Summer II

I gloube, d'tatsach dasi ersch jezz über mi Geburtstag cha blogge wo meh aus e monet zrugg ligt seit einiges drüber us, wieso dasi das Wuchenänd chrank gsi bi und am fritti hei bi zum de mit Fieber im Bett z liide...i ha viu z viu los! Aber jezz höckli grad a mim chliine Salontischli, trinke es Teeli und isse es Breakfast-Muffin woni geschter Obe gmacht ha...mmmhh! Es schmöckt wider wie ire Bäckerei bi mir inne! Der JP schloft no, durum schribi jezz chli. Es isch sibni am morge.

Auso, zrugg zu mine Pünkt:

a) Wiehnachte - heimer abghacket, b) Nöijohr - passée, c) Geburtstag...

auso, wie gseit simer uf Kogel Baai go zäutle. Am 4. jäner si nur de JP und ig gsi. Mir hei der schönscht platz ufem ganze campingplatz usgsuecht – dasch per zuefau ou der einzig gsi wo frei gsi isch ;-). aber heis würklech super troffe! Ou d nochbere si cool gsi und hei sech grad mit üs agfründet. Mir hei s zäut chli absitts vo aune angere chönne ufschtöue, mit blick diräkt ufe strand und der ozean. Troumhaft! Mir hei de aus ufgschtöut und parat gmacht, und de am obe es füürli gmacht und köcherlet.

Am nächschte morge, mim geburtstag, hett der JP haut – wie meischtens – lenger gschlofe aus ig und i bi uf und ha zersch es chliises spaziergängli am strand gmacht – vvor der hustüüre, soz'säge. De hani mit usere nöie errungeschaft, em gaschocher, kafi gmacht für mi und de JP und has ihm is zäut brocht. Är isch so verschlofe gsi daser zersch gar nid checket hett, was los isch. Woner de ufgwacht isch und gmerkt hett, das ig ihm a mim geburtstag kafi as bett brocht ha, ischs ihm niene rächt gsi und är isch sofort uf und hett afo zmorge mache: späck und eier und toast. Mmmmhhh!! das isch de ou ganz köschtlech usecho, und mir hei mit sicht ufe ozean und wäue-grüsch zmörgelet – und i ha e SPA guetschiin becho fürne ganze tag spa und massage und pedicure und und und im beste spa vor umgäbig!! wow!

Gäge mittag si de es paar kollege irtudlet: d'Nicola und der Dolf si cho picknicke und chli cho bädle (auso, der Dolf hett s wasser nid so agmacht, aber i ha de d'Nicola begleitet). Der Paul isch ou schnäu verbii cho, isch aber nähr witter zu sine öutere. De isch d'Di cho, si isch ou über nacht blibe de bis am sunnti, wie der Dawie und d'Lise-Marii. D'Carla isch ou cho, und der Ricky und Simon und Stephan und 2 vo sine kollege und der Gerald (berüemte Blues-Musiker). Mir hei de brötlet und schpili gschpiut und bädlet und wasme haut so macht amne schtrand! I LIEBE geburtstag im Summer!!... Jo, der Gerald hett äbe no es Konzärt gha ganz ir nöchi, de simer no das go lose. Und de wider zrugg ufe zäutplatz go schlofe. E wunderbare tag!

Am nächschte morge heimer zmörgelet, de langsam zämegruumet wiumer hei wöue zude Christal Pools go. Für dert muesme aber es permit ha, wome ire angere stadt mues choufe, und nöime wo am sunntig zue hett. Südafrika widermou! Do muesch gäng permits für aues ha, wo irgendwo muesch choufe, aber sicher nid chasch am gate choufe zu dert wode häre wosch! Henu, mir hei de nid chönne go und si haut eifach nöime go picknicke. Isch ou gmüetlech gsi... aber zu dene Christal Pools müesse mer uf au fäu no!

Der nächscht punkt uf mire lischte wär jezz d) Flusswanderig, aber luege mer mou i mire Agända was do süsch no so derzwüsche isch... 11. jan: Braai Nadine und Daniel: die 2 (dütschi woni mou ufemne markt kenneglehrt ha) si id Di ihres cottage züglet wo sie uszoge isch. Si hei us däm ort es mega güetlechs heimetli gmacht!! i erwähne jezz nid aui chliine sächeli, süsch wärde mer nie fertig...;-)

auso, 19./20. januar isch jezz äbe die Flusswanderig gsi. Mir hei üs am 2i bim Dave (ja, mim aute kolleg Dave...) deheim troffe, dass der JP und ig hei chönne es paar giele mitnäh im outo. De simer nach Rawsonville gfahre, dasch öppe e schtung nördlech. Dert simer de ufne privati farm go parkiere und hei uses abentüür agfange. Der JP und i hei nid so rächt gwüsst, was üs erwartet und öb mer die richtige sache ipackt hei und vorauem, öb mer se GNUE WASSERDICHT ipackt hei! Wiu mir si nid öppe ane fluss gwanderet, uder amne fluss entlang... nei, mir si IM fluss gwanderet!und wieme sech vilech unschwär cha vorschteue isch das nid es eifachs wandere gsi, sondern es hett chlättere, schwümme, waate, vo-schtei-zu-schtei-gumpe und anderi akrobatischi höhepünkt beinhautet. Und das aus mit gepäck für 2 täg, wiu mir si nöime amne wasserfau uf de feuse übernachtet! Es hett sech usegschtöut dass der JP und i aus super wasserdicht ipackt hei, wiu womer bim schlofplatz acho si isch no aus inne im rucksack troche gsi. Mir si übrigens e riese gruppe gsi! Öppe 25 lütt, wiu der Dave no sini giele wo vo australie z bsuech si und kollege vo dene het mitgnoh, und viu angeri – ha nid mau mit aune gredt... ja mir si de ums campfüürli ghöcklet am obe und hei nätti gschpräch gha. De heimer vorem ischlofe no chli d stärne bewunderet... am nächschte morge hani de ou der muet gfunge vode feuse i pool abe z gumpe (öppe 5 meter vilech?). Wow, so cool gsi!! mir si de no chli flussufwärts gwanderet und heis eifach gnosse, irgendwo im nirgendwo z sii, ab und zue chli z bädle, and chli umezchlättere und d umgäbig z erkunde. Und z fulänze! Irgendwenn am nomittag heimer de usi sache packt und si wider zrugg zude outo gwanderet. Das isch es erläbnis gsi sägi öich!!! unvergässlech...

Diverses. D wuche druf hani es paar deadlines gha zum proposals ireiche. Die hani aui frischtgerächt igreicht, und i ha wider agfange meh z trainiere. Schliesslech hani mi ou ane triathlon agmäudet am 23. feb, und am 10. märz hani es grosses strossevelorenne (s'gröschte vo südafrika! Und ig starte rächt witt vorne wiui guet gsi bi amne angere renne! Yeah!).

Am fritti am 25. jäner hani wider d ruckseck packt und der JP und ig si ufnes witters abentüür. Mir si mit de mountainbikes und üsne nachtliechter (i ha ihm eis gschänkt uf wiehnachte) is jokershoek naturreservat gfahre und hei dert amne flüssli usi mätteli usgrout und dert übernachtet. Isch so schön ruhig gsi, und e wunderschöne blick uf d bärge und stärne und die schöni vegetation (mit invasive tanne...eh nei...dasch natürlech nid der schönscht teil gsi! ;-)). der mond isch so häu gsi, dases die ganz nacht nie ganz dunku worde isch... am morge heimer de dert zmörgelet und hei üsi sache wider packt. Mir si grad usem gate gfahre mit üsne grosse ruckseck wos ufgmacht hett, auso wo aui bsuecher inegschtrömt si. Die hei rächt komisch gluegt – uf mountainbikes mit so grosse ruckseck!?! ;-) an tag druf simer eifach z stellenbosch umegloffe und hei tourist gschpiut. Si go souveniers aluege, go ässe, und heis eifach gnosse, das schöne stedtli. Am sunnti heimer de mit der Di fürnes picknick abgmacht gha in Silvermine. Dert hetts ou e damm gha und i bi no chli go schwümme. Jo, wider e gmüetleche tag (i bi natürlech am morge am 6i gsi go seckle...so viu gmüetlechkeit wär de doch chli z viu!) ;-))

am mänti druf hani mis erschte (skype)-meeting gha mit mim masterstudänt! Jawoll, i ha e masterstudänt! Und zwar in London. Und zwar mitem Tim Blackburn zäme. Sehr cool! Das tuet mim läbenslouf ou wider guet! Ja, dä typ isch äbe vo london und isch – jawoll – 10 johr euter aus ig ;-)

s wuchenänd vom 2./3. feb hett der JP müesse schaffe wiuer e deadline gha hett. I ha de gseit i gieng ne glich go bsueche und nähm eifach arbeit mit. Das hani de ou gmacht, aber i ha natürlech ou wöue trainiere. De hani dänkt, wiui scho lang nümm strossevelo gfahre bi (nur jogget, gschwumme, und mountainbike gfahre...) wöui e lengeri fahrt mache. De hani gseh – wiui imne velo club bi (pedal power association) – dass z durbanville, wo der JP wohnt, es strossevelorenne isch am sunnti! De hani spontan beschlosse (ohni viu training) dert mitzfahre. I bi de am sunnti früeh uf und der JP hett mi a start brocht. I ha mi agmäudet und mini startposition bezoge. Woni de gseh ha wo die isch hani chli e schock gha: ziemlech witt vorne! Nun denn, de meine si äuä, i heig das verdient ;-) es hett e KRASSE wind gha, würklech extrem! I bi glii froh gsi, hani der start vor lengere tour (110km) verschlofe und mi für s chürzere (70km) registriert. Isch auso nümme schön gsi! I ha mi mit es paarne lütt während em renne agfründet, was der kampf gäge wind chli liechter gmacht hett, aber für die letschte öppe 20km, aus gäge wind, hani gmeint i schaffis nümm. I ha scho bau ufgäh...und de hetts gheisse, no 10km. Ok, 10km isch mer vorcho wie 30! aber hei...irgendwenn hetts gseit no 5km...no 3km....no 1km... no 500m (und i bi immerno vou überzügt gsi i schaffis nid is zieu!! ehrlech!!) und voila! Bini doch de no im zieu acho. Nach 3 schtung erbarmigslosem kampf gäge wind. Und dir weit gar nid wüsse wie viu lütt das mi no überhout hei ide letschte 10 km... i bi tot gsi nachem renne, aber ha e medaille becho (yeah!!), was mi ufgschteut hett....(PS: es hei aui eini becho wos is zieu gschafft hei) ---

