MTB

öppe so bini is Château dennzumau... aber mit offen Ouge natürlech!

Es schiffet in Schtröme dusse und i ha mi vorem Füürli gmüetlech ine Dechi ikuschlet - ok, tröim witter – Füürli hani natürlech keis! Aber der Räscht stimmt auso. Und i lose „Hot Water“, die südafrikanischi Band woni scho mou amne Konzärt gsi bi, und geschter äbe wider. Aber jezz mou aus der Reihe noche, süsch gitts nur es Puff.

S'letscht Mou Blog gschribe hani vor über eire Wuche. Es isch bau nümm eifach, Zyt z'finge für das! Auso, es isch jo no nie würklech liecht gsi, aber es isch definitiv nid eifacher worde. Aber was me nid aus macht für Fründe und Familie deheim! Vor auem weme bedänkt das ig soz'säge NÜT ghöre vo de meischte wo äuä hie mi Blog läse. Aber dasch es angers Thema...

Auso, vo vore. Nach mim gmüetleche Sunnti vor ere Wuche bini de guet id Wuche gstartet mit emne früeche morge. Am Nomittag heimer gäng wie gäng Lab meeting gha, und am haubi 6i hani widermou abgmacht gha zum Seckle mit de Giele. Ha der Dave und der Ruan scho bau lang nümm gseh gha! Mir si de wider öppe es Haubschtüngli gsecklet, und i säge öich, i ha so Müeh gha! Bi auso gar nid fit gsi. Klar, ha mi vilech no chli müesse vom Château und so erhole, aber isch auso gar nid schön gsi! Aber i has überläbt. Nachem Seckle bini mitem Dave go Znacht ässe. Der Ruan isch nid so guet druff gsi und hett gmeint, är wött vilech no eis go zieh. Der Dave hett aber nachem Znacht grad müesse go schaffe – isch im Momänt ziemlech usglaschtet wiuer sini 2 öutere Söhn so viu wie möglech wott gseh wiu si am 6. Juli nach Australie uswandere mit der Mueter. I ha de im Ruan abotte, är chönn mer schribe wener eis wöu go zieh... und chuum bini deheim gsi vom Znacht mitem Dave hani es SMS becho vom Ruan. De bini haut wider ufs Velo und zrugg id Stadt und ha mi mitem Ruan ufne Drink troffe. I gloube, är isch rächt froh gsi hetter eifach öpper gha zum chli rede und es Bierli zwickle. Um die 11i ume bini de wider deheim gsi.

Am Zischti Nomittag isch der Dave (mi Chef) is Büro cho und hett gmeint, i söu doch schnäu usecho, är wöu öppis bespräche... Är hett mi de jedefaus nur wöue froge, öbi am Obe Zyt hätt zum zu ihne hei go Znacht ässe ;-) I ha natürlech die Iladig gärn agnoh, und är isch mi de am 6i deheim cho abhole (är hett gmeint mitem Velo sigs z'witt... isch zwor nid so, aber i ha ihm jo nid dörfe widerspräche). Ha de e Fläsche Wyy brocht, und die heimer ou grad tütscht. D'Carla isch ou iglade gsi. Es hett Wraps gäh mit Poulet und so. Mmmmhh! Mir heis mega guet gha, är und sini Frou (Corlia) si mega nätt und es wird nid nur über s'Schaffe gredt. Si hei mi zum Bischpiu gfrogt, wieso dasi de nie deheim sig und wasi so mache, und si erschtuunt gsi dasi scho so viu Kollege ha... und vom Château hani natürlech ou verzöut. Der Dave hett de gmeint, i heig anschiinend scho die richtige Kollege. Woner rächt hett hetter rächt! ;-) Ehjo, i go jo de sis Huus go hüete wenn si ide Ferie si Afangs Juli (nächscht Wuche) – das wird nätt! Ha de e Putzfrou und Wöschifrou und so.

Am Mittwuch morge bini wider sehr früeh im Büro gsi, und de hani e chlinnere Schock erlitte wo d'Elrike is Büro cho isch. Si hett verzöut, dass ar Di ihre Hung, d'Shila, es Oug verlore hett am Zischti Obe. Me wüssi nid was passiert sig, nur dass si irgend e krasse Schlag ufe Chopf becho hett und eis Oug der ganz Tag dusse gsi isch, bis d'Di de hei cho isch um die 7ni am Obe. D'Shila cha äbe frei dusse umeseckle wenn d'Di am schaffe isch wiu ihres Huus ziemlech abgläge isch. Und d'Shila isch sech das eigentlech ou gwöhnt. Aber irgendöppis megs schlimms mues passiert si ume Mittag ume...niemer hett gseh was, niemer hett se zum Tierarzt brocht, niemer hett ihri Nummere gha zums ihre säge... I ha gwüsst dases ihre extrem scheisse mues go und ha de grad beschlosse, dasi se go zum Zmittag go bsueche (si isch natürlech nid cho schaffe). I hare es SMS gschribe zum froge wies geit und mi Bsuech akünde. Bi de vorem Mittag go Schoggi choufe (nur die beschti!) und zu ihre ufe biket. Ha öppe 30 Minute mitem Velo zu ihrem Huus, und ha no extrem Gägewind gha! Aber was me nid aus macht fürne Kollegin... Si hett sehr schlächt usgseh... aber sich entsprächens gfröit abem Bsuech! Si isch extrem froh gsi isch si nid so elei gsi, und hett sech tuusig mou bedankt (und si isch eher eini wo nid übertribt – eher s'Gägeteu) und sogar am Schluss glachet und über verschideni Theme gredt. Si isch abglänkt gsi fürne Momänt, genau wasi ha wöue! ;-) I ha de haut chli lenger gschaffet am Obe wiui so lang Mittag gmacht ha (mit häre und zrugg bike und so...) und bi de haut nid auzu lang is Fitness am Obe. Vor auem bini ou no go Tanze! D'Carla hett jo wöue Sokkie lehre, und obwou dass si immer schlächt übere Johann gredt hett hett si de gmeint, oh, wenn är chönn tanze wöu si doch das grad vo ihm lehre. Durum heimer de am Miittwuch Obe zum Tanze abgmacht gha. Am 8i hett mi der Johann abghout und mir hei d'Jeanne und der Jeffrey im Opskop (so heisst der Club) troffe. D'Carla und der Thomas si eifach zersch mid uftoucht, de hani 100mou aglütte und de schlussändlech hett si abgnoh und gseit, si chöme chli – öppe e Schtung z'schpoot. Mir si de die einzige gsi im Club!! normalerwiis isch vou, aber wiu Uniferie si si aui Studänte wäg. Aber isch ou nid schlimm gsi, de heimer Platz gha zum lehre...und zum blöd tue! Während der Johann ir Carla Sokkie biibrocht hett und angeri Tänz hei der Thomas und ig wie blöd im züg ume Tanzet – ohni das eine vo üs e Idee gha hätt was wie geit. Aber mir heis luschtig gha! Ha natürlech ou mitem Johann no es paar Tänz gmacht. I liebe Tanze! Bi so glücklech weni cha tanze, es isch bau nümm wohr. No glücklecher weder süsch scho ;-) Öppe am haubi 11i hett der Johann gmeint, mir sötte vilech langsam hei – d'Joanne und der Jeffrey si scho früecher hei. Är hett mi de hei toh, und isch no ufnes Tee inecho (nei, nid was der dänket! Nur es Tee...). I ha de no d'Stärne erklärt becho – isch e mega schöni klari Nacht gsi!

Am nächschte Morge hani m 9ni es Meeting gha mitem Dave (Chef), bi aber natürlech scho früecher im Büro gsi! I bi de ou bau z'schpäät is Meeting cho wiu d'Di mit der Shila is Büro cho isch. Si hett gmeint, deheim würd si nur versuure und z'viu dänke und so... bi sehr froh gsi dass si so entschide hett! Süsch wäri se wider go bsueche zum Zmittag und hätt der haub Tag „verlore“. Eh, jedefaus ischs im Meeting drum gange, dasi e Workshop organisiere im August. Auso, es isch viu scho besproche worde und so, aber i übernime jezz d'Houptorganisation, irgendwie. Mues mi haut um „Details“ kümmere, wie Programm zämeschtöue, mit Lütt kommuniziere, Afroge versände, Züg verwaute etc... (nur zum's no schnäu erwähne: i ha jo süsch nt z'tue! Afangs Wuche isch ou no es Manurkript abglehnt worde mit Major Revisions, was viu Arbeit bedütet... und am Manuskript vo Colorado bini ou no dranne... und de am Review woni hie mues schribe über Risk Assessments... und de hani 1 bis 3 Vortreg Afangs Septämber... ahjo und eine afangs August a däm Workshop woni organisiere... i dänke, dir gseht s'Problem). Bi de jedefaus mit der Di go Suppe ässe zum Zmittag – mir hei beidi Luscht gha uf Suppe.

