, wome eifach mues Wasser choche und de d'Nudle übergiesse und chli warte (so ganz dünni chinesischi). Ha eifach s'Gwürzpäckli nid dra gschosse. Mmmmh, so guet sägi öich!

Morn und übermorn hani wider Kurs. Das wird aschträngend! Hoffe nur, es bringt mer de mou öppis...

Lonely Hippo Island

Uh, i dänke fasch es isch widermou Zyt fürne Blog-Iitrag.

Die Wuche isch so hektisch gsi, und i ha so viu ungernoh, i weiss grad gar nid, wo afo! Und i vergisse sicher mehreri Highlights... Und müed bini ou, ha das Wuchenänd nid so viu gschlofe. Aber i gibe mer müeh!

Aauso, am Zischti hätte mer wägem 1. Mai frei gha, aber i bi de glich go schaffe. Schliesslech hani jo am Mänti frei gnoh für as Cheese Festival. I bi de am Nomittag früecher hei dasi ha chönne go bike und seckle bi Tagesliecht. I bi zersch bis as Ändi vor Stross gfahre, wo nächer s' Jonkershoek Nature Reserve afoht. I ha 50 Minute brucht, und es si öppe 20 Kilometer häre und zrugg. De bini no 50 Minute go seckle, wiui gmeint ha gha, i heig nüt gmacht nachem bike. Ok, mini Bei si scho riese müed gsi hani de müesse merke, aber i has dürezoge. Und schliesslech wär jo de vilech irgendwenn mis Zieu, Triathlon z'mache...

Am Mittwuch bini de äbe uf s'Fäud mit der Desika. Si isch „Inderin“, isch aber z'Durban gebore worde, so wie ihri Eutere und Grosseurete ou scho. Aber die praktiziere die indischi Kultur extrem, und anschiinend hetts z'Durban die gröschti Inder Community usserhaub vo Indie. D'Desika und ig si de rächt witt gfahre für Same vo verschidene Proteae go hole vo eire vo ihrne Studie. Si hett mer sehr viu über die Pflanze und augemein wüsseschaftlechi Sache verzeut, wo mit ihrere Studie zämehange. Und viu vo dem wird mi de ou mou beschäftige, durum isch das sehr intressant gsi! Und es isch auso wahnsinn, wie viu besser do so Universitäri Usbiudig isch vergliche mit der Schwizz oder der USA! Scho Master Studänte wüsse do extrem viu und si i ihrem Gebiet sehr bewanderet. E Master do isch meh wie e Doktorarbeit, es schteit sogar im Vertrag inne, dass nid chasch abschliesse wenn nid mindeschtens ei Publikation scho zur Veröffendlichung akzeptiert isch!! Das isch scho sehr krass... aber i ha ghört, es sig vilech nur so extrem schträng im CIB (Center of Excellence of Invasion Biology – oder so öppis i dere Währig) – dert bi ig im Momänt am schaffe für die nächschte 3 Johr. Auso, i nime das jezz mou aus guets Zeiche – me wird extrem gförderet hie!

Ehjo, uf jede Fau bini dür so viu wunderschöni Landschaft gfahre mit der Desika (si isch gfahre, leider – es hätt mi extrem gluschtet, wius sone Truck gsi isch, und i vermisse mi Explorer haut scho!!). Mir si vor auem uf so Landschtrössli gfahre (wie aube z'Colorado!! I has auso scho chli vermisst! Aber guet z'wüsse, dasme das hie ou cha ;-)), und de ou ziemlech uf schlimme „Strosse“ zmizz dürs Züg düre für zu ihrne Pflanze z'cho. Mersi, 4x4!! :-) Oh, es si so viu gueti Erinnerige ufe cho! Good times...