---am nächschte tag hani d ranglischte gseh. I bi i mire auterskategorie (Elite: 20-29) under de froue 4. worde (vo 27). und im gsammte 185 vo 570. wow. I bi jo guet gsi! Ha ganz vergässe das äuä aui angere ou wind gha hei, hehe! ;-) jo, i bi zfride. Und i bi froh, bini nid 3. worde, süsch wäri no ufs podest cho, aber hätts verpasst, wiui nid dermit grächnet ha (mir si nid für d rangverchündigung blibe). Und es isch sicher es guets training gsi! Und wär weiss, vilech hani ou am 10. märz ou wind!?! und de bini de gwappnet! :-)

jo, das renne isch jezz e wuche här. Sitt denn hani mi immer chli chrank gfüeut am morge, nid so möge traninere, und bi eifach müed gsi. Vorgeschter hett sech de usegschteut wieso, woni mit fieber im bett gläse bi! Aber geschter isch mer scho viu besser gange, und hütt hani scho bau wider s gfüeu, i wett go traninere. Aber vilech sötti bis morn warte. Mues wider richtig gsung wärde, dasi füre triathlon cha trainiere, und fürs angere strosserenne...

letscht wuche isch no d'Ana, e nöie postdoc vo spanie, acho. I bi de am zischti mitere go s nötigschte ichoufe, und am obe simer bim Dave (chef) iglade gsi zum Znacht. Isch luschtig gsi, und s ässe super – wie immer! Dä Dave isch es multitalänt!

Der JP hett am donnschti e operation am Zahn gha. I hane id klinik brocht und si heine ine vounarkose versetzt!! wow! Für öppis AM ZAHN!?! henu, so ischs gsi. I ha de gwartet bis d operation düre gsi isch und im wartsau gschaffet. Ha gratis kafi und tee becho! Wo si fertig gsi si hettmi d schwöschter ghout und gfrogt, öbi schomou mitem dokter wöu rede. Der JP wärdi no chli schlofe...wow, i ha do e krassi roue becho! ;-) eh, i bi de bim JP ghöcklet während är ufgwacht isch, und nach öppe ere schtung ufwachzyt simer de hei. Är isch de is bett und i hanim suppe kochet... was fürne gueti fründin ig doch bi!!!??? i öppe 6 monet chunnter de si ersatzzahn über...

themawächsu. Jo, hütt isch gloub der perfekt tag zum wider Konfi mache. Mir hei Fige im garte wo niemer isst, de hani mi dene arme cheibe agnoh und scho mou konfi drus gmacht, ganz eifach mit fige und zucker. Der JP liebt se (wiener aus mis ässe immer liebt – schön dasers schetzt, nid?). Hütt wotti meh experimentell si: fige, zucker, schwarzi schoggi, und chilli chunnt dri. Mou luege!

Auso, auersitts e schöne sunntig! Und bis es angers mou! ;-)

fötteli hetts uf facebook.

Summer I

I mues vilech es paar Kategorie mache für die verschidene Grossaläss, wo sitem letschte Blog passiert si: a) Wiehnachte, b) Nöijohr, c) Geburtstag, d) Flusswanderig, und e) Diverses.

 

ai) am 8. Dezämber heimer mit mire Arbeitsgruppe bim John (eine vo mine Supervisor) deheime Wiehnachte gfiiret. I ha der JP ou mitgnoh (s‘erschte Mou amne offizielle Alass). Wiu mir jo Summer hei heimer de ou es Braai (Brötle, für die wos vergässe hei) gha, und jede hett eifach öppis brocht, wie e Salat oder so. S’Fleisch isch vode Bosses gschponseret worde. Mir hei de ou no Boggia gschpiut und aui si verwunderet gsi das sig so guet bi! Naja, jahrelangs herts Training mit de Familie zaut sech haut us! ;-)

 

aii) Am 21. Dezämber heimer de Wiehnachtsässe mitem JP sim Gschäft gha. Si hei es paar vo ihrne wichtigschte Chunde iglade, und aui Mitarbeiter mit Ahang. Das si de öppe 20 Lütt gsi, e luschtigi Rundi! Es hett säubergmachti Pizza imne spezielle Pizzaofe gäh (remember the good old times at home…), wo der eint vo ihrne Chunde bachet hett. De zum Dessärt hetts brönnti Crème gäh (wie aumbe bim Mumsti deheim! ;-)) mir hei natürlech der Pool ugsiebig gnützt und Pool-Volleybau gschpiut. I bi die enizigi Frou gsi wo mitgschpiut hett, und mis Team hett meischtens gwunne (oder so… ;-)). I mues do vilech zur Verteidigung vo mim Gschlächt no sage, das 2 vode angere Froue schwanger si, die einti Hoch und die angeri mit Zwillinge, drum heisi nid gschpiut. Aber isch auso e super glungnige Obe gsi!

 

aiii) Am 24. Dezämber heimer bim JP sim Mami (Pat) und Stifvatter (Tony) Wiehnachte gfiiret, mit Schwoscht, Sohn vom Tony (Ant) mit Fründin, und Grosseutere (jo, I ha d’Grosseutere kenneglehrt!). s’Wuchenänd vorhär simer no uf grossi Shoppingtour zum nätti Gschänkli z’finde. I ha dïdee gha das smir chönne s’Dessärt bringe, und eifach öpperem es Schoggifonduset schänke und de das grad bruche. Mir hei auso vorem Znacht öppe 10 verschideni Fruchtsorte gschnätzlet und schön agrichtet. Und de heimer brötlet (jede hett s Fleisch säuber brocht – isch so Tradition bim JP deheim) und fein gässe. De hett der “Father Christmas” (der Tony mitemne Samichlousehuet) d Gschänkli underem Boum verteilt und mir hei Gschänkli uspackt. I ha eis vo Pat&Tony becho – Schoggi und feini Pralinee und sone Kur für d’Huut (Haut uf Hochdütsch) z’Verwöhne! Der Tony (und eigentlech aui) hett wahnsinnig fröid gha am Schoggifonduset – si hei das natürlech no nie gha, und I ha es bitzli Schwizz I ihri Stube brocht! Si si usem Schwärme gar nümme use cho ;-) – Zieu erreicht!

 

aiv) Am 25. Dezämber, schlussändlech, heimer uf der Farm mit Kollege es letschts Mou gfiiret, meh e Pollparty gsi aus süsch öppis, aber cool! Jede hett müesse es Gschänkli zwüsche 100 und 150 Rand bringe und das ipacke, ohni Name dra. Undnjede hett öppis z’ässe brocht. Somit heimer es ganzes Buffet mit super coolem ässe gha, sehr divers wius Lütt gha hett vo öppe 5 oder meh Länder (momänt… Schwizz, Spanie, Dütschland, UK, Belgie, Südafrika, Zimbabwe… sötte gloub aui si). Wunderbar gsi! Mir hei de ou wider Pool-Volley gschpiut bis zum Abwinke, und de Gschänkli verteilt. Mir si im Kreis ghocket und hei es Gschänkli lo umegoh zu Musig, bis d Musig gschtoppt hett. Dä wo s Gschänkli hett, darfs uspacke. Teu Lütt hei die luschtigschte Gschänkli becho: e Drache, es ufblosbars Krokodiu, es Chnätti-Chnätt set, es Biud vom letschte Abendmau in 3D, es Kapstadt Touristeposter… I ha – wie hätts ou angersch chönne sii – e Lindt-Schoggi becho, und es Douche. Sehr praktisch!

So, aber jezz gnue vo Wiehnachte. Chöme mer zum nächschte Punkt: Nöijohr (das hetts nur einisch gäh).

 

b) mir he ibis zum letschte Momänt nid gwüsst, wasmer a Nöijohr söue mache, de heimer üs churzfrischtig entschlosse, mit der Di und es paar vo ihrne Kollege z’fiire woni ou könne. Mir si uf Kalk Bay wo 2 vo dene wohne go fire. Si wohne imne Huus wome diräkt ufe Ozean gseht wor Stube us! Mir hei de – wie chönnts ou angersch sii – es Braai gha. Hei wider viu guets z’ässe gha, viu diskutiert, und si aui gli müed worde. Si haut ou au rächt aut gsi (paar über 40gi…). Isch gmüetlech gsi, aber ou chli laam fürne Siuveschter… Aber mir hei jo 100 mou Wiehnachte gha mit viu Action, de heimer ou mou chli e ruhigeri Zyt brucht ;-) si de sogar no hei gfahre nachem Fescht – das zeigt ou, wieviu (oder äbe wie wenig!) dasmer trunke hei…

 

c) Geburtstag. Mit Geburtstag isch natürlech mi Geburtstag am 5. Januar gmeint. De JP und I hei e Campingplatz buechet in Kogel Baai (diräkt am Strand imne Naturreservat) für vom 4.-6. Jäner, und am 5. am Nomittag/Obe Kollege zum Picknick und/oder Braai iglade. Die erschte Lütt si de nachem Mittag mou cho, und mir si dert ghöcklet und hei Picknicket und si chli go bädle… Fortsetzung folgt!!

 

So, ha grad sehr viu und wichtigi Arbeit zrugg becho, und mues schaffe… wired nid derzue cho dä Blog hütt fertig z’schribe. Bis es angers mou!

Happenings & Happiness

Guete Tag! Jezz hani auso sones schtrubs Wuchenänd gha, das muesi eifach teile mit öich. I probiere jezz gar nid ersch, aus z verzöue wo ide letschte – wieviu?? - öppe 5 Mönet passiert isch woni nid blog gschribe ha... das wär scho chli übertribe. Aber soviu chani vilech zämefassend säge: i bi id Schwizz hei go Familie bsueche und ane Workshop, de nach Spanie anes Meeting und Konferänz. Was Sport betrifft: i ha es 100km Mountainbike renne gmacht (Karoo to Coast) und 6:10h brucht, ha mi erscht Triathlon gmacht und bi 8. worde vo über 50, und ha es Strossevelorenne gmacht, 92km i 3:17h. De hani 2-3 Paper veröffendlecht – auso, nid aui i dere Zyt gschribe, aber eifach akzeptiert becho (nur dass der gseht, dasi näb au dene Freizytsache ou ab und zue chli schaffe...). Und vor 2 Mönet hani es Outo kouft, was mis Läbe ziemlech drastisch veränderet hett – nöii Freiheite, nöii Abentür, aber vor auem ou viu nöii Lütt i mim Läbe!