Am Obe bini de mitem Ruan go seckle am viertuvor sächsi – der Dave hett kei Zyt gha. Mir si de schnäuer gsi aus süsch, und i ha mi wider chli fitter gfüeut. Bi de ou nachem seckle no öppe 20 Minute ufs Velo im Fitness und 20 Minute go Ruedere.

Am Fritti Mittag bini mit der Di e angeri Suppe go probiere ;-) si hett jezz gäng d'Shila mitgnoh zum schaffe und es geitere jede Tag besser. I ha aube ghoufe Tröpfli id Ouge tue und so. Jo, und ar Di geits ou jede Tag besser... ha se ou gäng chli probiert abzlänke ohni mini Arbeit totau z'vernachlässige!

Am haubi 6i hani mit der Nicola im Fitness abgmacht zum ine Aerobic Stung z'goh. Nachdäm heimer grad dert duschet und si diräkt id Bar go Rugby luege mitem Ruan und 2 Kollege vo ihm. Es isch der Finau gsi vo de Juniore WM, Springboks gäge New Zealand! Und, mir hei gwunne!! ;-) Mir hei ou grad derte im Brazenhead Znacht gässe – isch auso super gsi! Und natürlech chli trunke und s'luschtig gha. D'Nicola und der Dolf hei mi de heibrocht.

Am nächschte Morge hani am achti bir Di abgmacht gha zum go Mountainbike. Ha auso öppe am sibni ufmüesse und de öppe 25 minute zu ihre ufe fahre zersch. De hani uf s'angere Bike umgsattlet und mir si los nach Jonkershoek is Nature Reserve. Mir hei die geilschte huere single trails abgfahre! I has so gnosse! Und i has vermisst... Mountainbike isch äbe scho de Hammer, vor auem i dere Landschaft! Und es hett o viu gueti Wäge und so! Und i ha überhoupt kei Angscht. Bi schnöuer aus d'Di aube dürab und mues weniger abschtiege (öppe nie...). Bi zwor ou scho mou bau ine Boum ine gfahre, aber so schnöu bini jo nid dass viu cha passiere. Und i ha jo – ändlech!! - e Velohöum! Mir si öppe 1,5 Schtung im Reservat gsi, de no öppe 20 Minute heifahrt, de unger d'Duschi und am haubi 11i bini vo de Jeanne abghout worde zum go Wyy probiere ufne Farm wo niemer devo weis und wo mega gueti Wyy macht (ou tüür!). Die Farm hett nur Frittig und Samschtig vo 11-13.00 Uhr offe und produziert nur öppe 12'000 Fläsche (vilech ou nid...aber emu mega wenig). Isch haut e chliine Familiebetrieb. De Johann hett die Farm könnt und de ou das Ganze organisiert. Es si öppe 6 Kollege vo ihm cho, und d'Nicola und de Dolf und de Ruan (han i iglade gha). Si emu de es rächts Grüppli gsi! Und natürlech het der Ruan e Kollegin vom Johan könnt...Stellenbosch isch so chlii hey! ;-) jede könnt jede... und i könne ou scho bau jede ;-)

Ha de während em Wyy teste es SMS becho vo de Carla öbi am Obe wett go Znacht ässe und Top Gear (e Outoshow) luege bim Thomas – är wöu mi ilade. So hett sech mis afänglech lääre Wuchenänd ziemlech rasant ufgfüut! Nachem Wyy probiere simer go Z'mittag ässe, de bini mitem Johann es paar Sache go erledige, wie es Bike bi sine Öutere ablade und es Teeli trinke derte. De simer uf die 7ni zum Thomas hei go Znacht ässe und Top Gear luege. Und uf die 12i hett mi de der Johann heitoh. Bi de ou grad ziemlech erschöpft igschlofe.

Am Samschtig düre Tag düre woni wäg gsi bi hei mini Vermieterin und Häufer – ändlech – Möbu i mini Wohnig gschtöut wo si scho lang versproche gha hett. I bi haut nid ume gsi (si hei mers ou nid zum Vorus gseit!) aber ha gseit, si chönes eifach inetue, i luegi de säuber wienis irichte und so. Am Sunntig morge hani de ou grad Möbu umegschobe und nöi igrichtet. Jezz isches grad extrem gmüetlech! Ha e Büroegge, e Schlofegge, e Wohnzimmer-Egge mit gmüetleche Sässle und Tischli, e Chuchi-Egge (erwitteret mitemne chline Bürotisch) und e grossi Kommode im Igangsbereich zum Sache verschtoue! Würklech toll! 

mis nöischte Biud

Stube

me gseht ou mis zuekünftige Bike! yeah yeah...

Jo und während em Irichte hani es SMS vom Johann becho, öbi jezz wider gieng go bike... es hätt eigentlech s'ganze Wuchenänd ziemlech schlächt Wätter gmäudet gha, vor auem am Sunntig die ganz Zyt Räge. Aber isch de emu usser bedekt nid schlächt gsi. Mir hei de schlussändlech uf die 10ni bide Di abgmacht gha und si isch de ou grad mitcho. Isch wider e super ride gsi! Mir hei e Strecki gmacht wo d'Di süsch nid macht wiu si „z'schwirig“ isch. De Johann isch aube vorus, i hinde noche und d'Di am schluss. I ha natürlech nid ganz mitem Johann chönne mithaute, aber ha glich no es Wiili aube müesse uf d'Di warte. Bi mega froh hani kei Angscht! Macht viu meh Spass so aus wenn d'Chnöi zittere ;-) Und mit de Di gohni eifach mega gärn wiu mir hei es ähnlechs Level, Bärg ufe wie abe.

Wow, es schiffet immerno mega! Aber i bi jo dinne im Warme...;-)

Nochem bike hett mi de Johann no hei begleitet – mir hei jo beidi no e rächte Wäg vor üs gha (är öppe dopplet so lang wie ig). Und e haub Schtung nochdem i hei cho bi hetts afo schiffe! Mir hei so Schwein gha!

I ha de nid viu gmacht der Räscht vom Sunnti. Der Johann isch am Nomittag no ufnes Tee verbii cho und hett mer e elektrischi Härdplatte brocht zum bruche (das heisst, weni Pfanne hätt chönnti choche!! und die si mer ou versproche worde vo de Vermieterin...cha es Wiili go wiemer inzwüsche wüsse, hehe). Uf die 6i bini de is Büro zum go Skype mit Familie und Fründe, s'erscht mou sitti hie acho bi mit Video! ;-) Bi de (noch über 3 Schtung mitem Mike vo Colorado rede) am 12i ume wider hei und ab is Bett.

Am Mänti hani mitem Rob (Roberto; Kolleg vo de Di, bi ou scho mit ihm ufne Nightrun, isch Chef und Bsitzer im Restaurant „Asta la Pasta“, hett italiänischi Wurzle) abgmacht gha, dasi sis aute Mountainbike go go hole zum teste öbis wott choufe. I bi de nochem Schaffe dert häre gsecklet, und är hett mers no pumpet und aus. Isch es mega schöns, gseht us wie nöi, Marke GT, vore Fädergable. Füeut sech super a zum Fahre! Genau mini Grössi... auso, i dänke, das isch mis zuekünftige Mountainbike! Bi de demit heigfahre und zrugg is Büro gsecklet zum mis angere Velo abhole...und bi no inzwüsche ufne Hoger ufe gsecklet zum mit de Giele (Dave und Ruan) go stretche wiui nid mitne ha chönne go seckle.