Ufem Fäud heimer de die Sache gsammlet womer hei müesse, und i ha viu schöni Vögeli und Pflanze und so gseh. Mir hei probiert schnäu z'sii, wiu es hett so usgseh aus chönnts jederzyt cho rägne. Und mir hei ghofft, es würd de vilech ufem Heiwäg no länge für zum e Chochplatte und Ofe go choufe! ;-) D'Desika hett gmeint, es sig extrem wichtig, das ig richtig chönn choche, und si wüssi do e Ort zum das go choufe, wo ufem Heiwäg ligt. Jo Mami! ;-) Am 10 ab 6i simer de a däm Ort, e Mall in Summerset West, acho – und natürlech hett der Lade nur bis am 6i off gha. Do muesi no schnäu e chlinnere Vorfau iischiebe: mir hei so parkiert, und es hett extremschtens gluftet! Würklech krass... i ha de öppis vom Rücksitz wöue fürehole, d'Türe ufgmacht, und e Luftschtoss hett se grad – PÄNG!! - im Nachbarsouto i die zuenigi Türe inegschletzt. Und de isch mini Türe dert iklemmt gsi zwüsche de beide Outo, so z'säge. Und es hett immer so Parkplatz-Wächter, wo eifach so chli zude Outo luege und so chli d'Outo bewache und beschütze und luege, das ne nüt passiert... de hani chli unuffellig a dere Türe gschrisse zum se befreie. Aber dasch mit auer Chraft nid gange! I ha nur chli Panik becho, de hani d Idee gha, haut s'Outo z'bewege wenn sech d'Türe nid bewegt ;-) Dasch de ou gange. Und s'Nachbarsouto hett nur e chliini Delle gha. Oops!! Mir si de so unuffellig wie möglech id Mall chli go umeloufe. Wiu der Lade scho zue gha hett simer de haut go ässe. D'Desika hett gmeint, weni scho nid chönn choche, müesi haut uswärts go ässe dasi richtig isse (I ISSE RICHTIG!!). I ha de es riese Stake und Riesecrevette und Pommfritt und Zibeleringe und Salat gässe (Surf'n'Turf). Das Steak isch sooo guet gsi!! Mmmmmmhh... isch scho guet, sone Bitz Fleisch! Und aus angere isch ou super gsi...

Am 9ni simer afe zrugg im Büro gsi, und de heimer no aus Fäudzügs müesse ineschleppe. I bi de rächt schpäät und rächt müed (und vougschtopft no derzue!) deheim acho und gli is Bett.

Am nächschte Morge hani e Kurs gha übernes Statistik Programm. Vom 8i bis am eis bini dert ghocket und ha Formlene gschribe und so... De hani schnäu zmittag gässe und amne Manuskript gschaffet zums ändlech wider ireiche bimne Journal. Das isch auso schwiriger gsi aus normau und hett ewigs brucht! Öppe am 6i bini de ändlech mit dere Prozedur fertig gsi, und de isch ou scho wider dunku worde und i ha wider im dunkle müesse hei. I ha no gschnäu müesse chli Zässe und so go choufe wiui nüt me gha ha...

Und: d'Di hett mi gfrogt, öbi s'Wuchenänd mit irgendwelche Lütt ufne chliini Insle wett zum öpperem si Geburtstag fiire, aber vor auem eifach chli relaxe und s'gniesse. De hani no müesse packe und Züg organisiere für das, wiu am Fritti simer diräkt vom Schaffe dert häre.

Am Fritti hani zersch no der ganz Tag wider dä Kurs gha, und de isch mi d'Di cho abhole vor Uni. Ihre Kolleg (ursprünglech wär dä Typ dänkt gsi aus Fründ, aber das hett de nid so klappt) vo Argentine (Martin, churz Tino) isch ou mitcho. Und voila, simer ad Küschte gfahre, wunderschöni Ussicht heimer gha und aus. Mir hätte am sächsi söue dert si für ufs Boot, aber mir hei so viu Verchehr gha, und immer isch no irgendöppis gsi wo üs verlangsamet hett (wie Tankwart wo eim nid hei wöue bediene – und du chasch/darfsch hie nid säuber tanke, si maches für di...)... Es hei de emu aui scho gwartet derte uf üs. Auso, mir si 10 Lütt gsi, die meischte hei nur öpper kennt am Afang (der Organisator, Glenn), der Tino und ig hei nur d'Di kennt. Die 10 Lütt si de für 2 Nächt ufne winzigi Insle verfrachtet worde, wos ei grosse Schloofruum mit 12 Bett (6 Kajuttebett), ei Chuchi, ei Duschi (open air Duschi! S'Beschte wos gitt!!) und 2 WC gha hett. Und niene wome hätt chönne häreflüchte, nur ganz wenig Platz und nothing to do! Wiui chli gstresst gsi bi abem letschte Faktor (nothing to do) bini am Fritti scho am 6i uf zum go seckle vorem Kurs...;-)

Eh, jedefaus isches super gsi uf ere Insle! So nöch ar Stadt, me hett se gseh und ghört vor Insle us, aber glich wäg vo auem! Mir hei viu Gseuschaftsschpili gschpiut, und gläse, diskutiert, Vögu beobachtet, und eifach dert gsi und nüt gmacht. Viu Schpili si Wortrate schpili und so gsi, wo natürlech eidütig Nachteile hesch einersits aus nicht-Englischs-Mueterschprochler, angerersitts aus nicht-Südafrikaner! Mir hei de für die 2 Usländer (Tino und mi) spezielli Regle gmacht ;-) I ha jedefaus viu nöii Wörter und Sache glehrt!