Aber jezz zu mim Wuchenänd:

am Frittig nachem Schaffe bini nach Durbanville uf d'Farm wo mini nöie Kollege (und der JP) wohne. Vilech muesi glich no chliii ushole wäg däm JP. Auso, i ha im Internet nachemne Outo gsuecht, und de hani verschidene Lütt aglütte öbi s'Outo chönnt teste. Die meischte Outo hett öpper angers für mi agluegt wiui kei Ahnig ha vo Outo, aber der eint Typ hett de gmeint, är chöm uf Stellenbosch zum mir s'Outo zeige. Das isch de ou passiert – und är und ig hei üs grad im erschte Momänt inang verliebt. Dä Typ isch äbe der JP (Jean-Pierre). Sitt denn bruchi äbe s'Outo meischtens für ihn uf der Farm go bsueche :-) (zuegäh, dasch e SEHR churzi Zämefassig gsi, aber dasch gloub aus woder würklech müesst wüsse füre Zämehang z'gseh...;-))

so, jezz wider zum Wuchenänd. Äbe, am Fritti bini uf d'Farm. Der JP isch de mega gstresst gsi wiuer amne blöde Projekt hett müesse schaffe. Aber item, am 10ni ume ischer de ou füre Momänt fertig gsi mit schaffe und mir hei de nümm viu gmacht a däm Obe. Am Samschti morge hetter de vernoh daser mues deheim blibe wiuer vilech mues schaffe. De simer go ichoufe zum choche und bache und hei agfange Zmittag mache: säubergmachti Gnocchi mit ere Tomatesosse. De heimer das gässe, si chli a Pool (uf der Farm hetts e Pool) zum verdoue und si de witter i die nächschti Rundi: Banana Bread. Das isch s beschte Banana bread worde woni je gha ha! (und gloubet mer, i ha viu gha – isch öppis vo mim lieblings...). Ansonschte simer eifach chli umeblätteret und hei uf Nachricht vo sim Klient gwartet - wo nid cho isch. De heimer no e Fium gluegt und si de is Bett. Am Sunnti isch de scho chli meh Action gsi: Am morge hett der JP beschlosse daser jezz gnue gwartet hett ufe Kliänt und dasmer öppis ungernäh. Mir hei de Brötlisache und Mountainbikes packt und si ines chliises Natur Reservat gfahre, womer chli hei wöue go Velofahre. Es hett dert ou Zebra und Eland und Springbok! Chuum simer aber losgfahre, hett sech mi Veloständer für ufs Outo afo löse. Mir hei de dä probiert wider feschtzmacht, aber das hett eifach nid wöue klappe. Mir hei de die ganzi Konschtruktion umgänderet, und no es Tool kabutt gmacht bim Versuech, der Ständer z fixiere. Irgendwie isch emu de schlussändlech gange und mir hei chönne is nächschte Abentür starte. Bim Reservat acho heimer d Bike losbunge – und der JP hett e Platte (Reife) bim Velo entdeckt woner hett müesse ufpumpe bevor mer hei chönne losfahre. De heimer es chliises Ründeli gmacht, und 2 angeri Velofahrer troffe. Mit dene heimer chli gschwätzt und si mitne gfahre, de hett der JP plötzlech e richtige Platte.

 

Jo wunderbar, die 2 Giele si de devor zoge und mir hei afo Pneu flicke. Me mues vilech no erwähne: es isch äuä über 30 Grad gsi! Kei Schatte, da keni Böim. Jo mir hei emu de munter gflickt und blödi Schprüch grisse. ig so: „nimm doch mi Erstzreife; wie gross isch scho d'Warschinlechkeit das mis Velo ou Platte hett?“ - der JP: „i finges no rächt cool, so Pneu flicke“ - „eh, vilech heimer jo Glück und chöi nomou eine flicke?“...und so witter. Jo, mir hei de üsi Fahrt wider ufgnoh, und Zebra und Eland und Springbok gföttelet, und d'Ussicht gnosse.

 

 

Churz nachere Chrützig („7.3km oder 21km was meinsch?“ „ach, näme mer doch 7.3km de heimer nähr meh zyt zum Brötle...“) hani e Platte entdeckt bi mim Velo. De luegi so mini Pneu a – und si si vou mit Stachle! Woni eine usezoge ha hetts mer grad Luft is Gsicht blose... ok, 2 witteri Platte (s'Unwarschinleche isch itroffe). Zum Glück heimer die de nid ganz müesse flicke, wiui so coole Schliim ide Pneu ha (wär hätt das dänkt? I weiss nid mau, wie das funktioniert, aber mit chli pumpe und Rad dräihe hetts de die Löcher gstopft).

 

I bi de – wiumer eh hei müesse haute, gschnäu id Büsch go bisle. De sägi no so: „i gseh sicher e Schlange! Mit üsem Glück...“ et voila! Chuum bini fertig mit mim Brunz gsehni öppis raschle im Gebüsch: e Schlange! Sicher e hochgiftigi wo eim cha töte (mir si nid ganz sicher gsi, wases isch, aber aui Möglechkeite wos hätt chönne si hei giftig tönt – mues de no nocheluege!)

 

Ehjo, mir si de no gschnäu a Strand chli go d'Ussicht gniesse und verliebt tue, und de heimer üs ufe Rückwäg zum Outo gmacht – mit mehrere Stopps zum pumpe (der JP hett wider Platte gha – mir hei äuä nid gnue guet gflickt!). Aber was macht ein das scho us weme im Paradies isch, mit eim vode liebschte Mönsche wos gitt uf dere Wäut? Und sogar mit Zebra?...

 

De simer zum nächschste Strand gfahre, wos Grillierplätz hett. Mir hei üs de installiert, Füür gmacht, Züüg uftischet etc., de chunnt e Wächter und seit, i 5Minute macht er s Tor zue! Yeah, wider üses Glück – s'Thema vom Wuchenänd!! Der JP isch de dene Lütt nätt go biibringe, dass mir leider müesse fertig brötle und drum nid i 5 Minute chöi dusse si. Die hei de gmeint, das sig ok. Auso, aui angere si de use gange und mir hei der ganz Strand und die ganzi Alag für üs gha! Ou d'Wächter wo de no cho si si immer a üs verbii gfahre – der eint hett no so gmeint: „gniesseds! Es isch schön, verliebt z'sii, nid?“ ;-)

jo, mir hei de gässe, und hei der Sunneungergang gluegt und die wunderschöni Ussicht ufe Table Mountain und s'Meer gnosse.

 

 

De isch langsam chaut worde und mir hei wider zämepackt und si zrugg uf d'Farm.

Jo, dasch eigentlech s krasse gsi vo däm Wuchenänd. Aber es isch jo e Fiirtag gsi am Mäntig (auso eigentlech am Sunntig, aber wenn e Fiirtag in Südafrika ufne Sunnti faut, de verschiebt me ne ufe Mäntig dasme glich e Tag meh frei hett – cool!) und de heimer no e Tag meh frei gha. Mir si de eifach chli a Pool go chille und s'Läbe gniesse. Es si no paar angeri vor Farm derte gsi – Sean, Ricky & Lily. Nachem Mittag simer de nöime a Strand ines Restaurant go Seafood ässe mit Ricky und Lily, und de is Casino. Zersch simer dert is Kino: mir hei mega müesse stresse dasmers i Fium gschafft hei (the Hobbit), de hett der JP der Zeihe ufgrisse bim Stäge ufe seckle und es hett mega blüetet (do wärs wider, üses Wuchenänd-Thema!). Ehjo, är hetts überläbt und der Fium isch guet gsi...:-)

Nachem Fium simer de go Go-kart fahre. Mir hei es Renne gmacht, und 2 verschideni Bahne usprobiert. Das hett gfägt!

Jo, do wäre widermou es paar News gsi. I gloube nid, dasi viu Zyt wirde ha zum das wider regumässig mache, aber dir ghöret jo ou süsch vo mir wenn der lieb froget ;-)

Cheers!

 

Montagu

Wow, scho so lang nümm Blog gschribe, und jezz hani nid mou mini Agända debii zum mis Hirni chli ungerstütze! Das chönnt schwirig wärde, aui Fakte richtig häre z'übercho, aber henu. I wirdes probiere!

Dir lachet jezz vilech, oder gloubet i würd nech alüge oder so, aber dasmou hocki tatsächlech mitemne Teeli ine Dechi ikuschlet voremne Füürli!! ;-) E ziemlechi Verbesserig gägenüber letscht Wuche! Nur blöd ischs nid ganz i mim Huus, aber zu däm chöme mer no.

Am Mittwuch letscht Wuche bini de am Nomittag/Obe go mis nöie MTB (Mountainbike) teste: I ha mi jo scho vo afang a rächt i ihns verliebt gha, aber jezz so würklech!! Füeut sech auso super a!

I bi am Donnschti de ou grad (pinkigi) Bikehäntschli go choufe und de am Nomittag gschnäu zum Rob is Asta la Pasta go es Iisteeli trinke und s'Gschäft abwickle, das heisst, s'Gäud go bringe. Jezz ischs auso MIIS MTB! Yeah!

Zrugg zum Mittwuch: Am Obe hani jo organisiert gha das mer i die Oude Bakkerij si go life Musig lose. Der Ruan isch mi am sibni cho abhole bi mir deheim – i bi am viertuvor afe zrugg gsi vom bike ;-) aber dasch gnue Zyt gsi zum dusche und mi chli zwäg mache. Die meischte Lütt hie si eh gäng ziemlech beiidruckt weni mou nid i de jogging oder biking Chleider umeloufe ;-) Jedefaus simer 9 Lütt gsi am Schluss (der Ruan hett am Afang e Tisch für 2, ihn und si Kolleg, buechet gha und isch entsprächend beiidruckt gsi ab au mine Kollege ;-)). Und aui si guet uscho zäme und so, isch gäng wider nätt mit dene Lütt. Mir si de ou rächt lang blibe, auso, emu der Johann, der Ruan und ig ;-)

Am Donnschti bini äbe go s'Bike zahle und es Schwätzli haute mitem Rob. Am Obe hani irgend öppis los gha, aber i weiss auso grad nümm was (öppis mir der Di, gloubi...).