Jo, de Grund wieso dasi nid mitne ha chönne go seckle isch fougende: d'Di hett am Nomittag usegfunge, das Hot Water ab Obe z'Kapstadt spiut. Mir hei de spontan beschlosse z'goh. I bi de mite Di ihrem Outo gfahre; phuu, isch auso nid eifach gsi! Ha gmeint, es chönnt jederzyt zämegheie! Und schtüüre brucht aui Chraft... aber mir si heil acho und de ou heil wider hei. S'Konzärt isch so inme spezielle Club gsi, auso, im Sport-Clubhuus (Barleycorn Music Club). Dä Club hett 32 Johr Jubilääum, und aui Lütt (oder die meischte) hei usgseh aus wäre si sitem Afang debii (auso, Durchschnittsauter über 50gi). Bide erste 3 Bands hettme de nid mou dörfe rede, niemer hett tanzet, schtier und komisch isches gsi. Bi Hot Water heimer de eifach afo tanze (gäng wie gäng) und de ou de haub Sau agschteckt! D'Band hett üs ou grad erinneret vom letschte Konzärt z'Kapstadt, womer ou die einzige gsi si wo tanzet hei ;-) Ehjo, mir hei die laami Buude ines Partylokau verwandlet fürne churze Momänt! Jo, leider nid auzu lang... un die 1 bini wider im Bettli am pfüüsele gsi...

nur so aus Zwüscheanekdote: es gitt Lütt hie, die hei ärnschthaft gmeint, i sig verhürotet – äuä wiui e Ring aha a däm Finger (dä mitem blaue Stei vo Colorado...). Luschtig!!

Hütt Morge hani wöue usschlofe, bi aber ou nid auzu lang im Bett blibe. Am Mittag bini wider go Suppe ässe mit de Di und Carla, de zum Znacht ändlech is Asta la Pasta zum Rob! Das isch es mega chliises, härzigs italiänisches Restaurant wo de Rob mit sine Öutere füert. Sis Mami isch de ou grad nätt gsi zu mir (d'Di hett mer do einigi Gschichtli verzöut dass si nie nätt gsi sig zu ihre und so...); und i ha e wunderbari, riesegrossi Lasagne verruumet ;-) Nachem Znacht bini no gfrogt worde für is Kino mitem Dave (Kolleg) und sine Giele, aber ha de beschlosse dasi ilech mou e Obe chli deheim für mi wett sii. Morn hani nämlech ou scho wider organisiert dass mer nöime id Stadt (Oude Bakkerij) gö go live Musig lose. Es si ou mehreri Lütt mire Iladig zum mitcho gfougt (Carla, Di, Dolf (d'Nicola isch die Wuche wäg und cha nid cho), Johann, Ruan und e Kolleg vo ihm). Es nätts Grüppli wetti säge! Eigentlech hätt d'Carla gseit gha, si organisieri wider e Tanzobe wie letscht Wuche, aber de hett si nie öppis organisiert und de plötzlech geschter gmeint, si wöu eigentlech gar nid go tanze – aber im Johann nüt gseit! Und jezz schtoh ig blöd to wiui eifach öppis angers organisiert ha...henu, mues de no mit de Carla rede. Isch chli es Huen.

So, und hütt Obe goots früech is Bett! Ändlech mou! Und hoffendlech hetts morn morge usgschiffet dasi schnöu chli cha go bike zum mis zuekünftige Bike usprobiere... I'll keep you posted!

Cheers!

Château

Am Donnschti bini äbe a das Braai zum Johann. D'Di hett am Nomittag beschlosse gha, dass si nid chunnt wiu si no öppis angers los gha hett am schpätere Obe und si gmerkt hett, dases ihre de nid längt zum dert häre go. I bi de auso biket zu sim Huus, isch öppe 20 Minute gsi oder so. Ha 4 verschideni Poulet-Spiessli kouft für ufe Grill und es Chääs-Tomate-Pesto-Dipp gmacht und Chips und Cider brocht. Es si no 3 angeri cho, der Jaco, isch der Nochber von Johann und isch ou ar Uni – hett e Ph.D. in Geografie. De isch der Phlip und d'Estelle dert gsi, die si verhürotet und si schaffet irgendwie aus Lehrerin vo öppis gloub ou ar Uni und der Phlip weisi nid, weiss aber daser eine vode beschte Chlätterer isch ir Umgäbig, wenn nid sogar im Land.

Eh, jedefaus si die Lütt sehr nätt gsi und mir hei gueti Gspräch gfüert und ou viu Seich gstusset – das gfaut mer äbe, weme nid gäng nur aus so ärnscht mues näh! D'Estelle isch bsungers cool, und der Jaco isch ou e luschtige. Und natürlech der Johann, aber das hani nid angersch erwartet ;-) es isch übrigens do so: viu Lütt (die meischte?) rede Afrikaans und Änglisch aus Erschtsproch. Viu rede aber ungerenang lieber Afrikaans. Da ig aber nid Afrikaans cha heisi de Änglisch gredt. Weni aber mängisch nid im Ruum gsi bi heisi gwächslet, aber chuum bini zrügg cho hei si wider Änglisch gredt – sogar zmizz im Satz gwächslet dasi jo nüt verpasse ;-) Das isch nid gäng so, und es näme nid immer aui so viu Rücksicht. Aber angerersitts wotti vilech chli Afrikaans lehre, und de wärs nid schlächt wenn Lütt ab und zue Afrikaans rede i mire Gägewart! Aber es isch auso gar nid eifach zum verschtoh! Si hei mer de chli probiert biizbringe. Mini Ussproch isch super heisi gseit – klar, wägem Dütsch – aber verschtoh isch würklech schwirig! Vilech packis jo mou... und s'Guete isch dasme jo nid würklech mues chönne rede. Wemes verschteit chame gäng no uf Änglisch antworte und si verschtöhs (e gitt nur sehr wenig Lütt wo nid beides chöi).

Auso, jedefaus isch mis Apero guet acho und mini Spiessli si super gsi! Ha aui 4 säuber gässe ;-) Und de nachem Ässe si der Johann und ig go tanze. I hs äbe scho vor Di ghört, dass är e sehr begnadete Tänzer isch, und är hett de mou abotte, mir Sokkie z'lehre, e typische Südafrikanische Tanz. Und das heimer de ou gmacht ;-) Am 10ni ume heimer mis Velo uf sis Outo packt und zu mir hei brocht, de simer i erscht Club go luege – dä isch zue gsi (niemer weiss wieso). De simer nöime id Stadt und dert isch de offe gsi. Es isch zwar fasch niemer dert gsi, aber das hett üs grad no passt wiumer de die ganzi Tanzflächi für üs hei gha und nid hei müesse Rücksicht näh uf angeri Tänzer ;-). Mir hei de zersch e Jägermeister hingere gschlöideret für s'Tanze chli z'erliechtere (oder so ;-)) - mi erscht Jägermeister eh und je – und de ischs los gange. Und jo, der Johann isch nid nur e super Tänzer, sondern ou e super Lehrer! I bi natürlech ou e flissigi Schüelerin und has grad glehrt, das Sokkie. Die einti wo üs zuegluegt hett hett gmeint: „Was, du machsch das s'erscht mou? Du hesch das jo huere schnäu glehrt! Gseht super us...“ und si hett de ganz fasziniert zuegluegt (aus würd me nid überau gäng Lütt gseh Sokkie tanze hie ;-)) Sokkie isch übrigens e Paartanz und isch nid wahnsinnig schwirig, vor auem mit mim Swing-Dance Hingergrund woni z'Colorado erworbe ha (tanze zu Country Musig). D'Musig isch nid ganz so cool und in Afrikaans, aber hey! Tanze isch d'Houptsach, und das fägt wiene Moore! ;-D Am 12i ume bini de heibrocht worde und i ha sagehaft gschlofe! Bi übrigens no iglade worde für am Samschti ines Château mitem Johann. Dasch wider chli e längi Gschicht.

Auso är hett bim braai verzöut daser äber dert häre mues go, und daser eigentlech nid wett go, aber wius sini Chunde si mueser fasch. Und är hett kei Usred gfunge und ihne schiints rächt wichtig z'sii. I ha no so Witzli gmacht und gseit, daser s'nächscht mou haut mües säge är heig es wichtigs Date a däm Tag daser nid mues go. De heter gmeint, die Lütt würde eifach säge, är söu das Date mitnäh... Do muesi vilech no afüege: är isch Architekt und hett s'Château designet. Jo und die Lütt wo s'Château ghört hei dert ab und zue so Aläss, wie äbe am Samschti. Es isch ou e Wyyfarm und Olivefarm und so. Der Alass isch gsi dass e Pianischt und 2 Sänger (Maa und Frou) Musical Lieder performet hei. Jo, und ig bi jezz äbe aus Begleiterin gfrogt worde (äuä zur Stroof wiui Witzli gmacht ha drüber...). Meh zu däm Alass später.