Es hätt anschiinend uf dere Insle, oder bi dere Insle, Hippos (Nilpfärd) und Otter gha, aber meinsch mir heige die gseh??? I gloube, die hei das nur erfunge, wiu mir hei Tag und Nacht Wach gschobe zum se gseh, und nüt isch gsi! Einisch hett der Glenn sogar e fausche Alarm usglöst: es isch scho so dunku gsi dasme nümm viu meh aus Umrisse gseh hett Är isch de vou i Panik usbroche und hett aui ghout wiuer anschiinend e Hippo gseh hett. Es hett sech usegschteut, das sech warschinlech dä Hippo aus Pelikan verchleidet hett. Hett emu meh usgseh wiene Pelikan, schlussändlech :-D Schade schade... und ou dä Otter hett sech nid lo blicke, trotzdäm daser anschiinend „oft“ verbii chunnt.

S'Wätter isch s ganze Wuchenänd fantastisch gsi! So warm und sunnig, und irgendwie Voumond oder so, mega häu sogar ir Nacht! I ha am Samschti der ganz Morge gsünnelet, im Bikini, natürlech!

Gässe hani ou sooo guet! Für jedes Ässe isch öpper (oder 2) zueschtändig gsi – mir hei ou aus uf d'Insle müesse näh, es hett jo dert vo afang a nid viu druff gha! Aber es hett aus klappet, genau richtig viu z'ässe, aui hei super kochet und sech so Müeh gäh und no nätt zwäggmacht und uftischet und so...! Und feine Wyy hetts wider gäh!

Und so cooli Lütt! Es isch jo so e zuefälligi Gruppe gsi, aber e gueti Gruppe! Me hett immer mit öpperem chönne schpile oder diskutiere, und weme nid hett wöue hett me immer irgendwo es lauschigs und relativ „ungschtöhrts“ Plätzli zum läse oder eifach zum höckle gfunge. Mir heis definitiv super gha uf dere Insle, trotz kene Hippos und Otters (was scho chli e Entüschig gsi isch!!).

Am Sunnti am 11i am morge simer de wider abghout worde und zrugg id Realität verfrachtet mitem Boot (s'Boot hett öppe 10 Meter müesse fahre, nid witter!!). Mir hei de beschlosse, dasmer no so anes Openair mit verschidenen Bands oder Singer-Songwriter göh ufere Wyyfarm in Stellenbosch. Das isch au Monet einisch, aber jezz heisi leider de Winterpouse. Es si nid aui mitcho – teu hei müesse schaffe oder so. Aber am Schluss simer emu 6 Lütt gsi!

Die einti isch mer speziell as Härz gwachse. Si heisst Nevenka und isch ursprünlgech vo Johannisburg, hett aber die letschte 5 Johr im Usland, houptsächlech Japan, gläbt. Es isch so intressant gsi, mit ihre z'rede, und si isch eifach super nätt! Mir hei emu Nummere tuschet und scho Plän gmacht für witteri Träffe ir Zuekunft ;-)

Am Openair hani ou wider nöii Lütt troffe und mit eim Nummere tuschet wo immer wider cooli Sache macht woni ou gärn mit wett, wie Wandere und Campe. D'Di, der Tino und ig si de ou no gschnäu go schwümme ines chliises Seeli bim Openair. Es isch sooo chaut gsi – s'Wasser vor auem, aber ou d'Luft wius gwuindet hett!!! Aber mir hei eifach müesse goh! ;-) und es hett sech so guet agfüeut weme usem Wasser use cho isch...

Jo auso das Wuchenänd isch extrem guet gsi!! So viu tolli Erläbnis und nätti Lütt und wunderschöni Landschaft und guets Ässe und guete Wyy... i weiss nid, was me meh wett... ok, vilech chli meh Zyt und Platz zum go seckle ;-)

So, i mues no chli Schlof nochehole vom Wuchenänd. I bi immer bide letschte gsi, wo is Bett si – immer witt nach Mitternacht. Und de am Morge gäng eini vo de erschte, wo uf isch!

Fötteli gitts de ou no einisch. Mues se haut zersch sortiere und so, und das brucht haut aube chli Zyt. Aber si wärde cho!

Ah, und die Insle isch übrigens im Rondevlei National Reserve gsi, für die wo wei go luege wo si isch.