Am Fritti Nomittag am vieri si der Johann und ig abgfahre für zum go zäutle und chlättere in Montagu. Der Grund wieso mi d'Di am Johann vorgschteut hett isch jo gsi, wiu ig gseit ha i wöu lehre Chlättere und si hett gseit, si kenn öpper wo viu geit. Und jezz heimers auso ändlech gschafft go chlättere. D'Fahrt nach Montagu isch schomou wunderschön gsi – isch ou e Panoramastross oder wieme däm wott säge. Z'Montagu acho simer de zersch go ichoufe, Znacht, Zmorge und so... de heimer „üses“ Zäut ufgschlage und si go braaie mit es paar angerne Kollege vom Johann (Hendrey – oder so, es hyperaktivs Meitli, e Dütsche und e Südafrikaner wo es Guesthous bsitzt...weiss d'Näme nümm, aber nätti Type. S'Meitli i mim Auter und die 2 Manne äuä um die 40gi). Mir heis emu de sehr luschtig gha, super Znacht gässe (Steak und Braai Bruikis oder wieme das schribt) und feins Milk Stout trunke ;-) Am nächschte Morge simer uf und hei Späck mit Eier zum Zmorge gmacht. Mir hei eifach 2 chliini Gaschocher gha, kei Öl und so Gschpäss – Improvisiere isch agseit gsi! Aber sogar Kafi hett de Johann gmacht. Und mir hei no sones Band zwüsche zwöi Böim gspannet und i ha de chli probiert z'balanciere. I bi nid wahnsinnig erfougriich gsi, aber i bruche vilech eifach chli meh Üebig... Nachem Zmorge simer de go Chlättere. Der Johann hett zersch müesse ufe chlättere dasi ha chönne top-rope chlättere und nid ha chönne abegheie. Es hett so liecht usgseh wenn ärs gmacht hett! Und di ig... Jesses! I ha mi gfüeut wie der letscht Trottu! Bi schtundelang nur ir Wang ghanget und ha kei Ahnig gha, wieni söu wittercho. Und der arm Johann hett mi gsicheret und isch dunge fasch igchlofe. Aber i ha nid ufgäh und bi de ou irgendwenn dobe acho. Der Johann hett gmeint, i heigs nid schlächt gmacht. Weiss nid öb das öpperem öppis seit, aber d'Rute isch es schwirigs 17ni gsi, anschiinend. Schpeter hani de no es 15ni gmacht. Isch eifacher gsi, aber bi glich no es paar mou abgschtürzt. S'Wätter isch wunderbar gsi, Sunneschiin, warm. Und d'Umgäbig isch natürlech ou widermou unschlagbar gsi... und de ersch d'Begleitig ;-)

Wasi ganz vergässe ha z'säge isch, dass zuefälligerwiis der Paul (vo der Hippo Insle) ou dert häre isch go chlättere das Wuchenänd und sogar ufe glich Zäutplatz. Mir hei no überleit gha, ändlech mou e Wanderig z'organisiere am Sunnti, aber de hani gseit, i chön äbe nid wiui uf Montagu go, und de hetter gmeint, ok, mir gseh üs derte ;-) Ha scho gwüsst, dass är ou e Chlätterer isch, aber isch scho zuefau simer grad am gliche Wuchenänd am gliche Ort häre! Am Obe hett är aube mit üs Braaiet (är isch äbe ou chli intressiert ar Hendrey...;-)), aber si si nid am gliche Ort häre go chlättere wie mir.

Am Samschti Nomittag si jedefaus no der Flip und d'Estelle (die hani amne Braai bim Johann deheim kenneglehrt) verbii cho. Der Flip isch eine vo de beschte Chlätterer im Land und die 2 si Kollege vom Johann. Der Flip hett unbedingt e mega schwirigi Rute wöue chlättere (29 oder so) und der Johann hettne gsicheret. Isch auso ungloublech die Rute. Keni würkleche Vorschprüng oder öppis im Stei, flach, glatt, überhängend... und der anger chlätteret ufe! Är hetts emu de gschafft churz bevor Dunkuheit und mir si de wider go Znacht choufe bevor mer zrügg si is Camp. De heimer wider chli gässe und trunke und diskutiert mit de angere und si go schlöfele. E wunderbare Tag!!
De am Sunnti morge isch ziemlech näblig gsi bis öppe am 10ni ume. Mir hei de mit der Estelle und em Flip zäme Zmorge gnoh (si hei grad näb üs zäutlet) und si de mou loszottlet zum wider go chlättere. Der Johann und der Flip si wider a die schwirigi Wang und d'Estelle und ig hei de Baboons zuegluegt und diskutiert. Mir hei usegfunge das mer viu ändlechi Inträsse hei, wie Zeichne und mole und so, und hei üs de gägesittig Tipps gäh. D Zyt isch nur so verfloge, und es isch immer wermer und sunniger worde. De si es paar angeri Chlätterer cho, die hei emu de oben-ohne klätteret. Nachdäm der Johann e mega schwirigi Rute abklätteret hetter mer schnäu zeigt, wie dasme lead chlätteret (nid top-rope), ufem Schwirigkeitsgrad 7 oder so (auso meh oder weniger e Schtäge). Aber isch scho angersch weme weiss, dasme doch chli chönnt gheie, und nid zobersch es Seili agmacht isch wo eim jederzyt uffooht. Aber i ha das gmeischteret, und es gitt sogar es paar Fötteli vo mir am Chlättere wo der Flip gmacht hett (gloubi – muess se de no becho).

Am Nomittag bini de a die hingeri, abartig schwirigi Wang und ha im Johann und am Flip zuegluegt bim Chlättere und Fötteli gmacht. Ungloublech wie die 2 chöi Chlättere! Und ou chli beängschtigend mängisch, aber die 2 sötte jo scho wüsse, was si mache ;-) cool, weme das cha!

Nach dere ganze Ufregig heimer de zämepackt und si langsam richtig hei gfahre. Es isch ou scho bau 6i gsi womer los si! Ufem Heiwäg simer de no go Znacht ässe und i ha de mim Chef gschribe, öb mer chöne verbii cho zum der Schlüssu abhole. I bi jo am Huus und Chatz hüete für 2 Wuche und bi dert izoge! Mir si de gschnäu bim Dave verbii und hei e heissi Schoggi trunke und chli Schutte gluegt und äbe der Schlüssu ghout, und si de hei. Am Mänti hani packt nachem Schaffe und nachemne öppe 2 schtündige Biketüürli, und der Johann isch mi cho hole und hett mi und s'Gepäck zum Dave sim Huus brocht. I ha de ou grad glii und wunderbar gschlofe i mim temporäre Deheim. Am Zischti Obe bini zersch zum Dave hei für sine Buebe ade z'säge. Si si jo am Fritti mit der Mueter nach Australie usgwanderet und das isch öppe die letschti Möglechkeit gsi, zum se gseh. I ha mitne Charte gschpiut (der Dave hett müesse go der Zane, s'Baby abhole, wiu sini Ex irgendöppis vertuschet hett – är isch auso nid mou ume gsi die meischti Zyt!). Und i ha no schnäu s'Baby gseh. Isch würklech s härzigschte Baby woni jeh mous gseh ha! Und es brüelet nid! Und lachet eim eifach a... ehjo.

De bini mi gschnäu go umzieh hei und de mit der Di und 4 angerne (Cath, Johnny, Rob, Wilhelm) s'erscht mou ufne Bike Night-Ride (Nachttour, oder so). Das heisst, mir hei üs bir Di troffe und denn hani vom Johnny chönne es Liecht uslehne, wasme dringend brucht. Die Liechter si so schtarch, me meint bau es sig Tag! Mir si öppe 2 Schtung ungerwägs gsi, und zur Di und zrugg hani ou äooe je e haubschtung. I bi auso öppe am viertuab 10ni deheim gsi, und i hätt no lang möge Velofahre! Nur mis Füdle hett chli weh toh – nach öppe 3 Schtung ufem Velo...;-) Durum hani de beschlosse, Velohose z'choufe mit däm Pouschter dinne. Sehr sexy! ;-)

Am Zischti gäge Obe hani ou no dänkt, i chönnt doch es Braai mache bi mir deheim am Mittwuch. Ha de es paar SMS und e-Mails gschribe und öppe 8 Lütt iglade. Es hei de ou grad aui zuegseit! I bi de am Nomittag gschnäu go ichoufe und de nachem schaffe hei go vobereite. Ha eifach e Salat gmacht und Fleisch, Milk Stout und Savanna kouft. D’Di hett e Härdöpfugratin brocht und d’Nicola ou e Salat, und aui angere ou irgendöppis (Glace, z’Trinke, Chips…). Hett sech super ergänzt! Und viu hei es chliises „Gschänkli“, wie es Schöggeli oder so brocht.  Der würklech Alass für das Braai isch gsi, wiui ar Di ha wöue d’Hoor schniide, und das heime de ou gmacht während däm die angere s’Füürli parat gmacht hei und braaiet hei. Es si ou aui guet zäme uscho und mir heis würklech super gha, widermou. Isch vor auem cool weme bedänkt wie spontan das aus gsi isch… und ir Di ihre Hoorschnitt gseht ou super us! ;-)

Am Donnschti hani gschaffet bis am 9ni, de hani probiert e Fium z’luege deheim (Amélie), bi aber gli mou ufem Sofa igschlofe. De bini am 2 wider ufgwacht und is Bett…

Am Fritti hei d’Di und i devo gha, dass mer unbedingt öppis sötte zäme mache, und mir si de spontan a Woodmill Market. Dasch so e Halle mit Marktstäng und Musig. Mir hei üs de chli schön gmacht und si dert häre, nid würklech wüssend was üs erwartet. Es si de fasch keni Lütt dert gsi wius gschiffet hett in Ströme! Aber es isch jo dinne gsi… Mir hei de öppis Zässe kouft und si abghöcklet und hei gässe. De hett eine afo Klavier spile und 2 Giele im Bue si auter hei afo klassischi italiänischi Lieder singe. So schöön sägi öich! Und so ire angere Umgäbig aus dasmesüsch klassischi Musig ghört… d’Di und ig heis gnosse… Und i ha de no es guets Bier gha: Bone Crusher hetts gheisse ;-) Vore lokale Brauerei.