Am Fritti Nomittag bini ändlech widermou go seckle. Nur e Schtung zwor, aber es hett soo guet toh! Bi scho e Wuche nümm richtig go seckle! Ha scho gäng öppis gmacht (schwümme, bike, fitness...), aber haut nid seckle. De am 5i isch mi d'Di cho hole für zum go Znacht ässe und de a dä Schottisch Tanzkurs (Ceilidh) in Kapstadt. D'Carla isch ou mitcho und die meischte Lütt vor Hippo Insle. Mir hei üs de mit de angere zum Znacht troffe und si go vegetarisch Indisch ässe. I ha Vegetarisches Poulet Curry gha ;-) de simer äbe a das Ceilidh. Und es si aus so auti Lütt dert gsi usser mir (mir si aber e rächt grossi Gruppe gsi, meh aus 10 Lütt). De heimer agfange tanze. Zersch heimer Päärli müesse biude. I bi de mit dem zäme gange wo mi uf de Insle gfrogt hett, öbi ne wöu küsse (hani das erwähnt überhoupt? ;-)). Ehjo, de Paul. Ganz e nätte, aber speziell... aber ou e super Tänzer! Mir heis emu mega luschtig gha, die ganz Gruppe. Hei de ou gäng wider Partner gwächslet und rotiert und so, de hettme mit aune chli z'tue gha. Und gäge Schluss heimer so vierer-Gruppe gmacht und mir si grad 4 gsi vo üs Junge zäme, de Paul, d'Ruth, eini woni de Name vergässe ha und ig. Mir hei de es huere Gaudi gha bi dem Tanz und vou aus gäh! De hett de Lehrer gmeint, ei Gruppe machi das so fantastisch dass sicher aui wette zueluege. Die Gruppe söu doch bitte id Mitti cho und das nomou mache. Die Gruppe si mir gsi ;-) I bi de knaurot agloffe (no röter ausi süsch scho gäng bi) und ha mi bau nümm chönne häbe vor Lache. Aber mir hei üs super gschlage! ;-) Der Glen (hett das organisiert), e Kollegin vo ihm vo Amsterdam, ursprünglech Israel, d'Claire, d'Di und ig si de no eis go zieh ines Restaurant Don Pedro. Isch mega cool igrichtet gsi, und ou süsch nätt, gueti Musig und so. Und e guete Drink – meh wienes Dessäär – heimer gha. Wider e sehr glungnige Obe! Am 2 bini afe deheim gsi ;-)

Am Samschti hani de uspennet, nach 2 mou hingerenang schpäät is Bett...s'Wätter isch wider super gsi, chuum Wind, keis Wöukli, warm... i ha de zersch e Manuküre gmacht dusse und de hani mi is Bikini gschtürzt und bi go sünnele und läse und eifach s'Nütmache gniesse! Und mues chli a mire Farb schaffe ;-). Am 3 ume bini de chli go Velofahre es Schtüngli und de hani mi scho müesse afo parat mache für is Château. Schliesslech hett der Johann gwünscht dasi schön usgseh... ha mi de is chliine schwarze gschtürzt und die graue Schtifeli agleit, chli Maskara uf d'Wimpere, nätte Schmuck vom Mam – et voilà! Der Johann isch so beiidruckt gsi, är hett zersch gar kei Wort gfunge, und mer de der ganz Obe Komplimänt gmacht ;-) I bi no froh gsi hani mi so zwäg gmacht, es isch e schigge Alass gsi, imne wahnsinnig coole Schloss, mit aus schickimicki Lütt, und i ha soz'säge e presentier-Roue gha. Der Johann isch natürlech aune vorgschteut worde aus Architekt vom Huus, und de hani mi ou nid dervor chönne drücke, au dene Lütt s'Pfötli z'schüttle ;-) Si no intressanti Lütt gsi zum Töu, vor auem d'Schlossherre... mir hei zersch es Glüehwyy becho, de heimer e Shiraz probiert vor Farm säuber, de hetts Süppli gäh, und de isch s'Highlight vom Obe cho: d'Musig hett afo schpile! Die Lütt si eifach der Hammer gsi! Hei eifach so Klassiker us verschidene Musicals gsunge – wie lang hani scho nüt me serigs gseh!?! Und si super Sänger/Pianischt gsi! I hätt am liebschte grad mitgsunge... hett mi extrem packt! Bi auso schön froh gsi hani der Johann so azündet wäg däm Alass, süsch wäri vilech nie mitgnoh worde, hehe.

s'Château Beau Belle (ha leider keis bessers Fotti gfunge), designed vom Johann ;-)

Nach däm Ganze simer de go libanesisch ässe, und de no ines angers Resti go es Wyyli schlürfe (das ha de ändlech ig dörfe zahle!!).

Am Sunnti heimer wöue go chlättere (ändlech), aber de hett der Johann am Morge gmerkt, daser sech meh verletzt hett auser dänkt hett. Är isch go Bike am Samschti - riese lang und so single trails und so – und isch äbe gschtürzt. De hettim s'Handglänk so weh to daser äbe grad nid cha chlättere. Blöd. De hani mit der Carla wöue go wandere, aber chuum bini parat gsi zum goh und ufem Velo hani mega Chopfweh becho. De bini haut umkehrt, ha Tablettli gnoh und bi zrugg is Bett. Es isch de ou besser worde, und i ha haut wider e fuule Tag gha hütt. Aber das macht jo ou nüt! Defür hani wider e Blog Iitrag chönne schriebe! Und musig lose und singe... ;-)

Cheers!

Töfftour und Jubiläum

Guete Obe. Hütt isch es wichtigs Jubiläum: i bi sitt 2 Mönet z'Stellenbosch! Und es gfaut mer bau jede Tag besser (obwous mer jo scho am Afang extrem gfaue hett! ;-)).

Auso, zrugg zum Sunnti. I bi jo äbe am 9ni amMorge abghout worde für ufne Töfftour mitem Dennis, der Carla und em Thomas. Der Dennis hett e Töff-Jagge für mi mitgnoh dasi de nid chaut ha. Es isch strahlend sunnig gsi, aber haut scho nur so um die 10 - 15 Grad (isch jo äbe Winter hie, hani scho mou erwähnt? ;-D). Mir hei d'Carla und der Thomas bim Spar troffe und si los gfahre. Si hei mi gfrogt, uf welem Töff dasi hinge druff wett hocke, ufem Dennis sim Steer (oder so, e 400ccm), oder ufem Thomas sim BMW (1200ccm). Der BMW hett eifach nid so style dünkts mi, und i ha de im Dennis sine gwäut (ou chli wäg der Carla, wiu jo der Thomas ihre Typ isch wosi i ihn verliebt isch und so...). Bim erste Stop hani de dänkt, i probiere jez glich mou der BMW, vor auem wiu der Thomas aube chli schneuer gfahre isch. Und voila!! nachdäm isch d'Poscht abgange!! isch auso viu bequemer gsi! Und der Thomas hett aus gäh! ;-D Genau DURUM wotti afo Töff fahre!!! Yeah yeah...

der erscht Haut... gsehter der Schnee ufem hingerschte Bärg?

wär gseht s'Viech?

üsi Töffe

mini Kumpane

Mir hei imne nätte Dörfli (Tulbagh oder so) Zmittag gässe, si im ganze über 2 grossi Päss gfahre, hei Baboons gseh und d'Ussicht gnosse. Auso, isch e voue Erfoug gsi! Nur gäge Schluss simer dürnes huere chauts Tau gfahre!! s'Thermometer hett 10 Grad azeigt, aber es hett sech viu cheuter agfüeut! Deheim acho hani nid mou heiss chönne dusche wiui kei Gas me gha ha für d'Duschi! Henu, ha mi de warm igwicklet und no chli gschaffet. D'Di hett no gfrogt gha zum go Znacht ässe mit ihre und emne Kolleg (Rob), aber i ha nümm furt möge.