Denn heimer am Ruan gschribe zum luege was är macht, und de simer ou dert häre (Buena Vista) mit ihm und paar Kollege vomer ou scho troffe hei. D’Di isch zersch nid sicher gsi, öb si ou wott cho, wiu si müed gsi isch und so, aber chum simer derte gsi – es hett e Band gschpiut – si mir 2 uf der Tanzflächi gsi und hei aus gäh!! Mir hei sone gueti Zyt gha! Die angere (Ruan und Kollege – öppe 10 Lütt) si zersch mou abghocket und hei öppis trunke und/oder gässe, d’Di und ig hei eifach tanzet… ;-) nach und nach si de die angere (oder emu es paar) ou cho tanze – und der Ruan und ig hei no e chliini Tanzcompetition gmacht ;-) Isch huere luschtig gsi! D’Di isch de mou hei und ig bi no mit de angere bis am 1 ume dert blibe. Ha no es paar Lütt kenneglehrt und gueti Gschpräch gha (der eint zum Bischpiu vomne Departemänt ar Uni wo befindet isch mit mim Departemänt ;-)).

Am Smscti Morge am sibni hani vom Johann es SMS becho – öbi ihm nid vilech glich chönnt häufe zügle. I has ihm abotte gha aber nüt me ghört vo ihm, de hani dänkt är brucht mi vilech glich nid ;-) Aber ha scho bau erwartet, daser mi de glich no frogt. Am nüni ischer mi de cho abhole und mir hei afo zügle. Um die zwöi heimer de aus i sim Huus gha, Sache wo bi sine Eutere deheim isch gsi und das vor Wohnig. Mir hei ou no 4 Schwarzi gha wo sic ho häufe (bezahlt) und im Johann si Papi isch ou cho. Isch e fixi Sach gsi!

Am 3 ume hani de de Johann chli elei gloh und bi mit de Di go bike. Isch scho cool mit so biking Hose!! Obwou me sech chli füeut wie weme Windl ahätt ;-). Mir si wider e nöii Rute gange in Jonkershoek, i bi öppe 3 Schtung biket (e haub Schtung hani nur scho bis zur Di ihrem Huus!). Hett so guet toh!!
De bini hei go dusche und zum Johann für mit ihm, de Jeanne und em Geoffrey go Znacht ässe. Mir hei take-aways ghout bim Simply Asia. Hani sehr gärn gha, momou! Hei de no e Fium “gluegt”, aber aui si igschlofe vorem Fernseh! :-D

Am Sunnti, auso hütt, hani meh oder weniger nüt gmacht. Eifach chli umeblätteret. No chli ghoufe uspacke, Zmorge gässe, wider chli uspackt, irguumer, Musig glost, Blog gschribe, Zmittag kocht und gässe, Fium gluegt… öppe so.

Fötteli vo Montagu sötte mou no cho, uf Facebook oder so. Mou luege, weni dezue chume – die nächscht Wuche foht sech scho wider afo verplane!! (Seckle am Mänti, night ride am Zischti, Sokkie am Mittwuch….) ;-) aber hangt aus chli vom Wätter ab!

Auso, bis zum nächschte Mou!

Cheers!

MTB

öppe so bini is Château dennzumau... aber mit offen Ouge natürlech!

Es schiffet in Schtröme dusse und i ha mi vorem Füürli gmüetlech ine Dechi ikuschlet - ok, tröim witter – Füürli hani natürlech keis! Aber der Räscht stimmt auso. Und i lose „Hot Water“, die südafrikanischi Band woni scho mou amne Konzärt gsi bi, und geschter äbe wider. Aber jezz mou aus der Reihe noche, süsch gitts nur es Puff.

S'letscht Mou Blog gschribe hani vor über eire Wuche. Es isch bau nümm eifach, Zyt z'finge für das! Auso, es isch jo no nie würklech liecht gsi, aber es isch definitiv nid eifacher worde. Aber was me nid aus macht für Fründe und Familie deheim! Vor auem weme bedänkt das ig soz'säge NÜT ghöre vo de meischte wo äuä hie mi Blog läse. Aber dasch es angers Thema...

Auso, vo vore. Nach mim gmüetleche Sunnti vor ere Wuche bini de guet id Wuche gstartet mit emne früeche morge. Am Nomittag heimer gäng wie gäng Lab meeting gha, und am haubi 6i hani widermou abgmacht gha zum Seckle mit de Giele. Ha der Dave und der Ruan scho bau lang nümm gseh gha! Mir si de wider öppe es Haubschtüngli gsecklet, und i säge öich, i ha so Müeh gha! Bi auso gar nid fit gsi. Klar, ha mi vilech no chli müesse vom Château und so erhole, aber isch auso gar nid schön gsi! Aber i has überläbt. Nachem Seckle bini mitem Dave go Znacht ässe. Der Ruan isch nid so guet druff gsi und hett gmeint, är wött vilech no eis go zieh. Der Dave hett aber nachem Znacht grad müesse go schaffe – isch im Momänt ziemlech usglaschtet wiuer sini 2 öutere Söhn so viu wie möglech wott gseh wiu si am 6. Juli nach Australie uswandere mit der Mueter. I ha de im Ruan abotte, är chönn mer schribe wener eis wöu go zieh... und chuum bini deheim gsi vom Znacht mitem Dave hani es SMS becho vom Ruan. De bini haut wider ufs Velo und zrugg id Stadt und ha mi mitem Ruan ufne Drink troffe. I gloube, är isch rächt froh gsi hetter eifach öpper gha zum chli rede und es Bierli zwickle. Um die 11i ume bini de wider deheim gsi.

Am Zischti Nomittag isch der Dave (mi Chef) is Büro cho und hett gmeint, i söu doch schnäu usecho, är wöu öppis bespräche... Är hett mi de jedefaus nur wöue froge, öbi am Obe Zyt hätt zum zu ihne hei go Znacht ässe ;-) I ha natürlech die Iladig gärn agnoh, und är isch mi de am 6i deheim cho abhole (är hett gmeint mitem Velo sigs z'witt... isch zwor nid so, aber i ha ihm jo nid dörfe widerspräche). Ha de e Fläsche Wyy brocht, und die heimer ou grad tütscht. D'Carla isch ou iglade gsi. Es hett Wraps gäh mit Poulet und so. Mmmmhh! Mir heis mega guet gha, är und sini Frou (Corlia) si mega nätt und es wird nid nur über s'Schaffe gredt. Si hei mi zum Bischpiu gfrogt, wieso dasi de nie deheim sig und wasi so mache, und si erschtuunt gsi dasi scho so viu Kollege ha... und vom Château hani natürlech ou verzöut. Der Dave hett de gmeint, i heig anschiinend scho die richtige Kollege. Woner rächt hett hetter rächt! ;-) Ehjo, i go jo de sis Huus go hüete wenn si ide Ferie si Afangs Juli (nächscht Wuche) – das wird nätt! Ha de e Putzfrou und Wöschifrou und so.

Am Mittwuch morge bini wider sehr früeh im Büro gsi, und de hani e chlinnere Schock erlitte wo d'Elrike is Büro cho isch. Si hett verzöut, dass ar Di ihre Hung, d'Shila, es Oug verlore hett am Zischti Obe. Me wüssi nid was passiert sig, nur dass si irgend e krasse Schlag ufe Chopf becho hett und eis Oug der ganz Tag dusse gsi isch, bis d'Di de hei cho isch um die 7ni am Obe. D'Shila cha äbe frei dusse umeseckle wenn d'Di am schaffe isch wiu ihres Huus ziemlech abgläge isch. Und d'Shila isch sech das eigentlech ou gwöhnt. Aber irgendöppis megs schlimms mues passiert si ume Mittag ume...niemer hett gseh was, niemer hett se zum Tierarzt brocht, niemer hett ihri Nummere gha zums ihre säge... I ha gwüsst dases ihre extrem scheisse mues go und ha de grad beschlosse, dasi se go zum Zmittag go bsueche (si isch natürlech nid cho schaffe). I hare es SMS gschribe zum froge wies geit und mi Bsuech akünde. Bi de vorem Mittag go Schoggi choufe (nur die beschti!) und zu ihre ufe biket. Ha öppe 30 Minute mitem Velo zu ihrem Huus, und ha no extrem Gägewind gha! Aber was me nid aus macht fürne Kollegin... Si hett sehr schlächt usgseh... aber sich entsprächens gfröit abem Bsuech! Si isch extrem froh gsi isch si nid so elei gsi, und hett sech tuusig mou bedankt (und si isch eher eini wo nid übertribt – eher s'Gägeteu) und sogar am Schluss glachet und über verschideni Theme gredt. Si isch abglänkt gsi fürne Momänt, genau wasi ha wöue! ;-) I ha de haut chli lenger gschaffet am Obe wiui so lang Mittag gmacht ha (mit häre und zrugg bike und so...) und bi de haut nid auzu lang is Fitness am Obe. Vor auem bini ou no go Tanze! D'Carla hett jo wöue Sokkie lehre, und obwou dass si immer schlächt übere Johann gredt hett hett si de gmeint, oh, wenn är chönn tanze wöu si doch das grad vo ihm lehre. Durum heimer de am Miittwuch Obe zum Tanze abgmacht gha. Am 8i hett mi der Johann abghout und mir hei d'Jeanne und der Jeffrey im Opskop (so heisst der Club) troffe. D'Carla und der Thomas si eifach zersch mid uftoucht, de hani 100mou aglütte und de schlussändlech hett si abgnoh und gseit, si chöme chli – öppe e Schtung z'schpoot. Mir si de die einzige gsi im Club!! normalerwiis isch vou, aber wiu Uniferie si si aui Studänte wäg. Aber isch ou nid schlimm gsi, de heimer Platz gha zum lehre...und zum blöd tue! Während der Johann ir Carla Sokkie biibrocht hett und angeri Tänz hei der Thomas und ig wie blöd im züg ume Tanzet – ohni das eine vo üs e Idee gha hätt was wie geit. Aber mir heis luschtig gha! Ha natürlech ou mitem Johann no es paar Tänz gmacht. I liebe Tanze! Bi so glücklech weni cha tanze, es isch bau nümm wohr. No glücklecher weder süsch scho ;-) Öppe am haubi 11i hett der Johann gmeint, mir sötte vilech langsam hei – d'Joanne und der Jeffrey si scho früecher hei. Är hett mi de hei toh, und isch no ufnes Tee inecho (nei, nid was der dänket! Nur es Tee...). I ha de no d'Stärne erklärt becho – isch e mega schöni klari Nacht gsi!