Am Mänti morge hani mi de prompt chli chrank gfüeut: Hausweh und so. Eifach e grundsätzlechi Müedigkeit, Unmotiviertheit und Chränkeligkeit. I bi natürlech glich go schaffe, ha schliesslech müesse vorbereite fürnes wichtigs Meeting vo hütt (zu däm schpäter)! Ha ou einiges gschafft! Am Morge hett eini vom Büro (d'Doreth) zumne chliine Geburi-Imbiss iglade. Si hett nur öppe 12 Lütt iglade gha, ha mi rächt geehrt gfüeut dass ig ou debii gsi bi! Si hett Chüeche bache, süess und sauzig, und süsch no mega d'Sache brocht! So nätt!

D'Giele hei ou wider gfrogt zum Jogge, aber i ha jo scho lang mou wöue gone Nightrun mache im Jonkershoek Reservat. Der Rob hett de ou prompt gschribe, är gieng, i söu doch ou cho. De hani dänkt, entweder leits mi richtig is Bett oder i füehle mi vilech besser. Und i bi gange. Der Rob isch mi de ou nätterwiis go abhole am sibni (der Rob isch äbe e guete Kolleg vor Di und er isch haub Italiäner und füert es italiänisches Restaurant in Stellenbosch. D'Di hett mi sicher scho 5 mou gfrogt zum dert go ässe aber i ha nie chönne! Wott aber unbedingt mou go, sitt mer s'erscht mou drüber gredt hei gluschtets mi!!!). Jo, es isch huere chaut gsi, huere dunku...und die angere wo si mitcho vo dere Löifergruppe si uhuere fit! Und i ha nüt gseh wiu mis Lämpli scheisse gsi isch und d'Briue agloffe. Und i ha mi so unfit gfüeut! Die angere si mer nur so um d'Ohre gsecklet, und ig bi meh oder weniger nur so usser Atem im Züg ume gschtoglet! Aber hei, dä Schtärnehimmu! Das chöiter öich nid vorschtöue... sicher Millione vo Schtärne woni no gar nie gseh ha! Ehjo, es hett sech glohnt, aber das Trail-Running isch auso angersch! Und de ersch no im Dunkle! Mues ou mou es bessers Lämpli choufe...(aber es isch auso nid nur ar Sicht gläge ;-))

Eh, i bi nid gschtorbe, und was di nid umbringt macht di schtarch. Nid?

Am Zischti Obe hani mit der Nicola abgmacht gha für is Fitness. Nachdäm bini hei (si hätt mi no zum Znacht iglade gha, aber i ha ou gwüsst dass si eigentlech süsch scho gnue um d'Ohre hett im Momänt. Und i bi gäng no chli chrank gsi...) und de ou mega früeh is Bett. Bruche das gloub im Momänt chli!

Hütt hani äbe das wichtige Meeting gha am Nomittag. I ha müesse vorschteue, wasi bis jezz usegfunge ha und wo dasi Imput wett und wasi für Froge ha und so. Isch ou sehr guet gange dünkts mi, und jezz chani richtig afo loslegge mit schriebe! Afangs Ouguscht mueses de fertig si.

Der Dave hett gfrogt gha öbi wider wöu cho Schutte mit ihm und de Giele, aber i ha das für nid sone gueti Idee ghaute, vor auem wius dusse rächt chaut isch wägem Wind und me bim Schutte huere schwitzt. Und i bi haut gäng noni 100% fit. I bi de eifach gschwing ine Fitnesstung dasi glich chli Bewegig gha ha, und bi de go ichoufe für Morn es Braai bim Johann (mi zuekünftig Chlätter-Kolleg ;-)). Mir hei üs jo ersch einisch troffe zumne Znacht mit der Di zäme, und jezz hetter mi grad zumne Braai bi sich deheim iglade. Isch das nid nätt? ;-) Sicher ou totau ohni Hingergedanke, wie au die angere Giele hie ou ;-D Ehjo, jedefaus gohni morn dert häre und hoffe, d'Di chunnt ou. Und jezz bini scho wider müed und go de wider früeh is Bett. Morn wirds äuä schpäät und am Frittig ou (go nach Kapstadt mit der Di und de meischte, wo uf d'Insle cho si dennzumau; es isch sone Schottische Tanzkurs... loh mi lo überrasche!).

viu los...

Am Zischti simer jezz äbe dä Fium go luege „Snow White and the Huntsman“. i ha im Alex und am Ruan zersch es SMS gschribe gha mir gienge Cinderella go luege ;-) si hei mi de deswäge die ganz Zyt höchgnoh und gseit, wenn si gwüsst hätte, wele Fium würklech louft, wäre si nid cho...blödi Cheibe!! ha gloub genau die richtige Kollege gfunge: i bruche jo das ;-)

D'Nicola isch mi churz vor de haubi sibni cho abhole und mi si de wider is gliche Restaurant wie s'letscht Mou womer is Chino si: dert gitts jo äbe das 40%-Rabatt-uf-Pizza-und-Pasta-Special aube am Zischti. Mir hei e Tisch für 6 Lütt reserviert gha, und ig bi die einzigi gsi wo meh aus 3 (auso, aui) kennt hett – ig wo am wenigschte lang hie bi ;-) und eigentlech hett jo ursprünglech d'Nicola dä Obe organisiert!

Ehjo, d'Carla und der Alex hei sech guet verschtange – so guet sogar, dass bau niemer angersch es Wort mitem Alex hett chönne rede. D'Carla cha sehr veriinamend (oder wieme däm seit) sii. Hani i däm Fau eher fräch gfunge, schliesslech hett sie ou bau mit niemer angerem gredt, und d'Nicola hätt vilech die Lütt ou gärn chli kenneglehrt! Und am Sunnti bim Wandere hett si kes Wort mit öpper angerem aus em Barnabas gredt... ehjo, i wirde mini Lehre drus zieh...

Ehjo, der Fium isch sehr speziell gsi. D'Nicola und ig hei beschlosse, dasmer der Huntsman toll finge – leider heimer de am nächschte Tag usegfunge, daser verhürotet isch und grad Papi worde isch, henu! :-D

Am Mittwuch hani de abgmacht gha für am Obe mitem Dave und sine grosse Giele go Schutte. Ha mer scho z'Amerika überleit gha, mit Schutte azfoh, aber dasch mer de chli z'ärnscht gsi, so ines Froueteam z'goh. Ha lieber so wöue afo wie denn aube vor öppe 20 Johr ufem Schueusi (Schueuhuusplatz ;-)); denn womi d'Giele vo mire Klass aube vor der Schueu und churz nachem Mittag si cho abhole zum go Schutte. Und öppe so isches de ou gsi! Der Dave und ig hei gäge sini 2 Giele und e Kolleg vo dene gschpiut. Mir hei aus gäh! I ha gar nümm gwüsst, wie aschträngens so Sprints si! Und die cheibe Giele hei Energie, isch nid normau. Aber i ha mi guet gschlage. Si hei mer gseit, i sig s'beschte Meitli wo jeh mitne gschpiut hett ;-) Isch e spannende Match gsi, aber der Dave und ig hei schlussändlech verloore. Nachem Schutte simer de hei ufnes Tee und de bini hei wiu der Dave hett Znacht gmacht für d'Giele...und i ha sowieso no angeri Plän gha ;-) Churz bevori ufbroche bi zum go Schutte hett mer d'Di gschribe, si gieng am Obe ines Restaurant wo si Live Musig heige, e Kolleg vo ihre (der Rob) und Kollege vo ihm gienge ou. I ha de, deheim acho, gschnäu duschet und mi chli schön gmacht, und 10 Minute schpeter isch mi d'Di de ou scho cho abhole! Perfekts timing, wetti säge! Isch de super gsi die Band. Der Bass-Spiler isch auso ersti Sahne gsi (auso, nid hübsch oder so, aber e hammer-Spiler!!). D'Di und mi hetts vo Afang a gjuckt zum Tanze, aber mir hei de ersch am Schluss würklech toh. Es hett süsch niemer tanzet und es isch ou nid würklech es Tanzlokau gsi. Aber üs macht jo das nüt us ;-) es isch übrigens es mega schöns Restaurant, mir si dusseghocket und es hett es Füürli gha und so. Und d'Menucharte hett ou mega guet usgseh, ha nur denn kei hunger gha. Aber i go definitiv mou dert go ässe!