Am nächschte Morge hani m 9ni es Meeting gha mitem Dave (Chef), bi aber natürlech scho früecher im Büro gsi! I bi de ou bau z'schpäät is Meeting cho wiu d'Di mit der Shila is Büro cho isch. Si hett gmeint, deheim würd si nur versuure und z'viu dänke und so... bi sehr froh gsi dass si so entschide hett! Süsch wäri se wider go bsueche zum Zmittag und hätt der haub Tag „verlore“. Eh, jedefaus ischs im Meeting drum gange, dasi e Workshop organisiere im August. Auso, es isch viu scho besproche worde und so, aber i übernime jezz d'Houptorganisation, irgendwie. Mues mi haut um „Details“ kümmere, wie Programm zämeschtöue, mit Lütt kommuniziere, Afroge versände, Züg verwaute etc... (nur zum's no schnäu erwähne: i ha jo süsch nt z'tue! Afangs Wuche isch ou no es Manurkript abglehnt worde mit Major Revisions, was viu Arbeit bedütet... und am Manuskript vo Colorado bini ou no dranne... und de am Review woni hie mues schribe über Risk Assessments... und de hani 1 bis 3 Vortreg Afangs Septämber... ahjo und eine afangs August a däm Workshop woni organisiere... i dänke, dir gseht s'Problem). Bi de jedefaus mit der Di go Suppe ässe zum Zmittag – mir hei beidi Luscht gha uf Suppe.

Am Obe bini de mitem Ruan go seckle am viertuvor sächsi – der Dave hett kei Zyt gha. Mir si de schnäuer gsi aus süsch, und i ha mi wider chli fitter gfüeut. Bi de ou nachem seckle no öppe 20 Minute ufs Velo im Fitness und 20 Minute go Ruedere.

Am Fritti Mittag bini mit der Di e angeri Suppe go probiere ;-) si hett jezz gäng d'Shila mitgnoh zum schaffe und es geitere jede Tag besser. I ha aube ghoufe Tröpfli id Ouge tue und so. Jo, und ar Di geits ou jede Tag besser... ha se ou gäng chli probiert abzlänke ohni mini Arbeit totau z'vernachlässige!

Am haubi 6i hani mit der Nicola im Fitness abgmacht zum ine Aerobic Stung z'goh. Nachdäm heimer grad dert duschet und si diräkt id Bar go Rugby luege mitem Ruan und 2 Kollege vo ihm. Es isch der Finau gsi vo de Juniore WM, Springboks gäge New Zealand! Und, mir hei gwunne!! ;-) Mir hei ou grad derte im Brazenhead Znacht gässe – isch auso super gsi! Und natürlech chli trunke und s'luschtig gha. D'Nicola und der Dolf hei mi de heibrocht.

Am nächschte Morge hani am achti bir Di abgmacht gha zum go Mountainbike. Ha auso öppe am sibni ufmüesse und de öppe 25 minute zu ihre ufe fahre zersch. De hani uf s'angere Bike umgsattlet und mir si los nach Jonkershoek is Nature Reserve. Mir hei die geilschte huere single trails abgfahre! I has so gnosse! Und i has vermisst... Mountainbike isch äbe scho de Hammer, vor auem i dere Landschaft! Und es hett o viu gueti Wäge und so! Und i ha überhoupt kei Angscht. Bi schnöuer aus d'Di aube dürab und mues weniger abschtiege (öppe nie...). Bi zwor ou scho mou bau ine Boum ine gfahre, aber so schnöu bini jo nid dass viu cha passiere. Und i ha jo – ändlech!! - e Velohöum! Mir si öppe 1,5 Schtung im Reservat gsi, de no öppe 20 Minute heifahrt, de unger d'Duschi und am haubi 11i bini vo de Jeanne abghout worde zum go Wyy probiere ufne Farm wo niemer devo weis und wo mega gueti Wyy macht (ou tüür!). Die Farm hett nur Frittig und Samschtig vo 11-13.00 Uhr offe und produziert nur öppe 12'000 Fläsche (vilech ou nid...aber emu mega wenig). Isch haut e chliine Familiebetrieb. De Johann hett die Farm könnt und de ou das Ganze organisiert. Es si öppe 6 Kollege vo ihm cho, und d'Nicola und de Dolf und de Ruan (han i iglade gha). Si emu de es rächts Grüppli gsi! Und natürlech het der Ruan e Kollegin vom Johan könnt...Stellenbosch isch so chlii hey! ;-) jede könnt jede... und i könne ou scho bau jede ;-)

Ha de während em Wyy teste es SMS becho vo de Carla öbi am Obe wett go Znacht ässe und Top Gear (e Outoshow) luege bim Thomas – är wöu mi ilade. So hett sech mis afänglech lääre Wuchenänd ziemlech rasant ufgfüut! Nachem Wyy probiere simer go Z'mittag ässe, de bini mitem Johann es paar Sache go erledige, wie es Bike bi sine Öutere ablade und es Teeli trinke derte. De simer uf die 7ni zum Thomas hei go Znacht ässe und Top Gear luege. Und uf die 12i hett mi de der Johann heitoh. Bi de ou grad ziemlech erschöpft igschlofe.

Am Samschtig düre Tag düre woni wäg gsi bi hei mini Vermieterin und Häufer – ändlech – Möbu i mini Wohnig gschtöut wo si scho lang versproche gha hett. I bi haut nid ume gsi (si hei mers ou nid zum Vorus gseit!) aber ha gseit, si chönes eifach inetue, i luegi de säuber wienis irichte und so. Am Sunntig morge hani de ou grad Möbu umegschobe und nöi igrichtet. Jezz isches grad extrem gmüetlech! Ha e Büroegge, e Schlofegge, e Wohnzimmer-Egge mit gmüetleche Sässle und Tischli, e Chuchi-Egge (erwitteret mitemne chline Bürotisch) und e grossi Kommode im Igangsbereich zum Sache verschtoue! Würklech toll! 

mis nöischte Biud

Stube

me gseht ou mis zuekünftige Bike! yeah yeah...

Jo und während em Irichte hani es SMS vom Johann becho, öbi jezz wider gieng go bike... es hätt eigentlech s'ganze Wuchenänd ziemlech schlächt Wätter gmäudet gha, vor auem am Sunntig die ganz Zyt Räge. Aber isch de emu usser bedekt nid schlächt gsi. Mir hei de schlussändlech uf die 10ni bide Di abgmacht gha und si isch de ou grad mitcho. Isch wider e super ride gsi! Mir hei e Strecki gmacht wo d'Di süsch nid macht wiu si „z'schwirig“ isch. De Johann isch aube vorus, i hinde noche und d'Di am schluss. I ha natürlech nid ganz mitem Johann chönne mithaute, aber ha glich no es Wiili aube müesse uf d'Di warte. Bi mega froh hani kei Angscht! Macht viu meh Spass so aus wenn d'Chnöi zittere ;-) Und mit de Di gohni eifach mega gärn wiu mir hei es ähnlechs Level, Bärg ufe wie abe.

Wow, es schiffet immerno mega! Aber i bi jo dinne im Warme...;-)

Nochem bike hett mi de Johann no hei begleitet – mir hei jo beidi no e rächte Wäg vor üs gha (är öppe dopplet so lang wie ig). Und e haub Schtung nochdem i hei cho bi hetts afo schiffe! Mir hei so Schwein gha!

I ha de nid viu gmacht der Räscht vom Sunnti. Der Johann isch am Nomittag no ufnes Tee verbii cho und hett mer e elektrischi Härdplatte brocht zum bruche (das heisst, weni Pfanne hätt chönnti choche!! und die si mer ou versproche worde vo de Vermieterin...cha es Wiili go wiemer inzwüsche wüsse, hehe). Uf die 6i bini de is Büro zum go Skype mit Familie und Fründe, s'erscht mou sitti hie acho bi mit Video! ;-) Bi de (noch über 3 Schtung mitem Mike vo Colorado rede) am 12i ume wider hei und ab is Bett.

Am Mänti hani mitem Rob (Roberto; Kolleg vo de Di, bi ou scho mit ihm ufne Nightrun, isch Chef und Bsitzer im Restaurant „Asta la Pasta“, hett italiänischi Wurzle) abgmacht gha, dasi sis aute Mountainbike go go hole zum teste öbis wott choufe. I bi de nochem Schaffe dert häre gsecklet, und är hett mers no pumpet und aus. Isch es mega schöns, gseht us wie nöi, Marke GT, vore Fädergable. Füeut sech super a zum Fahre! Genau mini Grössi... auso, i dänke, das isch mis zuekünftige Mountainbike! Bi de demit heigfahre und zrugg is Büro gsecklet zum mis angere Velo abhole...und bi no inzwüsche ufne Hoger ufe gsecklet zum mit de Giele (Dave und Ruan) go stretche wiui nid mitne ha chönne go seckle.