Am Donnschti Obe bini bim Dave zum Znacht iglade gsi. Mir hei zersch no wöue mitem Ruan go seckle, aber s'Wätter isch der ganz Tag schrecklch gsi: Räge vom schtrübschte, Wind, chaut... Mir si de nid gange und der Dave isch mi cho abhole wius immerno grägnet hett und wius scho schpäät gsi isch (haubi achti). Mir hei de chli mitem Zane gschpiut, sim Baby – auso, wiu ig nid weiss, was mit Babies mache, hani ne meh oder weniger nur agluegt. Aber är hett mi emu immer aglächlet und so, isch es extrem fründlechs und glücklechs Baby! Und dä Cheib grännet jezz nie (das hani vom Dave beschtätiget becho, und dä wirds jo wüsse).

Wo der Dave der Zane is Bett toh hett hani afo choche. Mir hei so öppis Südafrikanisches gmacht (Bobotie oder so heissts gloub). Isch so Hackgleisch mit spezielle Gwürz und Wyybeeri und Ei und Chutney und so gsi. Hei Riis derzue gmacht. Mmmmhhh!! und zum Dessäär (wo hie generell „Pudding“ heisst) hetts Milktart gäh. Bi rächt verwöhnt worde! Mir hei de no American Pie 2 gluegt. So luschtig gsi! Ha mi grad 10 Johr jünger gfüeut :-D

Am Fritti hani am Nomittag es Skype-Date gha mit der Christ vo mire Arbeitsgruppe in Colorado. Si hett es nöis Experimänt planet und hett mi um Input gfrogt. D'Ruth isch anschiinend immerno nid würklech e Hiuf für ihri arme Studänte... Eh, mir hei de öppe e Schtung telefoniert und es hett guet toh, wider chli mit Colorado in Kontakt z'sii. Ha mi grad gfüeut aus wäri wider dert – fürne Schtung ;-)). Und bi de ou wider froh gsi, das die Zyt mit der Ruth verbii isch. Am Fritti Obe hani – ändlech – nüt los gha!! I bi de trotz Räge ändlech wider mou go seckle! Bi zwor bis uf d'Chnoche nass worde und ha absolut nid möge, aber es hett sech glich guet agfüeut! Deheim acho hani mi i mi nöi Badmantu mit Tweeties druffe gschtürzt und zersch chli telefoniert für öppe 2 Schtung mit deheim und Emilie und so. Isch jo ou no im Mam si Geburtstag gsi!!! De hani chli zeichnet. Ha scho so lang widermou wöue, aber eifach gäng z'viu los... hätt eigentlech das Wuchenänd nüt los gha, aber de hett d'Carla am Fritti Obe öppe am 9ni aglütte, öbi am Sunnti mit ihre, em Thomas und em Dennis (am Töff-Lehrer) wöu ufne Töfftour cho. Da hani natürlech nid chönne nei säge! Und mit der Di hani am Fritti Nomittag abgmacht, das mer wenns nid rägnet gö go mountainbike am Samschti. Und de hani mit der Nicola no abgmacht gha, dasi ihri Wohnig go go aluege und dasmer vilech zäe gö go schwümme. Schlussändlech hett i Samschti so usgseh: i bi uf die 9ni go schwümme, ohni d'Nicola, aber si isch mi am 10ni vor Badi cho abhole für d'Wohnig go luege. Es isch e härzigi wohnig, aber i mues mer das gründlech überlegge öbi wott zügle... d'Nicola hett mer ouno vomne Rugby Game verzeut vom Samschti Obe, wasi natürlech ha wöue go luege. Aber zu däm schpeter. Uf die 11i hett si mi zrugg brocht, de bini hei go choche und woni ha afo ässe hett d'Di aglütte und gfrogt, öbi mit ihre wöu cho ässe. I ha de nei gseit, aber mir hei abgmacht, dass si mi nachem ässe chunnt cho abhole für zum go bike. Während em ässe hani no der Obe organisiert: paar SMS gschribe und mitem Ruan und Alex abgmacht für ire Bar s'Rubgy game go z'luege... d'Di isch de um die 2 ume verbii cho und mir si zäme zu ihre gfahre. I ha s'erscht mou sitt äuä 20 Johr e Veloheum annegha, ha jo dä vor Christine becho. Bir Di deheim hani de uf s'Bike vore Kollegin gwächslet und mir si losgradlet richtig Jonkershoek. Zersch simer eifach ufere naturstross gfahre, und de gäge Schluss heimer uf single trails gwächslet. Mann, i has so vermisst! Bike isch soo cool!!! Auso, eini vo de nächschte Missione isch, es Bike z'finge... aber zum Glück hani nid 100 angeri Missione scho am loufe!! :-D i bi de e ganzi Schtung z'schpäät ir Bar acho woni mit de Giele zum Rugby luege abgmacht ha...d'Di und i si öppe 3 Schtung ungerwägs gsi! I bi de hei und 10 Minute schpeter ir Bar gsi ;-) Ha de haut aune es Bier zaut und wider viu Schprüch müesse alose, aber si hei mi glich no gärn ;-). D'Springboks hei gwunne imte Testspiu gäg England.

Ou, Scheisse, mues go Dusche! Wirde ire Haub Schtung abghout von Dennis zum Töff fahre... huch!! Ehjo, soviu zum Thema nüt los das Wuchenänd!

Cheers!!

Veloheum und so...

Suennele am Samschtig (isch um die 25 Grad gsi)

Usgang am Frittig...

Die Tube isch ei Tag eifach vor mire Tuere ghocket und hett gwartet uf oeppis...si isch nid waeg, ou weni ganz noech zueche bi! isch aeuae chrank gsi oder so...

Hani scho gseit dass mini Vermieterin isch cho dae Veloheum verbii bringe? Si hett gseit, dae "choeni" (heisst muesi) bruche weni witter go go Velofahre... :-)

Pizza und Kino am Zischtig...

Usgang am Mittwuch (geschter). e haub Schtung bevori das Foetteli gmacht ha bini no am Schutte gsi... ;-)

Rugby

Am Sunnti simer auso go wandere. D'Carla hett mer zwor am morge am 9ni no aglütte wiu si die ganze Plän hett wöue übere Huufe wärfe und öppis angers mache – si hett anschiinend es Agebot becho wonnere besser passt hätt! Nachdäm i de gseit ha, i sig nid debii und göng wie abgmacht mit de angere go wandere, hett si de gmeint, de chiem si haut ou (abgseh devo hett si jo ou mitemne Kolleg abgmacht gha wo mitcho isch... das Meitli hett mängisch Ideeä sägi öich! ;-)). Der Kolleg vor Carla heisst übrigens Barnabas und isch vo Nigeria (är hett Sunntigschleider agha und nüt Picknick debii...weiss nid gnau, was die 2 zäme hei abgmacht, aber es hett nid dernoh usgseh aus wüsst är, was ufne zuechunnt). De isch no der Alex mitcho (eine vo de Seckli-Kollege) und im Dave sini grössere Giele, der Ryan und der Greg.

Mir si id Skeletton Gorge gange wo im Botanische Garte Kirstenbosch afoht und de eifach nöime der Bärg uf geit, zum Teil uf Leitere, zum Teil imne mega schteile Bach, zum Teil uf Schtägetritte und zu Teil uf angere chliine Wägli. Ab und zue isch chli Chlättere agseit gsi, und i ha ou es paar mou e Schue vou Wasser usem Bach zoge. Aber es isch jo warm gsi, de hett das nid so viu usgmacht! Z'oberscht acho hetts e Strand mit wyssem Sang gha und e Stousee wo fasch kei Wasser gha hett. Es isch eim auso scho sehr unwürklech vorcho, so nachere Wanderig dür Büsch und Wäuder und Bäch plötzlech e Strand vorzfinde! Mir hei de chli gschiferet i däm wo vom Schtousee übrig gsi isch und hei de beschlosse, e angere Wäg wider abe z'goh. Mir hei üs fasch verloffe, aber de schlussändlech dank emne nätte Herr wo üs ghört hett wider ufe richtig Wäg zrugg gfunge. Es isch aber e mega spektakuläre Wäg gsi, mit atemberoubender Ussicht! I würd säge, es hett sech glohnt! Mir si de fasch der ganz Wäg der Bärg abegsecklet – einersitts zum Chnöi schohne, angerersitts wius langsam dunku worde isch und wiu mer d'Wouke hei gseh der Bärg uf schliiche i üsi Richtig! Mir si de pünktlech bi Dunkuheit zrugg im Botanische Garte acho.

Der Dave hett de aui heitoh und i ha de no chli öppis chliises köcherlet (ir Mikrowäue) für mi, und bi de nümm auzu lang ufblibe.