Jo, de Grund wieso dasi nid mitne ha chönne go seckle isch fougende: d'Di hett am Nomittag usegfunge, das Hot Water ab Obe z'Kapstadt spiut. Mir hei de spontan beschlosse z'goh. I bi de mite Di ihrem Outo gfahre; phuu, isch auso nid eifach gsi! Ha gmeint, es chönnt jederzyt zämegheie! Und schtüüre brucht aui Chraft... aber mir si heil acho und de ou heil wider hei. S'Konzärt isch so inme spezielle Club gsi, auso, im Sport-Clubhuus (Barleycorn Music Club). Dä Club hett 32 Johr Jubilääum, und aui Lütt (oder die meischte) hei usgseh aus wäre si sitem Afang debii (auso, Durchschnittsauter über 50gi). Bide erste 3 Bands hettme de nid mou dörfe rede, niemer hett tanzet, schtier und komisch isches gsi. Bi Hot Water heimer de eifach afo tanze (gäng wie gäng) und de ou de haub Sau agschteckt! D'Band hett üs ou grad erinneret vom letschte Konzärt z'Kapstadt, womer ou die einzige gsi si wo tanzet hei ;-) Ehjo, mir hei die laami Buude ines Partylokau verwandlet fürne churze Momänt! Jo, leider nid auzu lang... un die 1 bini wider im Bettli am pfüüsele gsi...

nur so aus Zwüscheanekdote: es gitt Lütt hie, die hei ärnschthaft gmeint, i sig verhürotet – äuä wiui e Ring aha a däm Finger (dä mitem blaue Stei vo Colorado...). Luschtig!!

Hütt Morge hani wöue usschlofe, bi aber ou nid auzu lang im Bett blibe. Am Mittag bini wider go Suppe ässe mit de Di und Carla, de zum Znacht ändlech is Asta la Pasta zum Rob! Das isch es mega chliises, härzigs italiänisches Restaurant wo de Rob mit sine Öutere füert. Sis Mami isch de ou grad nätt gsi zu mir (d'Di hett mer do einigi Gschichtli verzöut dass si nie nätt gsi sig zu ihre und so...); und i ha e wunderbari, riesegrossi Lasagne verruumet ;-) Nachem Znacht bini no gfrogt worde für is Kino mitem Dave (Kolleg) und sine Giele, aber ha de beschlosse dasi ilech mou e Obe chli deheim für mi wett sii. Morn hani nämlech ou scho wider organisiert dass mer nöime id Stadt (Oude Bakkerij) gö go live Musig lose. Es si ou mehreri Lütt mire Iladig zum mitcho gfougt (Carla, Di, Dolf (d'Nicola isch die Wuche wäg und cha nid cho), Johann, Ruan und e Kolleg vo ihm). Es nätts Grüppli wetti säge! Eigentlech hätt d'Carla gseit gha, si organisieri wider e Tanzobe wie letscht Wuche, aber de hett si nie öppis organisiert und de plötzlech geschter gmeint, si wöu eigentlech gar nid go tanze – aber im Johann nüt gseit! Und jezz schtoh ig blöd to wiui eifach öppis angers organisiert ha...henu, mues de no mit de Carla rede. Isch chli es Huen.

So, und hütt Obe goots früech is Bett! Ändlech mou! Und hoffendlech hetts morn morge usgschiffet dasi schnöu chli cha go bike zum mis zuekünftige Bike usprobiere... I'll keep you posted!

Cheers!

Château

Am Donnschti bini äbe a das Braai zum Johann. D'Di hett am Nomittag beschlosse gha, dass si nid chunnt wiu si no öppis angers los gha hett am schpätere Obe und si gmerkt hett, dases ihre de nid längt zum dert häre go. I bi de auso biket zu sim Huus, isch öppe 20 Minute gsi oder so. Ha 4 verschideni Poulet-Spiessli kouft für ufe Grill und es Chääs-Tomate-Pesto-Dipp gmacht und Chips und Cider brocht. Es si no 3 angeri cho, der Jaco, isch der Nochber von Johann und isch ou ar Uni – hett e Ph.D. in Geografie. De isch der Phlip und d'Estelle dert gsi, die si verhürotet und si schaffet irgendwie aus Lehrerin vo öppis gloub ou ar Uni und der Phlip weisi nid, weiss aber daser eine vode beschte Chlätterer isch ir Umgäbig, wenn nid sogar im Land.

Eh, jedefaus si die Lütt sehr nätt gsi und mir hei gueti Gspräch gfüert und ou viu Seich gstusset – das gfaut mer äbe, weme nid gäng nur aus so ärnscht mues näh! D'Estelle isch bsungers cool, und der Jaco isch ou e luschtige. Und natürlech der Johann, aber das hani nid angersch erwartet ;-) es isch übrigens do so: viu Lütt (die meischte?) rede Afrikaans und Änglisch aus Erschtsproch. Viu rede aber ungerenang lieber Afrikaans. Da ig aber nid Afrikaans cha heisi de Änglisch gredt. Weni aber mängisch nid im Ruum gsi bi heisi gwächslet, aber chuum bini zrügg cho hei si wider Änglisch gredt – sogar zmizz im Satz gwächslet dasi jo nüt verpasse ;-) Das isch nid gäng so, und es näme nid immer aui so viu Rücksicht. Aber angerersitts wotti vilech chli Afrikaans lehre, und de wärs nid schlächt wenn Lütt ab und zue Afrikaans rede i mire Gägewart! Aber es isch auso gar nid eifach zum verschtoh! Si hei mer de chli probiert biizbringe. Mini Ussproch isch super heisi gseit – klar, wägem Dütsch – aber verschtoh isch würklech schwirig! Vilech packis jo mou... und s'Guete isch dasme jo nid würklech mues chönne rede. Wemes verschteit chame gäng no uf Änglisch antworte und si verschtöhs (e gitt nur sehr wenig Lütt wo nid beides chöi).

Auso, jedefaus isch mis Apero guet acho und mini Spiessli si super gsi! Ha aui 4 säuber gässe ;-) Und de nachem Ässe si der Johann und ig go tanze. I hs äbe scho vor Di ghört, dass är e sehr begnadete Tänzer isch, und är hett de mou abotte, mir Sokkie z'lehre, e typische Südafrikanische Tanz. Und das heimer de ou gmacht ;-) Am 10ni ume heimer mis Velo uf sis Outo packt und zu mir hei brocht, de simer i erscht Club go luege – dä isch zue gsi (niemer weiss wieso). De simer nöime id Stadt und dert isch de offe gsi. Es isch zwar fasch niemer dert gsi, aber das hett üs grad no passt wiumer de die ganzi Tanzflächi für üs hei gha und nid hei müesse Rücksicht näh uf angeri Tänzer ;-). Mir hei de zersch e Jägermeister hingere gschlöideret für s'Tanze chli z'erliechtere (oder so ;-)) - mi erscht Jägermeister eh und je – und de ischs los gange. Und jo, der Johann isch nid nur e super Tänzer, sondern ou e super Lehrer! I bi natürlech ou e flissigi Schüelerin und has grad glehrt, das Sokkie. Die einti wo üs zuegluegt hett hett gmeint: „Was, du machsch das s'erscht mou? Du hesch das jo huere schnäu glehrt! Gseht super us...“ und si hett de ganz fasziniert zuegluegt (aus würd me nid überau gäng Lütt gseh Sokkie tanze hie ;-)) Sokkie isch übrigens e Paartanz und isch nid wahnsinnig schwirig, vor auem mit mim Swing-Dance Hingergrund woni z'Colorado erworbe ha (tanze zu Country Musig). D'Musig isch nid ganz so cool und in Afrikaans, aber hey! Tanze isch d'Houptsach, und das fägt wiene Moore! ;-D Am 12i ume bini de heibrocht worde und i ha sagehaft gschlofe! Bi übrigens no iglade worde für am Samschti ines Château mitem Johann. Dasch wider chli e längi Gschicht.

Auso är hett bim braai verzöut daser äber dert häre mues go, und daser eigentlech nid wett go, aber wius sini Chunde si mueser fasch. Und är hett kei Usred gfunge und ihne schiints rächt wichtig z'sii. I ha no so Witzli gmacht und gseit, daser s'nächscht mou haut mües säge är heig es wichtigs Date a däm Tag daser nid mues go. De heter gmeint, die Lütt würde eifach säge, är söu das Date mitnäh... Do muesi vilech no afüege: är isch Architekt und hett s'Château designet. Jo und die Lütt wo s'Château ghört hei dert ab und zue so Aläss, wie äbe am Samschti. Es isch ou e Wyyfarm und Olivefarm und so. Der Alass isch gsi dass e Pianischt und 2 Sänger (Maa und Frou) Musical Lieder performet hei. Jo, und ig bi jezz äbe aus Begleiterin gfrogt worde (äuä zur Stroof wiui Witzli gmacht ha drüber...). Meh zu däm Alass später.

Am Fritti Nomittag bini ändlech widermou go seckle. Nur e Schtung zwor, aber es hett soo guet toh! Bi scho e Wuche nümm richtig go seckle! Ha scho gäng öppis gmacht (schwümme, bike, fitness...), aber haut nid seckle. De am 5i isch mi d'Di cho hole für zum go Znacht ässe und de a dä Schottisch Tanzkurs (Ceilidh) in Kapstadt. D'Carla isch ou mitcho und die meischte Lütt vor Hippo Insle. Mir hei üs de mit de angere zum Znacht troffe und si go vegetarisch Indisch ässe. I ha Vegetarisches Poulet Curry gha ;-) de simer äbe a das Ceilidh. Und es si aus so auti Lütt dert gsi usser mir (mir si aber e rächt grossi Gruppe gsi, meh aus 10 Lütt). De heimer agfange tanze. Zersch heimer Päärli müesse biude. I bi de mit dem zäme gange wo mi uf de Insle gfrogt hett, öbi ne wöu küsse (hani das erwähnt überhoupt? ;-)). Ehjo, de Paul. Ganz e nätte, aber speziell... aber ou e super Tänzer! Mir heis emu mega luschtig gha, die ganz Gruppe. Hei de ou gäng wider Partner gwächslet und rotiert und so, de hettme mit aune chli z'tue gha. Und gäge Schluss heimer so vierer-Gruppe gmacht und mir si grad 4 gsi vo üs Junge zäme, de Paul, d'Ruth, eini woni de Name vergässe ha und ig. Mir hei de es huere Gaudi gha bi dem Tanz und vou aus gäh! De hett de Lehrer gmeint, ei Gruppe machi das so fantastisch dass sicher aui wette zueluege. Die Gruppe söu doch bitte id Mitti cho und das nomou mache. Die Gruppe si mir gsi ;-) I bi de knaurot agloffe (no röter ausi süsch scho gäng bi) und ha mi bau nümm chönne häbe vor Lache. Aber mir hei üs super gschlage! ;-) Der Glen (hett das organisiert), e Kollegin vo ihm vo Amsterdam, ursprünglech Israel, d'Claire, d'Di und ig si de no eis go zieh ines Restaurant Don Pedro. Isch mega cool igrichtet gsi, und ou süsch nätt, gueti Musig und so. Und e guete Drink – meh wienes Dessäär – heimer gha. Wider e sehr glungnige Obe! Am 2 bini afe deheim gsi ;-)

Am Samschti hani de uspennet, nach 2 mou hingerenang schpäät is Bett...s'Wätter isch wider super gsi, chuum Wind, keis Wöukli, warm... i ha de zersch e Manuküre gmacht dusse und de hani mi is Bikini gschtürzt und bi go sünnele und läse und eifach s'Nütmache gniesse! Und mues chli a mire Farb schaffe ;-). Am 3 ume bini de chli go Velofahre es Schtüngli und de hani mi scho müesse afo parat mache für is Château. Schliesslech hett der Johann gwünscht dasi schön usgseh... ha mi de is chliine schwarze gschtürzt und die graue Schtifeli agleit, chli Maskara uf d'Wimpere, nätte Schmuck vom Mam – et voilà! Der Johann isch so beiidruckt gsi, är hett zersch gar kei Wort gfunge, und mer de der ganz Obe Komplimänt gmacht ;-) I bi no froh gsi hani mi so zwäg gmacht, es isch e schigge Alass gsi, imne wahnsinnig coole Schloss, mit aus schickimicki Lütt, und i ha soz'säge e presentier-Roue gha. Der Johann isch natürlech aune vorgschteut worde aus Architekt vom Huus, und de hani mi ou nid dervor chönne drücke, au dene Lütt s'Pfötli z'schüttle ;-) Si no intressanti Lütt gsi zum Töu, vor auem d'Schlossherre... mir hei zersch es Glüehwyy becho, de heimer e Shiraz probiert vor Farm säuber, de hetts Süppli gäh, und de isch s'Highlight vom Obe cho: d'Musig hett afo schpile! Die Lütt si eifach der Hammer gsi! Hei eifach so Klassiker us verschidene Musicals gsunge – wie lang hani scho nüt me serigs gseh!?! Und si super Sänger/Pianischt gsi! I hätt am liebschte grad mitgsunge... hett mi extrem packt! Bi auso schön froh gsi hani der Johann so azündet wäg däm Alass, süsch wäri vilech nie mitgnoh worde, hehe.

s'Château Beau Belle (ha leider keis bessers Fotti gfunge), designed vom Johann ;-)

Nach däm Ganze simer de go libanesisch ässe, und de no ines angers Resti go es Wyyli schlürfe (das ha de ändlech ig dörfe zahle!!).

Am Sunnti heimer wöue go chlättere (ändlech), aber de hett der Johann am Morge gmerkt, daser sech meh verletzt hett auser dänkt hett. Är isch go Bike am Samschti - riese lang und so single trails und so – und isch äbe gschtürzt. De hettim s'Handglänk so weh to daser äbe grad nid cha chlättere. Blöd. De hani mit der Carla wöue go wandere, aber chuum bini parat gsi zum goh und ufem Velo hani mega Chopfweh becho. De bini haut umkehrt, ha Tablettli gnoh und bi zrugg is Bett. Es isch de ou besser worde, und i ha haut wider e fuule Tag gha hütt. Aber das macht jo ou nüt! Defür hani wider e Blog Iitrag chönne schriebe! Und musig lose und singe... ;-)

Cheers!

Töfftour und Jubiläum

Guete Obe. Hütt isch es wichtigs Jubiläum: i bi sitt 2 Mönet z'Stellenbosch! Und es gfaut mer bau jede Tag besser (obwous mer jo scho am Afang extrem gfaue hett! ;-)).

Auso, zrugg zum Sunnti. I bi jo äbe am 9ni amMorge abghout worde für ufne Töfftour mitem Dennis, der Carla und em Thomas. Der Dennis hett e Töff-Jagge für mi mitgnoh dasi de nid chaut ha. Es isch strahlend sunnig gsi, aber haut scho nur so um die 10 - 15 Grad (isch jo äbe Winter hie, hani scho mou erwähnt? ;-D). Mir hei d'Carla und der Thomas bim Spar troffe und si los gfahre. Si hei mi gfrogt, uf welem Töff dasi hinge druff wett hocke, ufem Dennis sim Steer (oder so, e 400ccm), oder ufem Thomas sim BMW (1200ccm). Der BMW hett eifach nid so style dünkts mi, und i ha de im Dennis sine gwäut (ou chli wäg der Carla, wiu jo der Thomas ihre Typ isch wosi i ihn verliebt isch und so...). Bim erste Stop hani de dänkt, i probiere jez glich mou der BMW, vor auem wiu der Thomas aube chli schneuer gfahre isch. Und voila!! nachdäm isch d'Poscht abgange!! isch auso viu bequemer gsi! Und der Thomas hett aus gäh! ;-D Genau DURUM wotti afo Töff fahre!!! Yeah yeah...

der erscht Haut... gsehter der Schnee ufem hingerschte Bärg?

wär gseht s'Viech?

üsi Töffe

mini Kumpane

Mir hei imne nätte Dörfli (Tulbagh oder so) Zmittag gässe, si im ganze über 2 grossi Päss gfahre, hei Baboons gseh und d'Ussicht gnosse. Auso, isch e voue Erfoug gsi! Nur gäge Schluss simer dürnes huere chauts Tau gfahre!! s'Thermometer hett 10 Grad azeigt, aber es hett sech viu cheuter agfüeut! Deheim acho hani nid mou heiss chönne dusche wiui kei Gas me gha ha für d'Duschi! Henu, ha mi de warm igwicklet und no chli gschaffet. D'Di hett no gfrogt gha zum go Znacht ässe mit ihre und emne Kolleg (Rob), aber i ha nümm furt möge.

Am Mänti morge hani mi de prompt chli chrank gfüeut: Hausweh und so. Eifach e grundsätzlechi Müedigkeit, Unmotiviertheit und Chränkeligkeit. I bi natürlech glich go schaffe, ha schliesslech müesse vorbereite fürnes wichtigs Meeting vo hütt (zu däm schpäter)! Ha ou einiges gschafft! Am Morge hett eini vom Büro (d'Doreth) zumne chliine Geburi-Imbiss iglade. Si hett nur öppe 12 Lütt iglade gha, ha mi rächt geehrt gfüeut dass ig ou debii gsi bi! Si hett Chüeche bache, süess und sauzig, und süsch no mega d'Sache brocht! So nätt!

D'Giele hei ou wider gfrogt zum Jogge, aber i ha jo scho lang mou wöue gone Nightrun mache im Jonkershoek Reservat. Der Rob hett de ou prompt gschribe, är gieng, i söu doch ou cho. De hani dänkt, entweder leits mi richtig is Bett oder i füehle mi vilech besser. Und i bi gange. Der Rob isch mi de ou nätterwiis go abhole am sibni (der Rob isch äbe e guete Kolleg vor Di und er isch haub Italiäner und füert es italiänisches Restaurant in Stellenbosch. D'Di hett mi sicher scho 5 mou gfrogt zum dert go ässe aber i ha nie chönne! Wott aber unbedingt mou go, sitt mer s'erscht mou drüber gredt hei gluschtets mi!!!). Jo, es isch huere chaut gsi, huere dunku...und die angere wo si mitcho vo dere Löifergruppe si uhuere fit! Und i ha nüt gseh wiu mis Lämpli scheisse gsi isch und d'Briue agloffe. Und i ha mi so unfit gfüeut! Die angere si mer nur so um d'Ohre gsecklet, und ig bi meh oder weniger nur so usser Atem im Züg ume gschtoglet! Aber hei, dä Schtärnehimmu! Das chöiter öich nid vorschtöue... sicher Millione vo Schtärne woni no gar nie gseh ha! Ehjo, es hett sech glohnt, aber das Trail-Running isch auso angersch! Und de ersch no im Dunkle! Mues ou mou es bessers Lämpli choufe...(aber es isch auso nid nur ar Sicht gläge ;-))

Eh, i bi nid gschtorbe, und was di nid umbringt macht di schtarch. Nid?

Am Zischti Obe hani mit der Nicola abgmacht gha für is Fitness. Nachdäm bini hei (si hätt mi no zum Znacht iglade gha, aber i ha ou gwüsst dass si eigentlech süsch scho gnue um d'Ohre hett im Momänt. Und i bi gäng no chli chrank gsi...) und de ou mega früeh is Bett. Bruche das gloub im Momänt chli!

Hütt hani äbe das wichtige Meeting gha am Nomittag. I ha müesse vorschteue, wasi bis jezz usegfunge ha und wo dasi Imput wett und wasi für Froge ha und so. Isch ou sehr guet gange dünkts mi, und jezz chani richtig afo loslegge mit schriebe! Afangs Ouguscht mueses de fertig si.

Der Dave hett gfrogt gha öbi wider wöu cho Schutte mit ihm und de Giele, aber i ha das für nid sone gueti Idee ghaute, vor auem wius dusse rächt chaut isch wägem Wind und me bim Schutte huere schwitzt. Und i bi haut gäng noni 100% fit. I bi de eifach gschwing ine Fitnesstung dasi glich chli Bewegig gha ha, und bi de go ichoufe für Morn es Braai bim Johann (mi zuekünftig Chlätter-Kolleg ;-)). Mir hei üs jo ersch einisch troffe zumne Znacht mit der Di zäme, und jezz hetter mi grad zumne Braai bi sich deheim iglade. Isch das nid nätt? ;-) Sicher ou totau ohni Hingergedanke, wie au die angere Giele hie ou ;-D Ehjo, jedefaus gohni morn dert häre und hoffe, d'Di chunnt ou. Und jezz bini scho wider müed und go de wider früeh is Bett. Morn wirds äuä schpäät und am Frittig ou (go nach Kapstadt mit der Di und de meischte, wo uf d'Insle cho si dennzumau; es isch sone Schottische Tanzkurs... loh mi lo überrasche!).