Am Mäntig hätte der Dave, der Ruan und ig abgmacht gha zum seckle am Obe. I bi de zum Träffpunkt und dert isch d'hölle los gsi! So viu Outo und es mega Puff! I ha de scho dänkt, dases die angere 2 äuä nid zum Stadion schaffe (i bi mitem Velo gange, disi chöme aube mitem Outo). Ha de ou ganz viu Entschoudigungs-SMS und Arüeff übercho dass sis nid schaffe, und i ha de ou usegfunge, wieso sones Puff isch. Im Momänt isch hie z'Südafrika, oder gnauer, z'Stellenbosch und z'Kapstadt, Juniore WM im Rugby. Und im Stadion womer aube aföh seckle hett Südafrika (GO SPRINGBOKS!!!) gäge Irland gschpiut. Der Ruan hett mi de ou prompt gfrogt, öbi mit ihm wöu go s'Spiu luege. Natürlech hani das wöue, bi de schnäu hei go öppis wermers alegge und de ab go Tickets choufe. Es 2. Klass Ticket hett 25 Rand koschtet, e nummerierte Sitzplatz hätt 50 Rand koschtet (aber es hett nur no nid so gueti Plätz gha, de hani 2. Klass gnoh). Ha de der Ruan und si Papi ca. 2 Minute vor Spiubeginn troffe und mir hei no pünktlech es paar Plätz gfunge!

Der Ruan hett mer de nätterwiis immer d'Regle erklärt und so. Isch auso nid so kompliziert! Und i ha de glii mou usegfunge, dass d'Springboks immer wider der glich Fähler gmacht hei... heieiei, es hett eim fasch uf d'Paume brocht dass sis nid säuber ou gmerkt hei!! Jedefaus heisi de verloore.

Isch no luschtig gsi wie aui Zueschouer gäng irgendwelchi Afrikaans Fluechwörter und so hei usegloh...der Ruan hett gmeint, är chönn mers nid übersetze ;-)

Nachem Schpiu, wo 2 mou 40 Minute gange isch, simer de no id Stadt füre eis go zieh (ufe Fruscht abe!!). Dass mis Velo nid klaut wird hanis eifach mit id Bar gnoh ;-) Hie näme Lütt jo gäng wider ihri Velo mit i Geböide ine, sigs d'Bank oder s'Büro oder es Restaurant. Es hett ou viu z'wenig Möglechkeite, für s'Velo nöime azbinge, abgseh devo dass so viu klauet wärde! D'Di und ig hei jezz äbe vor, das z'ändere... wie ou immer! :-)

Hütt Obe hani scho wider grosses vor: am haubi 7ni wirdi abghout vor Nicola und em Dolf für zum go Pizza ässe und is Kino. Im Restaruant träffe mer de no d'Carla, der Alex und der Ruan (auso, aus mini Kollege, obwou dases ursprünglech d'Nicola organisiert hett – aber ihri Kollege hei irgendwie nid chönne oder wöue mitcho). Isch irgendwie no cool, dass mi im Dave sini Kollege ou für Sache froge, wenn är nid cha cho – und umgekehrt. Schliesslech bini jo ursprünglech mit ihm befründet gsi (macht das Sinn?). Findi sehr praktisch dass hie Manne-Froue Fründschafte nid so äng gseh wärde und nid sones „Problem“ z'sii schiine wie angerne Orte... (vilech gsehni das ou ou völlig fausch! Hoffes aber jezz mou nid... ;-)). Ehjo, jedefaus fröii mi scho der ganz Tag uf die Pizza und der Fium! Mir göh go „Snow White and the Hunter“ (oder so) luege. D'Charlize Theron schpiut dert mit – das isch e berüehmti südafrikanischi Schouspilerin (jezz äuä z'Hollywood, gloubi). Kennet der sicher! Eh, i haute öich ufem Loufende.

Übrigens: mi Plan isch äbe, der Alex mit der Carla z'verkupple. Beidi si so Psychologisch aghuucht und diskutiere gärn schtundelang – wenn nid tagelang – über Sache. Und der Alex isch single, und d'Carla ire unglückleche Sexbeziehig mitemne Typ, wo si meh vo ihm wott äber är nur ab und zue meh wott. Und är züglet jezz de sowieso nach Dütschland fürne Job. Und si jammeret mi immer vou. Und der Alex isch sehr nätt, und würd ihre sicher guet tue. Und der Alex suecht ou irgendwie e Frou. Und si si öppe im gliche Auter. Und i gloube, si hei ähnlechi Inträsse. Und i wett ändlech dass d'Carla ufhört, die ganzi Zyt vom Thomas z'rede! D'Wäut dräit sech nur um ihn (dasch jo ok, und i lose ou zue, isch jo mini Fründin. Aber i wett ou dass si haut glücklech wär und nid nur vomne Typ usgsützt wird...). Ehjo, mou luege. I bi gloub nid so talentiert im verkupple... Und d'Carla schiint mer nid grad ereit z'sii fürne Beziehig mitemne angere Typ aus däm Thomas, aber wenn si sech jezz kennelehre chönnt jo de vilech öppis drus wärde, wenn der Thomas wäg geit. Was fürne Plan!

Sushi

Scho wider bau e Wuche düre. Wo geit ou au die Zyt häre? Und scho Juni! Jesses...

Auso, nach däm wundervoue Wuchenänd hani wider guet id Wuche gstartet. Am Mänti Obe bini mit der Di und der Carla nach Kapstadt ane Green Drink event. Es isch dert drum gange, s'Velofahre z'Kapstadt z'fördere, was ig natürlech super finge und nur cha ungerstütze. Vor auem nachdäm dasi z'Fort Collins so sicher überau ha chönne dürebike und hie wird me duurend fasch überfahre, cha s'Velo niene abgschpliesse und no wenn mes nöime abgschpliesst wird klauet (aber das chame äuä nid ändere). Ehjo, jedefaus hei dert verschidenschti Lütt churzvortreg gha über ihri Projektli, über irgendwelchi Biker Gruppene, über planeti Sache etc... i ha mi de dert ou no grad mit 2 Froue troffe wo hei wöue ihri Chlätter-Schue verchoufe. Die hei beidi zuefällig i däm Quartier gwohnt und i ha de eifach mitne abgmacht zum d'Schue probiere. Leider si beidi Paar z'chli gsi. Mir he ou no der Glen (der Organisator vom Hippo-Insle-Usflug) und der Tino (ir Di ihre Argentinier – oder besser Ex-Argentinier) dert gseh und mit dene chli gschpröchlet. Der Tino verlangt äbe jezz vor Di, dass si ihn in Zuekunft ignoriert, wiu si ihn so verletzt heig und är das nid cha verchrafte. Handcherum hetter beschlosse, nachdäm är si nach Gäud gfrogt hett und si ihm das gäh hett wiu si sech schoudig füeut, anstatt zrugg nach Argentinie z'goh, hie e Job z'sueche und z'blibe. Dä macht auso so es Theater! Und ar Di geits gar nid guet wiu är si so unger Druck setzt. I bi frog hani keis serigs Gschtürm im Momänt! So Beziehige gäbe jo scho nur Problem – vor auem wenns haut us irgend emne Grund de haut doch nid so klappt wieme sech das vorschtöut...

Auso, zrugg zum Mänti Obe. Ufem Heiwäg simer de bimne indische Restaurant verbii und hei öppis z'ässe ghout. Mega scharf gsi, aber guet!! Öppe am 11i oder so bini de deheim gsi.

Wäg däm Usflug hani natürlech mis obligate Seckle mit de Giele (Dave, Alex, Ruan) verpasst. Durum bini de am Zischti Morge früeh go seckle. I bi am 4i ufgwacht und ha nümm chönne ischlofe. De bini am 5i ufe und go seckle. Es isch stockdunku gsi, und i ha mer grosses vorgnoh. I ha bis zum Gate ufe wöue seckle, 16 km hin und zrugg. Nach öppe 5 km hetts chli afo rägnele, aber de wider ufghört. I has de sogar zum Gate ufe gschafft und ou no möge zrugg seckle – emu fasch. Es paar 100 Meter vom Huus wäg bini gschtoglet, und da i natürlech ziemlech müed gsi bi (da früeh am morge und scho meh aus 15 km gsecklet) bini umgfloge. D'Chnöi si offe, und d'Hose hei chlini Löchli. Aber hei, es hätt chönne schlimmer sii! ;-) I ha nur müesse lache, aber es hett HUERE weh toh! I bi de grad unger d'Duschi zum der Dräck abwäsche – wow, hett das brönnt! Me isch sech so offeni Chnöi scho nümm so gwöhnt i däm Auter...:-) aber i bi jo hert im näh, seitme. Ha de Bepantene plus druff gschtriche und ab go schaffe! Bi am haubi achti im Büro gsi, aus erschti natürlech. Ha de der ganz Tag normau gschaffet, aber am 5i bini totmüed gsi und bi hei. Am sibi bini de is Bett go läse, aber gli igschlofe ;-) Ha übrigens bim seckle mis erschte wiude Stachutier gseh! Es hett sech auso glohnt...

Mittwuch morge hani am 7ni afo schaffe, ha äbe no es Meeting mitem Dave (mim Chef) gha am 2, am haubi 11i Abschieds-Tee vor Sekretärin, und am 1 Seminar bis am 2. Ha emu de s'Gfüeu gha, i sig gar nid mou so schlächt vorbereitet gsi ufs Meeting – aber i ha kei Ahnig gha, was de erwartet gsi wär. Und i ha jo nur öppe 2.5 Täg Zyt gha zum Vortschritt mache sitem letschte Meeting wiui s'ganze Wuchenänd wäg gsi bi.

Bi de gli nachem Meeting ines Fitness Center (nid mis) wiu si dert Chlätterschue hei gha zum verchoufe für günschtig. Ha de öppe 10 Paar probiert, und ou es Paar gfunge womer passt hei. Der Manager mett gmeint, i söu e Priis mache, är wüssi nid, wieviu die choschte. I ha de gseit, 400 Rand (soviu hei die angere 2 Froue wöue für ihri occasions Schue, und die im Fitness hei nöi üsgseh aber sige anschiinend ou brucht). Der Manager isch ganz happy gsi und hett mer se de für 350 Rand gäh ;-) good deal! De bini hei go s'Yoga Züg hole und ab is Training. I ha natürlech nd ufd Chnöi chönne, aber d'Lehrerin hett immer ganz diskret d'Üebige a mi ahpasst ;-)

Nachem Yoga hani mit der Carla abgmacht gha zum go Sushi ässe. Mir hei üs am achti ir Stadt troffe. Das Sushi isch auso der Troum gsi!!! I ha ouno zur Feier des Tages es Glesli Wyy gnoh – 110 Rand aus zäme. Und mir hei viu Sushi gässe – 3 verschideni Sorte und je 8 Rolle! Isch aber tüür für hie!

Donnschti isch wider e früeche Tag gsi ohni grossi Zwüschefäu. Hätt mitem Dave zum seckle abgmacht gha und mitem Johann (är chlätteret und hett gseit, är nähm mi mou mit – durum heimer üs äbe wöue knnelehre) und der Di zum Znacht, aber de hett der Dave abgseit zum seckle und i bi de um die 4i ume säuber gange (ha gmeint s'Znacht sig am haubi 6i, isch aber de am sibni gsi). I bi ufne Hoger ufe gsecklet, ir Nöchi vo dert woni aube mit de Giele goh, aber natürlech viu witter ;-) bi eifach amne Wäg noche obsi bis der Wäg ufghört hett. Isch auso extrem aschträngend gsi! Ou wius no so warm isch sitt ere Wuche! (auso, wott mi gar nid beklage...). Jedefaus bini e Schtung gange und de hei go dusche (chuum bini deheim acho hani es SMS vom Dave becho är gieng jezz glich. Naja, scho z'schpoot!). D'Di isch mi uf die haubi sibni cho abhole – si hett ursprünglech gar nüt vom Johann sine Plän gwüsst, mi ou mitznäh zum Znacht! I bi mer de chli komisch vorcho, wiui si eifach gfrogt ha, öb si mi chönn cho abhole – und si hett de vo auem nüt gwüsst ;-) Aber es hett ihre auso nüt usgmacht und mir heis ou super guet gha. Si ines Fisch Restaurant (Jimmy the fish) und dert hei si – surprise surprise – Country musig gschpiut! :-D Das hani do auso süsch no niene ghört! Aber wie teu vo öich jo wüsse hani mi mit Country z'Colorado agfründet, jo, i liebes sogar! Nachem Ässe, wo super gsi isch und no e Portion zum Zmittag am nächschte Tag hett gäh, simer zum Johann hei no es Teeli go trinke und sini „unromantischi“ Wohnig go aluege. Är isch Architekt und haut chli kritisch ;-)

Am Fritti morge hani „usgschlofe“! Das heisst, i bi öppe am 2 ufgwacht und ha sicher bis am 5i nid wider chönne ischlofe, aber de schlussändlech isch doch gange und i bi am sibni uf. Ha mer de Zyt gloh und bi ersch chli vor de 9ni im Büro gsi. Isch ou mou öppis angers bi Tagesliecht is Büro z'fahre und nid die erschti z'sii! ;-) I bi de nachem Mittag mit der Carla id Stadt wiui es Mätteli zum Zäutle ha brucht und für wenn Gescht bi mir übernachte. I ha de ou ändlech so Dosene gfunge für mi Tee dri – hani scho lang wöue! De bini wider zrugg is Büro no chli go schaffe und de mou churz voren dunkle hei.

Uf die sibni si d'Sofia und e Kolleg vo ihre u mir cho und d'Nicola und der Dolf hei üs abghout für ines Theater mit Znacht ässe und sore Afrikaans Band/Comedy Gruppe (2 Lütt). Es hett äuä niemer süsch gha wo nid Afrikaans gredt oder wenigschtens verschtange hett, was eigentlech ou Sinn macht ;-) Ha zum Znacht e RIESE Täuer Pasta mit Tomatesosse verrumet!! isch auso rächt es Erläbnis gsi, so Comedians zue z'lose weme se nid verschteit! ;-) Aber si hei ou chli Gitärrelet und dasch super gsi! Und jo, vilech lehri jo das Afrikaans de mou...

D'Sofia und ihre Kolleg hei gmeint, si wöue vilech do schlofe, aber wius de ziemlech gli fertig gsi isch si si de hei. Si hei mi ou wöue mitnäh uf Kapstadt und mi de am nächschte Tag wider hei tue, aber i bi so müed gsi und ha mi ou mou gfröit ufne Samschti woni nüt los ha! Bi drum de nid mit. Aber mues se de unbedingt mou go bsueche und mitne i Usgang ;-)

Ha übrigens es Heizöfeli vor Vermieterin becho! Uuuh isch das schön warm gsi i mire Wohnig!

Hütt morge bini de wider zum Gate ufe gsecklet, mitemne chliine Umwäg (auso öppe 17-18 km oder so). Bi ei Schtung und 45 Minute ungerwägs gsi. Aber i mues säge, i merke auso die ganzi uswärts ässerei extrem! Ha überhoupt nid möge!

Jo, und de chunnt no derzue, das mini Zeihe huere scheisse zwäg si. Tüe soo weh!! Und de hani no e Blotere becho unge am Fuess, froget mi nid wieso (vilech wiu d'Zeihe weh toh hei und i komisch gsecklet bi...). Ehjo, es blüetet und eiteret zu eune Löcher us (too much information!!?? :-DDD).

Wius so wunderschön und warm und summerig isch bini de use go läse und sünnele und chli schlöfele i Rase. De bini go ichoufe und ha dusse Zmittag gässe und wider chli plegeret. Das hani auso scho brucht! Ha ou es Summer-Röckli uspackt und d'Flip Flops agleit (nid nur wägem Wätter...). Speter bini de no chli is einre Reservoir go loufe und jezz hani ändlech mi Blog-Itrag fertig gschribe! Ha nämlech scho geschter agfange...

Hütt Obe hani ou nüt los. Go de no is Büro go Skype wiui hie grad kei Internet ha und de äuä früeh is Bett. Morn am Mittag wrdi abghout vom Dave zum go Wandere. D'Carla und e Kolleg vo ihre chöme ou, und im Dave sini 2 grosse Buebe und eventuell no Kollege vo ihm. Das wird wider e Sach!! S'Wätter isch wider so um die 20-25 Grad vorusgseit, Sunneschiin der ganz Tag... I packe de äuä no s'Bikini i ;-))